ಬೀದಿಬದಿ ವ್ಯಾಪಾರಿಗಳಿಗೆ ನ್ಯಾಯ ನೀಡಲು ಆಗ್ರಹ

ಅವಳಿ ನಗರ ಗದಗ-ಬೆಗಟೇರಿಯಲ್ಲಿ ಬೀದಿ ವ್ಯಾಪಾರಿಗಳನ್ನು ಒಕ್ಕಲೆಬ್ಬಿಸುವುದನ್ನು ಖಂಡಿಸಿ ಬೀದಿ ವ್ಯಾಪಾರಿಗಳಿಗೆ ತಕ್ಷಣ ವ್ಯಾಪಾರಸ್ಥರ ಪ್ರದೇಶ ಪ್ರದೇಶ ಘೋಷಿಸಬೇಕು ಹಾಗೂ ಒಕ್ಕಲೆಬ್ಬಿಸಿರುವ ವ್ಯಾಪಾರಿಗೆ ನ್ಯಾಯ ಒದಗಿಸುವಂತೆ ಗದಗ ಜಿಲ್ಲಾ ಬೀದಿ ಬದಿ ವ್ಯಾಪಾರಸ್ಥರ ವಿವಿಧೋದ್ದೇಶಗಳ ಸಂಘವು ಸೋಮವಾರ ನಗರಸಭೆ ಬಳಿ ಪ್ರತಿಭಟನೆ ನಡೆಸಿ, ಜಿಲ್ಲಾಧಿಕಾರಿಗೆ ಮನವಿ ಸಲ್ಲಿಸಿತು.

‘ಕೆಲವು ದಿನಗಳಿಂದ ವ್ಯಾಪಾರವಿಲ್ಲದೇ ಪರದಾಡುತ್ತಿರುವ ಸಂತ್ರಸ್ತ ಬಿದಿಬದಿ ವ್ಯಾಪಾರಿ ಸಮದ್ ಢಾಲಾಯತ ಕುಟುಂಬ ನಿರ್ವಹಣೆಗೆ ನಗರಸಭೆಯ ಆಡಳಿತಾಧಿಕಾರಿಗಳೂ ಆಗಿರುವ ಜಿಲ್ಲಾಧಿಕಾರಿ ಎಂ.ಸುಂದರೇಶ್‌ ಬಾಬು ಅನುಕೂಲ ಮಾಡಿಕೊಡಬೇಕು’ ಎಂದು ಅವರು ಆಗ್ರಹಿಸಿದರು.

‘ದೂರುದಾರರ ಬೇಡಿಕೆ ಆಧರಿಸಿ, ಎಣ್ಣೆ ಪದಾರ್ಥಗಳ ವ್ಯಾಪಾರ ಬಿಟ್ಟು ಇದ್ದ ಸ್ಥಳದಲ್ಲೇ ಪರ್ಯಾಯ ವ್ಯಾಪಾರ ಮಾಡಲು ತಕ್ಷಣ ಅವಕಾಶ ಮಾಡಿಕೊಡಬೇಕು. ಪಟ್ಟಣ ಮಾರಾಟ ಸಮಿತಿಯಲ್ಲಿ ಬೀದಿ ವ್ಯಾಪಾರಿಗಳ ನಿಯಮಾವಳಿಗಳನ್ನು ಪಾಲಿಸಲು ಸೂಕ್ತ ಕ್ರಮ ಕೈಗೊಳ್ಳಬೇಕು’ ಎಂದು ಪ್ರತಿಭಟನಕಾರರು ಮನವಿ ಮಾಡಿದರು.

ಜಿಲ್ಲಾ ಘಟಕದ ಅಧ್ಯಕ್ಷ ಮಕ್ತುಮಸಾಬ ನಾಲಬಂದ, ಮಾರುತಿ ಸೋಳಂಕಿ, ಶಿವು ಮಧುರಕರ, ಎಂ.ಆರ್.ಅತ್ತಾರ್, ರಶೀದಾ ನದಾಫ, ರೇಣುಕಾ ಅತ್ತಿವಾಲೆ, ಯೂಸೂಫ್‌ ಶಿರಹಟ್ಟಿ, ರಾಜು ರೋಣದ, ಜಹಾಂಗೀರ ಮುಳಗುಂದ, ಅಬ್ಬು ರಾಟಿ, ತಬರೇಜ್ ಪಠಾಣ, ರಾಜಾಖಾನ ಪಠಾಣ, ಸಮ್ಮದ ಢಾಲಾಯತ, ಫಾರೂಕ ಹುಬ್ಬಳ್ಳಿ, ವಿನಾಯಕ ಬಳ್ಳಾರಿ, ಮಂಜು ಬ್ಯಾಡಗಿ, ಮಾಬುಲಿ ಧಾರವಾಡ, ಅನ್ವರ ಶಿರಹಟ್ಟಿ ಇದ್ದರು.

ನೋಟಿಸ್‌ ನೀಡದೇ ಎತ್ತಂಗಡಿ: ಕಿಡಿ

ಗದಗ-ಬೆಟಗೇರಿ ಅವಳಿ ನಗರದಲ್ಲಿ ಸಾವಿರಾರು ಸಂಖ್ಯೆಯಲ್ಲಿ ಬೀದಿ ವ್ಯಾಪಾರಿಗಳಿದ್ದಾರೆ. 2014ರಲ್ಲಿ ಸರ್ವೋಚ್ಛ ನ್ಯಾಯಾಲಯದ ಆದೇಶ ಹಾಗೂ ಕೇಂದ್ರ ಮತ್ತು ರಾಜ್ಯ ಸರ್ಕಾರಗಳ ನಿರ್ದೇಶನದಂತೆ ಬೀದಿ ವ್ಯಾಪಾರಿಗಳಿಗೆ ಸರ್ಕಾರದಿಂದ ಗುರುತಿನ ಚೀಟಿ ವಿತರಿಸಲಾಗಿದೆ. ಯಾವುದೇ ಬೀದಿಬದಿ ವ್ಯಾಪಾರಿಯನ್ನು ಆತನ ಸ್ಥಳದಿಂದ ತೆರವುಗೊಳಿಸಬೇಕಾದಲ್ಲಿ ಪಟ್ಟಣ ಮಾರಾಟ ಸಮಿತಿಯ ಸಭೆಯಲ್ಲಿ ತೀರ್ಮಾನಿಸಬೇಕು. ಜೊತೆಗೆ ಈ ಬಗ್ಗೆ 30 ದಿನಗಳ ಮುಂಚಿತವಾಗಿ ನೋಟಿಸ್ ನೀಡಬೇಕು. ಆದರೆ, ಪೌರಾಯುಕ್ತರು ಈ ನಿಯಮ ಪಾಲಿಸದೇ ಬೀದಿಬದಿ ವ್ಯಾಪಾರಿಗಳನ್ನು ಏಕಾಏಕಿ ಎತ್ತಂಗಡಿ ಮಾಡಿದ್ದಾರೆ ಎಂದು ಪ್ರತಿಭಟನಾಕಾರರು ಕಿಡಿಕಾರಿದರು.