ಫಕೀರೇಶ್ವರರ ಜಾತ್ರೆ: ದ್ವೇಷ ಬಿಡು– ಪ್ರೀತಿ ಮಾಡು ಎಂಬ ಸಂದೇಶ ಸಾರಿದ ಫಕೀರೇಶ್ವರರು

ಶಿರಹಟ್ಟಿ: ಹರನ ಭಕ್ತರಿಗೆ ಹರನಾಗಿ, ಹರಿಯ ಭಕ್ತರಿಗೆ ಹರಿಯಾಗಿ, ಹಜರತ್ನ ಭಕ್ತರಿಗೆ ಹಜರತನಾಗಿ ಅವರವರ ಭಾವಕ್ಕೆ ತಕ್ಕಂತೆ ಆಶೀರ್ವದಿಸಿ ಸರ್ಪವಾಗಿ ಹುತ್ತ ಸೇರಿದ, ಸಾಮರಸ್ಯರ ಹರಿಕಾರ ಜಗದ್ಗುರು ಫಕೀರೇಶ್ವರರ ಜಾತ್ರೆಯ ಮಹೋತ್ಸವವು ಮೇ 1, 2ರಂದು ಅದ್ದೂರಿಯಾಗಿ ನಡೆಯಲಿದೆ.

. ಶಿರಹಟ್ಟಿ ಎಂದಾಕ್ಷಣ ಎಲ್ಲರ ಕಣ್ಮುಂದೆ ಬರುವುದು ಇಲ್ಲಿಯ ಜಗದ್ಗುರು ಫಕ್ಕೀರೇಶ್ವರ ಸಂಸ್ಥಾನ ಮಠ. ಫಕೀರೇಶ್ವರ ಮಠದ ಮೂಲ ಕರ್ತೃಗಳಾದ ಫಕೀರೇಶ್ವರರು ‘ದ್ವೇಷ ಬಿಡು– ಪ್ರೀತಿ ಮಾಡು’ ಎಂಬ ಸಂದೇಶ ಸಾರಿದ ಮಹಾಮಾನವತಾವಾದಿ. 1570ರ ಸುಮಾರಿಗೆ ಚನ್ನವೀರ ಎಂಬ ಹಿಂದೂ ಶರಣರೊಬ್ಬರು ಹಜರತ್ ಖಾಜಾ ಅಮಿನುದ್ದೀನ್ ಎಂಬ ಸೂಫಿ ಸಂತರಲ್ಲಿ ಹಿಂದೂ–ಮುಸ್ಲಿಂ ಎರಡು ಧರ್ಮಗಳ ತತ್ವಗಳನ್ನು ಅಭ್ಯಾಸ ಮಾಡಿ ಧರ್ಮ ಸಾಮರಸ್ಯ ಮತ್ತು ಭಾವೈಕ್ಯ ಸಂದೇಶವನ್ನು ನಾಡಿಗೆ ಸಾರಿದ ಮಹಾಮಹಿಮರು. ಅಂದಿನಿಂದ ಜಾತ್ಯತೀತ ಮಠವೆಂದು ಪ್ರಸಿದ್ಧಿ ಪಡೆದ ಫಕೀರೇಶ್ವರರ ಮಠವು ಸರ್ವಧರ್ಮದ ಸಾಮರಸ್ಯದ ಸಂಕೇತವಾಗಿದೆ.

. ಉಭಯ ಧರ್ಮ ಪಾಲಕ: ಈಶ್ವರ-ಅಲ್ಹಾಹುವಿನ ಸ್ವರೂಪಿಯಾದ ಜಗದ್ಗುರು ಫಕ್ಕೀರೇಶ್ವರರು 16ನೇ ಶತಮಾನದಲ್ಲಿ ಬಿಜಾಪುರದ ಶಿವಯ್ಯ-ಗೌರಮ್ಮ ಎಂಬ ವೀರಶೈವ ದಂಪತಿಯ ಮಗನಾಗಿ ಜನಿಸಿ, ಚನ್ನವೀರ ಎಂಬ ಹೆಸರು ಹೊಂದಿ ಬಿಜಾಪುರದ ಮುಸ್ಲಿಂ ತತ್ವಜ್ಞಾನಿ ಖಾಜಾ ಅಮೀನುದ್ದೀನ್ ಅವರಿಂದ ಧರ್ಮ ಸಂಸ್ಕಾರ ಪಡೆದು ಫಕ್ಕೀರೇಶ್ವರರಾದರು.

. ಫಕೀರೇಶ್ವರರು ಅಂದಿನ ಆಳರಸರಾದ ಮುಸ್ಲಿಂ ದೊರೆಗಳಂತೆ ರಾಜ ಪೋಷಾಕು ಧರಿಸುತ್ತಿದ್ದರು. ಶೈವರಂತೆ ಹಣೆಯಲ್ಲಿ ವಿಭೂತಿ, ಸಾಧಕರಂತೆ ಕೊರಳಲ್ಲಿ ರುದ್ರಾಕ್ಷಿ, ಯೋಗಿಗಳಂತೆ ಕಾಲಲ್ಲಿ ಪಾದುಕೆಗಳನ್ನು ತೊಡುತ್ತಿದ್ದರು. ಶೈವರು ಶಿವನೆಂದು, ವೈಷ್ಣವರು ಹರನೆಂದು, ಮುಸ್ಲಿಮರು ಪೈಗಂಬರರೆಂದು ಹಲವಾರು ವಿಧಗಳಲ್ಲಿ ಇವರನ್ನು ಕರೆಯುತ್ತಿದ್ದರು. ಫಕೀರ ಚನ್ನವೀರರು ಭಕ್ತರಿಗೆ ಈಶ್ವರನ ಸಾಕ್ಷಾತ್ಕಾರಕ್ಕೆ ಮಾರ್ಗ ತೋರಿದರು.

. ಹೆಸರೇ ಸೂಚಿಸುವಂತೆ ಫಕೀರ ಮತ್ತು ಈಶ್ವರರ ಸಂಗಮವಾಗಿ ಫಕ್ಕೀರೇಶ್ವರರು ವೈರಾಗ್ಯಶಾಲಿಗಳು, ಪವಾಡ ಪುರುಷರಾಗಿ ಸರ್ವಧರ್ಮ ಸಮನ್ವರಾಗಿ ಹಿಂದು ಮುಸ್ಲಿಂರಲ್ಲಿ ಭಾವೈಕ್ಯ ಬೆಳೆಸಿದ ಸತ್ಪುರುಷ. 1610ರಲ್ಲಿ ಶಿರಹಟ್ಟಿಯ ಉತ್ತರಕ್ಕಿರುವ ಕಾಡಿನಲ್ಲಿ ಫಕ್ಕೀರೇಶ್ವರರು ಬೀಡು ಬಿಟ್ಟು ಬಹುಭಾಷಾ ತಜ್ಞರಾಗಿ ಅವರವರ ಭಾಷೆಯಲ್ಲಿ ಅವರವರ ಧರ್ಮ ಪದ್ಧತಿಯಂತೆ ಆಚಾರ ವಿಚಾರಗಳನ್ನು ಬೋಧಿಸಿದರು.

. ಸರ್ವಧಮರ್ಮಗಳ ಸಾಮರಸ್ಯ: ಸಮಾಜದಲ್ಲಿನ ಎಲ್ಲಾ ಮತ ಧರ್ಮಗಳ ಜನರ ನಡುವೆ ಶಾಂತಿ, ಸಹಬಾಳ್ವೆ, ಸೌಹಾರ್ದ ಮೂಡಿಸಲು ಬಯಸುತ್ತಿದ್ದ ಫಕ್ಕೀರೇಶ್ವರರು, ತಮ್ಮ ಜೀವಿತದ ಕೊನೆಯ ಘಳಿಗೆಯಲ್ಲಿ ಡೊಂಬರ ಜಾತಿಯ ಹುಡುಗನಿಗೆ ಸಂಸ್ಕಾರ ನೀಡಿ, ಧರ್ಮದ ಉತ್ತರಾಧಿಕಾರಿ ಯನ್ನಾಗಿ ನೇಮಿಸಿ ನಂತರ ಸಜೀವ ಸಮಾಧಿ ಹೊಂದಿದರು. ಈ ಮಹಾಮಹಿಮರ ಗದ್ದುಗೆಯ ಮೇಲೆ ಕಟ್ಟಿದ ಭಾವೈಕ್ಯ ಸಾರುವ ಮಠವೇ ಜಗದ್ಗುರು ಫಕ್ಕೀರೇಶ್ವರ ಮಠ. ಹಿಂದೂ–ಮುಸ್ಲಿಂ ಸಾಮರಸ್ಯದ ಮಠ ಇದಾಗಿರುವುದರಿಂದ, ಇದರ ವಾಸ್ತುಶಿಲ್ಪ ಮಠದ ಸಂಪ್ರದಾಯ, ಉಡುಗೆ ತೊಡುಗೆ ಆಹಾರ ಇತ್ಯಾದಿಗಳಲ್ಲಿ ಅನೇಕ ಧರ್ಮಗಳ ಸಾಮರಸ್ಯ ಅಡಗಿದೆ.

. ಹಿಂದು-ಮುಸ್ಲಿಂ ಸಾಮರಸ್ಯದ ಪ್ರತೀಕವಾಗಿ ಮಠದ ಗೋಪುರಗಳಲ್ಲಿ ಹಸಿರು, ಕೇಸರಿ ಧ್ವಜಗಳು ರಾರಾಜಿಸುತ್ತವೆ. ಮಸೀದಿಯಲ್ಲಿ ನಿತ್ಯ ನಗಾರಿ, ಟಿಕೊರಿ, ತಾಳ, ಕರಣಿ, ಸನಾದಿ ಪಂಚವಾದ್ಯಗಳ ನಿನಾದ ಕೇಳುತ್ತವೆ. ಮಠದ ಉತ್ಸವಗಳಲ್ಲಿ ಹಿಂದು ಸಂಕೇತವೆಂದು ಆನೆ, ಮುಸ್ಲಿಂ ಸಂಕೇತವೆಂದು ಒಂಟೆ ಇರುತ್ತದೆ. ಒಂಟೆಯ ಮೇಲೆ ನಗಾರಿಯನ್ನು ಬಾರಿಸುವುದು ಸಂಪ್ರದಾಯ.

. ಶಾಖಾ ಮಠ ಹಾಗೂ ಮಸೀದಿ: ಮಂಡ್ಯ, ಮೈಸೂರು, ಬೆಂಗಳೂರು, ವಿಜಯಪುರ, ರಾಯಚೂರು, ಕಲಬುರಗಿ, ಚಿತ್ರದುರ್ಗ, ಬೆಳಗಾವಿ, ಧಾರವಾಡ ಇನ್ನೂ ಮುಂತಾದ ಜಿಲ್ಲೆಗಳಲ್ಲಿ ಸುಮಾರು 60 ಶಾಖಾಮಠ ಹಾಗೂ 8 ಶಾಖಾ ಮಸೀದಿಗಳನ್ನು ಹೊಂದಿದ ಫಕೀರೇಶ್ವರ ಮಠವು ಧಾರ್ಮಿಕ, ಸಾಹಿತ್ಯಿಕ ಕೆಲಸ ಕಾರ್ಯಗಳನ್ನು ಮಾಡುವ ಮೂಲಕ ಸಮಾಜ ಸೇವೆ ಮಾಡುತ್ತಾ ಬಂದಿದೆ. ಶಿಕ್ಷಣ ಕ್ಷೇತ್ರದಲ್ಲಿ ಮಠದಿಂದ 5 ಪ್ರೌಢಶಾಲೆಗಳನ್ನು ನಡೆಸಿ ಜ್ಞಾನ ದಾಸೋಹ ಮಾಡುತ್ತಿದ್ದಾರೆ. ಇಷ್ಟೆಲ್ಲ ಮಹತ್ವವನ್ನು ಹೊಂದಿದ ಜ. ಫಕೀರೇಶ್ವರರ ಬಗೆಗೆ ಈ ಭಾಗದ ಜನತೆ ಅಪಾರವಾದ, ಅನನ್ಯವಾದ, ಭಕ್ತಿಯನ್ನು ಹೊಂದಿ ತಮ್ಮ ಮಕ್ಕಳಿಗೆ ಫಕ್ಕೀರಪ್ಪ, ಫಕೀರಸಾಬ, ಫಕ್ಕೀರವ್ವ, ಫಕ್ಕೀರೇಶ ಎಂದು ನಾಮಕರಣ ಮಾಡಿ ಆ ಮಹಾತ್ಮನನ್ನು ನಿತ್ಯ ಸ್ಮರಿಸುತ್ತಿರುವುದಕ್ಕೆ ಸಾಕ್ಷಿಯಾಗಿದೆ.

. ಪ್ರತಿ ವರ್ಷದಂತೆ ವೈಶಾಖ ಬುದ್ಧ ಪೂರ್ಣಿಮೆಯ ಆಗಿ ಹುಣ್ಣಿಮೆ ದಿನ (ಮೇ 1 ) ಶುಕ್ರವಾರ ರಥೋತ್ಸವ, ಮೇ 2ರಂದು ಕಡುಬಿನ ಕಾಳಗ ಉತ್ಸವ ನೆರವೇರಲಿದೆ. ಮಠದ ಸಂಪ್ರದಾಯದಂತೆ ಜಾತ್ರೆಯ ಎಲ್ಲಾ ವಿವಿಧ ಕಾರ್ಯಕ್ರಮಗಳು ಜರುಗಲಿವೆ. ಫಕೀರ ಸಿದ್ಧರಾಮ ಸ್ವಾಮೀಜಿ, ಫಕೀರೇಶ್ವರ ಮಠ . ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್ , ಎಕ್ಸ್ , ಫೇಸ್ಬುಕ್ ಮತ್ತು ಇನ್ಸ್ಟಾಗ್ರಾಂ ನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.

ಫಕೀರೇಶ್ವರರ ಜಾತ್ರೆ: ದ್ವೇಷ ಬಿಡು– ಪ್ರೀತಿ ಮಾಡು ಎಂಬ ಸಂದೇಶ ಸಾರಿದ ಫಕೀರೇಶ್ವರರು

ಚಿನಕುರುಳಿ ಕಾರ್ಟೂನ್: ಮೇ 13 ಬುಧವಾರ 2026

ವಿಶ್ವಾಸಮತದ ವಿರುದ್ಧ ಮತ ಚಲಾವಣೆ: ಎಐಎಡಿಎಂಕೆ ನಿರ್ಧಾರ

ಚುರುಮುರಿ: ಕುರ್ಚಿ ಕೀಟಲೆ

ಸುದ್ದಿ ಗುದ್ದು | ತಿಂಗಳೇಶ: 2026ರ ಮೇ 13, ಬುಧವಾರ

Video | RCB vs KKR: ಕೊಹ್ಲಿ ಶತಕದ ನಿರೀಕ್ಷೆಯಲ್ಲಿ ಆರ್‌ಸಿಬಿ ಅಭಿಮಾನಿಗಳು

IPL ನಿಯಮ ಉಲ್ಲಂಘನೆ: ಬಿಸಿಸಿಐನಿಂದ ಮತ್ತಷ್ಟು ಕಠಿಣ ನಿಯಮ

ಅಗ್ರಸ್ಥಾನದ ಮೇಲೆ RCB ಕಣ್ಣು, KKRಗೆ ಪ್ಲೇ ಆಫ್ ಆಸೆ: ಹೀಗಿದೆ ಉಭಯ ತಂಡಗಳ ಬಲಾಬಲ

IPL Stats: ಹೈದರಾಬಾದ್ 86ಕ್ಕೆ ಆಲೌಟ್, ಸತತ 5ನೇ ಜಯ ಗಳಿಸಿದ ಗುಜರಾತ್

ಒಳನೋಟ: ಭೂದಾಹಕ್ಕೆ ಕೆರೆಯಂಗಳ ಆಪೋಶನ

ಒಳನೋಟ | ಗೋವಾದಂತೆ ಮಂಗಳೂರು ಬೀಚ್‌ ಪ್ರವಾಸೋದ್ಯಮಕ್ಕೂ ʼಜೀವʼ ತುಂಬಬೇಕಿದೆ..

ಒಳನೋಟ: ಬೇಕು ತಾಲ್ಲೂಕು ಆಸ್ಪತ್ರೆಗೆ ‘ಚಿಕಿತ್ಸೆ’

ಒಳನೋಟ: ಮೃಗಾಲಯದಲ್ಲಿ ಮೂಕರೋದನ

ಚಿನಕುರುಳಿ ಕಾರ್ಟೂನ್: ಮೇ 13 ಬುಧವಾರ 2026

ವಿಶ್ವಾಸಮತದ ವಿರುದ್ಧ ಮತ ಚಲಾವಣೆ: ಎಐಎಡಿಎಂಕೆ ನಿರ್ಧಾರ

ಚುರುಮುರಿ: ಕುರ್ಚಿ ಕೀಟಲೆ

ಸುದ್ದಿ ಗುದ್ದು | ತಿಂಗಳೇಶ: 2026ರ ಮೇ 13, ಬುಧವಾರ