ಜಿಎಸ್‌ಟಿ ಇದೆ; ಚೌಕಾಸಿ ಮಾಡ್ಬೇಡಿ..!

7
ಹೊಸ ತೆರಿಗೆ ವ್ಯವಸ್ಥೆಯಿಂದ ಹೆಚ್ಚಿದ ಸ್ಪರ್ಧಾತ್ಮಕತೆ; ಬಟ್ಟೆ ವ್ಯಾಪಾರಿಗಳಿಂದ ಸ್ವಾಗತ

ಜಿಎಸ್‌ಟಿ ಇದೆ; ಚೌಕಾಸಿ ಮಾಡ್ಬೇಡಿ..!

Published:
Updated:
Deccan Herald

ಗದಗ: ಸರಕು ಮತ್ತು ಸೇವಾ ತೆರಿಗೆ (ಜಿಎಸ್‌ಟಿ) ಜಾರಿಯಾದ ನಂತರ ‘ಚೌಕಾಸಿ’ ಕಡಿಮೆ ಆಗಿದ್ದು, ನ್ಯಾಯಬದ್ಧವಾಗಿ ವ್ಯಾಪಾರ ನಡೆಯುತ್ತಿದೆ. ಇದರಿಂದ ನಮಗೂ ಗ್ರಾಹಕರಿಗೂ ಇಬ್ಬರಿಗೂ ಒಳ್ಳೆಯದೇ ಆಗಿದೆ’ ಎನ್ನುವುದು ನಗರದ ಬಹುತೇಕ ಬಟ್ಟೆ ವ್ಯಾಪಾರಿಗಳ ಅನಿಸಿಕೆ.

ಜಿಲ್ಲಾ ಕೇಂದ್ರ ಗದುಗಿನಲ್ಲಿ 400ಕ್ಕೂ ಹೆಚ್ಚು ಬಟ್ಟೆ ಅಂಗಡಿಗಳಿವೆ. ಸ್ಟೇಷನ್‌ ರಸ್ತೆಯ ಮಹೇಂದ್ರಕರ ವೃತ್ತದಿಂದ ಸರಾಫ್‌ ಬಜಾರ್‌ವರೆಗೆ ಸಿದ್ಧ ಮತ್ತು ಬ್ರಾಂಡೆಡ್ ಉಡುಪುಗಳ ಮಳಿಗೆಗಳಿವೆ. ಹಳೆಯ ಬಸ್‌ ನಿಲ್ದಾಣಕ್ಕೆ ಹೊಂದಿಕೊಂಡಂತೆ ಕ್ಲಾಥ್‌ ಮಾರುಕಟ್ಟೆ ಮತ್ತು ಗಾಂಧಿ ಬಜಾರ್‌ ಇದ್ದು, ಇಲ್ಲಿ ಒಂದೇ ಕಡೆ 100ಕ್ಕೂ ಹೆಚ್ಚು ಮಳಿಗೆಗಳಿವೆ. ಇದು ಬಟ್ಟೆ ಖರೀದಿಯ ಪ್ರಮುಖ ತಾಣವಾಗಿದೆ.

‘ಜಿಲ್ಲೆಯಲ್ಲಿರುವ ಬಟ್ಟೆ ವ್ಯಾಪಾರಿಗಳು ಸಿದ್ಧ ಉಡುಪುಗಳನ್ನು ವಿಶೇಷವಾಗಿ ಜೀನ್ಸ್‌ಗಳನ್ನು ಬಳ್ಳಾರಿಯಿಂದ ಆಮದು ಮಾಡಿಕೊಳ್ಳುತ್ತಾರೆ. ಮುಂಬೈ,ಅಹಮದಾಬಾದ್‌, ಬೆಂಗಳೂರಿನಿಂದಲೂ ನಗರಕ್ಕೆ ಬಟ್ಟೆಗಳು ಬರುತ್ತವೆ.ಜಿಎಸ್‌ಟಿಯಿಂದ ಯಾವುದೇ ತೊಂದರೆ ಆಗಿಲ್ಲ, ಬದಲಿಗೆ ಒಳ್ಳೆಯದೇ ಆಗಿದೆ’ ಎನ್ನುವುದು ಗದುಗಿನ ರೆಡಿಮೇಡ್‌ ವ್ಯಾಪಾರಸ್ಥರ ಸಂಘದ ಮಾಜಿ ಅಧ್ಯಕ್ಷ ಶಹಾಬುದ್ದೀನ್‌ ಟೋಪಿವಾಲೆ ಅವರ ಅಭಿಪ್ರಾಯ.

‘ಮೊದಲು ವರ್ಷಕ್ಕೊಮ್ಮೆ ಲೆಕ್ಕಪತ್ರ ಸಲ್ಲಿಸುತ್ತಿದ್ದೆವು. ‘ಜಿಎಸ್‌ಟಿ’ ಜಾರಿಯಾದ ನಂತರ ಪ್ರತಿ ತಿಂಗಳೂ ಆನ್‌ಲೈನ್‌ ಮೂಲಕ ಲೆಕ್ಕಪತ್ರ ಸಲ್ಲಿಸಬೇಕು. ಸಗಟು ವ್ಯಾಪಾರಿಗಳು ಇದಕ್ಕಾಗಿ ‘ಲೆಕ್ಕಿಗ’ನನ್ನು ನೇಮಕ ಮಾಡಿಕೊಂಡಿರುತ್ತಾರೆ. ಸಣ್ಣ ವ್ಯಾಪಾರಿಗಳು ತೆರಿಗೆ ಸಹಾಯಕರ ಮೂಲಕ ರಿಟರ್ನ್ಸ್‌ ಸಲ್ಲಿಸುತ್ತಾರೆ.ಯಾವುದೇ ಸಮಸ್ಯೆಯಾಗಿಲ್ಲ’ ಎಂದು ನಗರದ ಧನಲಕ್ಷ್ಮೀ ಸಿಲ್ಕ್‌ ಆ್ಯಂಡ್‌ ಸ್ಯಾರೀಸ್‌ ಮಳಿಗೆಯ ವ್ಯವಸ್ಥಾಪಕ ಪ್ರತೀಕ್‌ ಅಗರ್‌ವಾಲ್‌ ಹೇಳಿದರು.

ಜಿಎಸ್‌ಟಿಯಿಂದ ‘ಬೆಲೆ’ ಏರಿಕೆ ಆಗಿಲ್ಲ..!

ಸಾಕಷ್ಟು ಜನರು ಜಿಎಸ್‌ಟಿ ಜಾರಿಯಾದ ನಂತರ ಎಲ್ಲದಕ್ಕೂ ಬೆಲೆ ಹೆಚ್ಚಾಗಿದೆ ಅಂದುಕೊಂಡಿದ್ದಾರೆ. ಇದು ತಪ್ಪು ಕಲ್ಪನೆ. ‘ಜಿಎಸ್‌ಟಿ’ಗೂ ಸರಕಿನ ಬೆಲೆಗೂ ಯಾವುದೇ ಸಂಬಂಧವಿಲ್ಲ. ‘ಜಿಎಸ್‌ಟಿ’ ಬಂದ ನಂತರ ವ್ಯಾಪಾರಿಗಳ ನಡುವೆ ಸ್ಪರ್ಧಾತ್ಮಕತೆ ಹೆಚ್ಚಿದೆ. ವ್ಯಾಪಾರ ‘ನ್ಯಾಯಬದ್ಧವಾಗಿ’ ನಡೆಯುತ್ತಿದೆ. ಇನ್ನೊಂದೆಡೆ ಸರಕು ಮತ್ತು ಸೇವೆಗಳ ದರಗಳೂ ಕಡಿಮೆಯಾಗಿವೆ. ಇದರಿಂದ ಗ್ರಾಹಕನಿಗೇ ಲಾಭ ಆಗಿದೆ’ ಎನ್ನುವುದು ನಗರದ ತೆರಿಗೆ ಸಲಹೆಗಾರರಾದ ವಿ.ಎಸ್‌. ಮಾಟಲದಿನ್ನಿ ಅವರ ಅಭಿಪ್ರಾಯ.

ಹತ್ತಿಗಿರಣಿಗಳು ಈಗ ನೆನಪು ಮಾತ್ರ

ದಶಕಗಳ ಹಿಂದೆ ಗದಗ ಜಿಲ್ಲೆಯಲ್ಲಿ 10ಕ್ಕೂ ಹೆಚ್ಚು ಹತ್ತಿ ಗಿರಣಿಗಳಿದ್ದವು. ಗದುಗಿನ ಗಂಗಾಪುರ ಪೇಟೆಯಲ್ಲಿದ್ದ ದಾವಣಗೆರೆ ಕಾಟನ್‌ ಮಿಲ್‌ (ಡಿಸಿ ಮಿಲ್‌) ನೂರಾರು ಜನರಿಗೆ ಕೆಲಸ ಒದಗಿಸಿತ್ತು. ಬೆಟಗೇರಿಯಲ್ಲಿ ಸಾವಿರಾರು ಸಂಖ್ಯೆಯಲ್ಲಿ ಕೈಮಗ್ಗಳಿದ್ದವು. ರೇಷ್ಮೆ ಸಾಕಾಣಿಕೆ ಜಿಲ್ಲೆಯ ಪ್ರಮುಖ ಉದ್ಯೋಗ ಅಲ್ಲದಿದ್ದರೂ, ಇದು ಇಲ್ಲಿನ ಪ್ರಮುಖ ಉದ್ಯಮವಾಗಿ ರೂಪುಗೊಂಡಿತ್ತು. ಇಲ್ಲಿ ತಯಾರಾದ ಬಟ್ಟೆ ಮುಂಬೈ, ಬೆಂಗಳೂರು ಸೇರಿದಂತೆ ದೇಶದ ಹಲವೆಡೆ ರಫ್ತಾಗುತ್ತಿತ್ತು. ಬೆಟಗೇರಿ ಸೀರೆ, ಗಜೇಂದ್ರಗಡ ಕಣ, ಕೊಣ್ಣೂರಿನ ಕಂಬಳಿ ಹೊರ ರಾಜ್ಯಗಳಲ್ಲೂ ಜನಪ್ರಿಯವಾಗಿತ್ತು. ಈಗ ಬೆರಳೆಣಿಕೆಯ ಕೈಮಗ್ಗಗಳು ಮಾತ್ರ ಉಳಿದಿವೆ. ಹತ್ತಿಗಿರಣಿಗಳು ನೆನಪು ಮಾತ್ರ.

‘ಜಿಎಸ್‌ಟಿ’ಯಿಂದ ಪಾರದರ್ಶಕತೆ, ಸ್ಪರ್ಧಾತ್ಮಕತೆ ಹೆಚ್ಚಿದೆ. ಬಟ್ಟೆ ವ್ಯಾಪಾರಿಗಳು ಮನಸ್ಸಿಗೆ ಬಂದಂತೆ ದರ ನಿಗದಿ ಮಾಡುವಂತಿಲ್ಲ. ಇದರಿಂದ ಗ್ರಾಹಕನಿಗೆ ಹೆಚ್ಚಿನ ಲಾಭ ಸಿಗುತ್ತಿದೆ
- ಶಹಾಬುದ್ದೀನ್‌ ಟೋಪಿವಾಲೆ, ರೆಡಿಮೇಡ್‌ ವ್ಯಾಪಾರಸ್ಥರ ಸಂಘದ ಮಾಜಿ ಅಧ್ಯಕ್ಷ

Tags: 

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !