ಅತಿವೃಷ್ಟಿ: ಹತ್ತಿಗೆ ಬೆಳೆಗೆ ರೋಗ

ಪ್ರಸ್ತುತ ವರ್ಷ ಮುಂಗಾರು ಮಳೆ ಹೆಚ್ಚಾಗಿ ಸುರಿದ ಕಾರಣ ಅತಿವೃಷ್ಟಿ ಉಂಟಾಗಿ ಬೆಳೆಗಳು ಕೊಳೆತು ರೈತರು ನಷ್ಟ ಅನುಭವಿಸುತ್ತಿದ್ದಾರೆ. ತೇವಾಂಶ ಅಧಿಕಗೊಂಡಿರುವುದರಿಂದ ಹತ್ತಿ ಬೆಳೆ ಕೆಂಪು ಬಣ್ಣಕ್ಕೆ ತಿರುಗಿದ್ದು ಇದ್ದ ಕಾಯಿಗಳು ಒಡೆದು ಹಾಳಾಗುತ್ತಿವೆ.

ಈ ಬಾರಿ ತಾಲ್ಲೂಕಿನಲ್ಲಿ ಅಂದಾಜು 9,500 ಹೆಕ್ಟೇರ್ ಭೂಮಿಯಲ್ಲಿ ಬಿಟಿ ಹತ್ತಿ ಬಿತ್ತನೆ ಆಗಿದೆ. ಆರಂಭದಲ್ಲಿ ಉತ್ತಮ ಮಳೆ ಆಗಿದ್ದರಿಂದ ಬೆಳೆ ಚೆನ್ನಾಗಿತ್ತು. ಆದರೆ ಕಳೆದ ಒಂದು ತಿಂಗಳಿಂದ ಸತತ ಮಳೆ ಸುರಿಯುತ್ತಿರುವುದರಿಂದ ಹತ್ತಿ ರೋಗಕ್ಕೆ ತುತ್ತಾಗಿದೆ. ಅತಿಯಾದ ತೇವಾಂಶ ಬೆಳೆಗೆ ಮಾರಕವಾಗಿದ್ದು ಎಲೆಗಳು ಕೆಂಪು ಬಣ್ಣಕ್ಕೆ ತಿರುಗಿದರೆ ಕಾಯಿಗಳು ಕಪ್ಪು ಬಣ್ಣಕ್ಕೆ ತಿರುಗಿ ಕೊಳೆಯುತ್ತಿವೆ. ಕಾಂಡಗಳು ಕೊಳೆಯುತ್ತಿರುವುದರಿಂದ ಕಾಯಿಗಳು ಉದುರಿ ಬೀಳುತ್ತಿವೆ.

ಮಳೆ ಕಡಿಮೆ ಆಗಿ ಚೆನ್ನಾಗಿ ಬಿಸಿಲು ಬಿದ್ದರೆ ಮಾತ್ರ ಬೆಳೆ ಸುಧಾರಿಸುತ್ತದೆ. ಇಲ್ಲದಿದ್ದರೆ ಇಡೀ ಬೆಳೆಯೇ ನಾಶವಾಗುತ್ತದೆ ಎಂಬ ಭಯ ರೈತರನ್ನು ಕಾಡುತ್ತಿದೆ.

‘ತಂಪು ಹೆಚ್ಚಾಗಿದ್ದರಿಂದ ಹತ್ತಿ ಗಿಡದ ಎಲೆಗಳು ಕೆಂಪಾಗಿವೆ. ಇನ್ನು ಕಾಯಿಗಳು ಕೊಳೆತು ಬೀಳುತ್ತಿವೆ. ಸಾವಿರಾರು ಖರ್ಚು ಮಾಡಿ ಹತ್ತಿ ಬೆಳೆಯುತ್ತಿದ್ದೇವೆ. ಆದರೆ ಈ ರೀತಿ ಮಳೆ ಬಂದರೆ ರೈತರನ್ನು ಕಾಪಾಡುವವರು ಯಾರು’ ಎಂದು ಸಮೀಪದ ಯಳವತ್ತಿ ಗ್ರಾಮದ ರೈತ ಸುರೇಶ ಬೀರಣ್ಣವರ ಪ್ರಶ್ನಿಸುತ್ತಾರೆ.

ಪರಿಹಾರಕ್ಕೆ ಆಗ್ರಹ: ಹೆಚ್ಚಿನ ಮಳೆಗೆ ಕಂಠಿಶೇಂಗಾ, ಬಿಟಿ ಹತ್ತಿ, ಗೋವಿನಜೋಳದ ಬೆಳೆಗಳು ಸಂಪೂರ್ಣ ಹಾಳಾಗಿ ರೈತರಿಗೆ ನಷ್ಟ ಉಂಟಾಗಿದೆ. ಕಾರಣ ಸರ್ಕಾರ ಸೂಕ್ತ ಪರಿಹಾರ ನೀಡುವುದರ ಜೊತೆಗೆ ವಿಮಾ ಕಂಪನಿಯಿಂದ ವಿಮೆ ಪರಿಹಾರ ಬರುವಂತೆ ನೋಡಿಕೊಳ್ಳಬೇಕು ಎಂದು ಕಾಂಗ್ರೆಸ್‍ನ ಮುಖಂಡ ಸಮೀಪದ ರಾಮಗಿರಿಯ ಸೋಮಣ್ಣ ಬೆಟಗೇರಿ ಒತ್ತಾಯಿಸಿದರು.