ಎಸ್ಸೆಸ್ಸೆಲ್ಸಿ ಫಲಿತಾಂಶ: ಗದಗ ಜಿಲ್ಲೆಗೆ ‘ಎ’ ಗ್ರೇಡ್‌, 21ನೇ ಸ್ಥಾನ

ಗಜೇಂದ್ರಗಡದ ರಾಯಭಾಗಿ ಆಂಗ್ಲ ಮಾಧ್ಯಮ ಪ್ರೌಢಶಾಲೆಯ ವಿದ್ಯಾರ್ಥಿ ಕಿರಣ್‌ ತಾಳಿಕೋಟೆ 625ಕ್ಕೆ 625 ಅಂಕಗಳನ್ನು ಪಡೆದುಕೊಂಡಿದ್ದಾನೆ.

‘ಈ ಬಾರಿ ಜಿಲ್ಲೆಯಿಂದ ಎಸ್ಸೆಸ್ಸೆಲ್ಸಿ ಪರೀಕ್ಷೆಗೆ ಕುಳಿತಿದ್ದ ಎಲ್ಲ ವಿದ್ಯಾರ್ಥಿಗಳು ಉತ್ತೀರ್ಣರಾಗಿದ್ದಾರೆ. ಎಸ್ಸೆಸ್ಸೆಲ್ಸಿ ಫಲಿತಾಂಶದಲ್ಲಿ ಗದಗ ಜಿಲ್ಲೆ 21ನೇ ಸ್ಥಾನದಲ್ಲಿದ್ದು ‘ಎ’ ಗ್ರೇಡ್‌ನಲ್ಲಿದೆ. ‘ಎ’ ಪ್ಲಸ್‌ ಪಡೆದವರ ಸಂಖ್ಯೆಯಲ್ಲಿ ಶೇ 20, ‘ಎ’ ಶ್ರೇಣಿ ಪಡೆದವರ ಸಂಖ್ಯೆಯಲ್ಲಿ ಶೇ 20, ಪ್ರಥಮ ಶ್ರೇಣಿ ಪಡೆದವರ ಸಂಖ್ಯೆಯಲ್ಲಿ ಶೇ 20 ಹಾಗೂ ಒಟ್ಟು ಉತ್ತೀರ್ಣರಾದವರ ಸಂಖ್ಯೆಯಲ್ಲಿ ಶೇ 40 ಪರಿಗಣಿಸಿ ಸ್ಥಾನ ನೀಡಲಾಗಿದೆ’ ಎಂದು ಡಿಡಿಪಿಐ ಬಸವಲಿಂಗಪ್ಪ ಜಿ.ಎಂ. ತಿಳಿಸಿದ್ದಾರೆ.

ಜುಲೈ 19ರಂದು ನಡೆದ ಎಸ್ಸೆಸ್ಸೆಲ್ಸಿ ಪರೀಕ್ಷೆಗೆ ನೋಂದಾಯಿಸಿಕೊಂಡಿದ್ದ 16,216 ಮಂದಿ ವಿದ್ಯಾರ್ಥಿಗಳ ಪೈಕಿ 16,113 ಮಂದಿ ವಿದ್ಯಾರ್ಥಿಗಳು ಪರೀಕ್ಷೆ ಬರೆದಿದ್ದರು. ಮೊದಲ ದಿನ ನಡೆದ ಪರೀಕ್ಷೆಗೆ 103 ಮಂದಿ ಗೈರಾಗಿದ್ದರು.

ಜುಲೈ 22ರಂದು ನಡೆದ ಪರೀಕ್ಷೆಗೆ ನೋಂದಾಯಿಸಿಕೊಂಡಿದ್ದ 15,619 ಮಂದಿ ವಿದ್ಯಾರ್ಥಿಗಳ ಪೈಕಿ 15,586 ವಿದ್ಯಾರ್ಥಿಗಳು ಪರೀಕ್ಷೆ ಬರೆದಿದ್ದರು. ಎರಡನೇ ದಿನ ನಡೆದ ಪರೀಕ್ಷೆಗೆ 33 ಮಂದಿ ವಿದ್ಯಾರ್ಥಿಗಳು ಗೈರಾಗಿದ್ದರು.