ಲಕ್ಷ್ಮೇಶ್ವರ: ಕಳೆದ ಮೂರು ದಿನಗಳಿಂದ ಕೊಂಚ ಬಿಡುವು ನೀಡಿದ್ದ ಮಳೆ ಬುಧವಾರದಿಂದ ಮತ್ತೆ ಸುರಿಯಲಾರಂಭಿಸಿದ್ದು, ರೈತರ ಆತಂಕಕ್ಕೆ ಕಾರಣವಾಗಿದೆ. ಈಗಾಗಲೇ ತಿಂಗಳಾನುಗಟ್ಟಲೆ ಸುರಿದ ಮಳೆಯಿಂದಾಗಿ ಬೆಳೆಗಳಿಗೆ ವಿವಿಧ ರೋಗಗಳ ಬಾಧೆ ತಗುಲಿದೆ. ಇಂಥ ಹೊತ್ತಲ್ಲಿ ಮತ್ತೆ ಮಳೆ ಆಗುತ್ತಿರುವುದು ರೈತರನ್ನು ಚಿಂತೆಗೀಡು ಮಾಡಿದೆ.
ಈಗಾಗಲೇ ಹೆಸರು ಬೆಳೆ ಕೊಯ್ಲಿಗೆ ಬಂದಿದೆ. ಹೀಗೆಯೇ ಮಳೆ ಬಿಡುವು ನೀಡಿದ್ದರೆ ಹೆಸರುಕಾಯಿ ಬಿಡಿಸುವ ಕೆಲಸ ಭರದಿಂದ ನಡೆಯುತ್ತಿತ್ತು. ಆದರೆ ಅದಕ್ಕೂ ಮಳೆರಾಯ ಅಡ್ಡಪಡಿಸುತ್ತಿದ್ದು ಕೈಗೆ ಬಂದ ತುತ್ತು ಬಾಯಿಗೆ ಬರದ ಪರಿಸ್ಥಿತಿ ರೈತನದ್ದಾಗಿದೆ.
ನಿರಂತರ ಮಳೆಗೆ ಹೆಸರು ಬೆಳೆ ಕೊಳೆಯುತ್ತಿದೆ. ಅಲ್ಲದೆ ಈಗಾಗಲೇ ಕೆಲ ಹೊಲಗಳಲ್ಲಿನ ಹೆಸರುಕಾಯಿ ಮೊಳಕೆ ಒಡೆಯುತ್ತಿವೆ.
‘ಮಳಿ ಸ್ವಲ್ಪ ಬಿಡುವು ಕಡಿಮಿ ಆಗಿದ್ರ ಹೆಸರು ಬುಡ್ಡಿ ಬಿಡಸಾಕ ಅನುಕೂಲ ಆಗತ್ತಿತ್ತು. ಆದರ ಈಗ ಮತ್ತ ಮಳಿ ಶುರುವಾಗೇತ್ರೀ’ ಎಂದು ಹರದಗಟ್ಟಿ ಗ್ರಾಮದ ಯುವ ರೈತ ಸುರೇಶ ಲಮಾಣಿ ಆತಂಕ ವ್ಯಕ್ತಪಡಿಸಿದರು.
