ಶಿವಮೊಗ್ಗ : ದರ್ಶನ ನೀಡಲಿವೆ ಸಾವಿರ ಗಣೇಶ ಮೂರ್ತಿಗಳು

7
ಅದ್ದೂರಿ ಗಣೇಶೋತ್ಸವಕ್ಕೆ ನಗರ ಸಜ್ಜು, ಗಮನ ಸಳೆದ ಪರಿಸರ ಸ್ನೇಹಿ ವಿನಾಯಕ

ಶಿವಮೊಗ್ಗ : ದರ್ಶನ ನೀಡಲಿವೆ ಸಾವಿರ ಗಣೇಶ ಮೂರ್ತಿಗಳು

Published:
Updated:
Deccan Herald

ಶಿವಮೊಗ್ಗ: ಗಣೇಶೋತ್ಸವ ಅದ್ದೂರಿ ಆಚರಣೆಗೆ ಶಿವಮೊಗ್ಗ ನಗರ ಸಿದ್ಧಗೊಳ್ಳುತ್ತಿದ್ದು, ಸಾರ್ವಜನಿಕ ಸ್ಥಳಗಳಲ್ಲಿ ಈ ಬಾರಿ ಒಂದು ಸಾವಿರಕ್ಕೂ ಹೆಚ್ಚು ಮೂರ್ತಿಗಳನ್ನು ಪ್ರತಿಷ್ಠಾಪಿಸಲಾಗುತ್ತಿದೆ.

ಪ್ರತಿ ವರ್ಷ 700ರಿಂದ 800 ಅಧಿಕೃತ ಪರವಾನಗಿ ಪಡೆದ ಗಣೇಶ ಮೂರ್ತಿಗಳನ್ನು ಪ್ರತಿಷ್ಠಾಪಿಸಲಾಗುತ್ತಿತ್ತು. ಈ ಬಾರಿ ಆ ಸಂಖ್ಯೆ ಸಾವಿರ ದಾಟಲಿದೆ. ಈಗಾಗಲೇ ವಿವಿಧ ಬಡಾವಣೆ, ಬೀದಿಗಳ ಯುವಕ ಸಂಘಗಳು, ಸಂಸ್ಥೆಗಳು, ದೇವಸ್ಥಾನಗಳು, ಶಾಲಾ–ಕಾಲೇಜುಗಳು ಮೂರ್ತಿ ತಯಾರಿಸುವ ಕಲಾವಿದರಿಗೆ ಮುಂಗಡ ನೀಡಿದ್ದು ವಿಭಿನ್ನ ಕಲಾಕೃತಿಯ, ವಿಶಿಷ್ಟ ಮೂರ್ತಿಗಳನ್ನು ನೀಡುವಂತೆ ಕೋರಿಕೆ ಸಲ್ಲಿಸಿದ್ದಾರೆ. ಸಾರ್ವಜನಿಕ ಸ್ಥಳಗಳಲ್ಲಿ ಸ್ಥಾಪಿಸಲು ಪರವಾನಿ ಕೋರಿ ಪೊಲೀಸರಿಗೆ, ಪಾಲಿಕೆಗೆ ಅರ್ಜಿ ಸಲ್ಲಿಸಿದ್ದಾರೆ.

ಅದ್ದೂರಿ ಆಚರಣೆಗೆ ಬಿಜೆಪಿ ಒಲವು

ಈ ಬಾರಿಯ ವಿಧಾನಸಭೆ, ನಗರ ಪಾಲಿಕೆ ಚುನಾವಣೆಗಳಲ್ಲಿ ಬಿಜೆಪಿ ಭಾರಿ ಬಹುಮತ ಪಡೆದು ವಿಜಯ ಪತಾಕೆ ಹಾರಿಸಿದ್ದು, ಅದೇ ಉತ್ಸಾಹದಲ್ಲಿ ಅದ್ದೂರಿ ಗಣೇಶೋತ್ಸವ ಆಚರಿಸಲು ಆ ಪಕ್ಷದ ಸ್ಥಳೀಯ ಮುಖಂಡರು, ಕಾರ್ಯಕರ್ತರು ಒಲವು ತೋರಿದ್ದಾರೆ. ಮೊದಲ ಬಾರಿ ಗೆಲುವು ಸಾಧಿಸಿರುವ ಪಾಲಿಕೆ ಸದಸ್ಯರು ತಮ್ಮ ವಾರ್ಡ್‌ಗಳ ವಿವಿಧೆಡೆ ಸುಸಜ್ಜಿತ ಗಣೇಶ ಮೂರ್ತಿಗಳನ್ನು ಸ್ಥಾಪಿಸಲು ಮುಂದಾಗಿದ್ದಾರೆ. ಅವರಿಗೆ ಸಂಘ ಪರಿವಾರದ ಪ್ರಮುಖರೂ ಸಾಥ್ ನೀಡುತ್ತಿದ್ದಾರೆ. ಕಾಂಗ್ರೆಸ್, ಪಕ್ಷೇತರ ಸದಸ್ಯರೂ ತಮ್ಮ ವಾರ್ಡ್‌ಗಳಲ್ಲಿ ಗಣೇಶೋತ್ಸವಕ್ಕೆ ಹೆಚ್ಚಿನ ಪ್ರೋತ್ಸಾಹ ನೀಡುತ್ತಿದ್ದಾರೆ. 

ಪರಿಸರ ಸ್ನೇಹಿ ಗಣೇಶ

ಹಿಂದಿಗಿಂತಲೂ ಈ ಬಾರಿ ಅಧಿಕ ಸಂಖ್ಯೆಯಲ್ಲಿ ಪರಿಸರ ಸ್ನೇಹಿ ಗಣೇಶ ಮೂರ್ತಿಗಳನ್ನು ಪ್ರತಿಷ್ಠಾಪಿಸಲು ಸಂಘಟನೆಗಳು ಒಲವು ತೋರಿವೆ. ಪ್ಲಾಸ್ಟರ್ ಆಫ್ ಪ್ಯಾರಿಸ್ ಮೂರ್ತಿಗಳನ್ನು ನಿಷೇಧಿಸಿ, ಮಣ್ಕೆಣಿನಿಂದ ತಯಾರಿಸಿದ ರಾಸಾಯನಿಕ ಮಿಶ್ರಣ ಇಲ್ಲದ ಮೂರ್ತಿಗಳ ಬಳಕೆಗೆ ಒತ್ತು ನೀಡಲಾಗುತ್ತಿದೆ. ಅದಕ್ಕಾಗಿ ನಗರದ ಹಲವೆಡೆ ಜನಜಾಗೃತಿ ಮೂಡಿಸಲಾಗುತ್ತಿದೆ.

ಕಟ್ಟೆಗಳಲ್ಲಿ, ನದಿ, ಕಾಲುವೆಗಳಿಗೆ ಮೂರ್ತಿ ವಿಸರ್ಜಿಸುವ ಬದಲು ಸಂಚಾರಿ ತೊಟ್ಟಿಗಳಲ್ಲೇ ಹಾಕುವಂತೆ ಮನವಿ ಮಾಡಲಾಗುತ್ತಿದೆ. ಈ ಬಾರಿ ನದಿಯಲ್ಲಿ ಸಾಕಷ್ಟು ನೀರು ಹರಿಯುತ್ತಿರುವ ಕಾರಣ ನದಿ ಪಾತ್ರಕ್ಕೆ ಹೋಗುವವರಿಗೆ ಸುರಕ್ಷತಾ ಕ್ರಮ ಕೈಗೊಳ್ಳುವಂತೆ ಸಲಹೆ ನೀಡಲಾಗುತ್ತಿದೆ.

ಕೆಎಸ್‌ಆರ್‌ಟಿಸಿಯಿಂದ 100 ಹೆಚ್ಚುವರಿ ಬಸ್‌

ಗೌರಿ ಮತ್ತು ಗಣೇಶ ಹಬ್ಬದ ಹಿನ್ನೆಲೆಯಲ್ಲಿ ಬೆಂಗಳೂರು ಸೇರಿದಂತೆ ವಿವಿಧೆಡೆಯಿಂದ ಜಿಲ್ಲೆಗೆ ಬರುವ ಪ್ರಯಾಣಿಕರಿಗೆ ಅನುಕೂಲ ಕಲ್ಪಿಸಲು ಕೆಎಸ್‌ಆರ್‌ಟಿಸಿ 100 ಹೆಚ್ಚುವರಿ ಬಸ್‌ಗಳ ಸೇವೆ ಒದಗಿಸುತ್ತಿದೆ.

ಪ್ರಯಾಣಿಕರ ದಟ್ಟಣೆಯ ಲಾಭ ಪಡೆದು ಖಾಸಗಿ ಬಸ್‌ಗಳು ಅಧಿಕ ದರ ನಿಗದಿ ಮಾಡುವುದನ್ನು ತಪ್ಪಿಸಿ, ಜನರಿಗೆ ಅನುಕೂಲ ಮಅಡಿಕೊಡಲು ಈ ಕ್ರಮ ಕೈಗೊಳ್ಳಲಾಗಿದೆ. 

ಅಧಿಕ ಸಂಖ್ಯೆಯಲ್ಲಿ ರಾಜಧಾನಿ ಬೆಂಗಳೂರಿನಿಂದಲೇ ಜನರು ನಗರಕ್ಕೆ ಬರುವ ಕಾರಣ ಶಿವಮೊಗ್ಗ–ಬೆಂಗಳೂರು ಮಧ್ಯೆ ಹೆಚ್ಚಿನ ಸಂಖ್ಯೆಯ ಬಸ್‌ಗಳು ಸೆ. 11 ಮತ್ತು 12ರಂದು ಸಂಚರಿಸಲಿವೆ. ತಾಲ್ಲೂಕು ಕೇಂದ್ರಗಳಿಗೂ ಕೆಲವು ಬಸ್‌ಗಳ ಸೇವೆ ದೊರೆಯಲಿದೆ. ಮತ್ತೆ ಹಬ್ಬ ಮುಗಿದ ನಂತರ ತೆರಳು ವಿಶೇಷ ಬಸ್‌ಗಳ ಸಂಚಾರಕ್ಕೆ ಅನುವು ಮಾಡಿಕೊಡಲಾಗುತ್ತಿದೆ.

ಬಿಗಿ ಬಂದೋಬಸ್ತ್‌

ಗಣೇಶ ಚತುರ್ಥಿ ದಿನ ಎಲ್ಲೆಡೆ ಮೂರ್ತಿಗಳನ್ನು ಪ್ರತಿಷ್ಠಾಪಿಸುವ ಕಾರಣ ಜಿಲ್ಲೆಯಲ್ಲಿ ಇರುವ ಪೊಲೀಸ್‌ ಬಲವನ್ನೇ ಬಳಸಿಕೊಂಡು ಬಂದೋಬಸ್ತ್‌ ಮಾಡಲಾಗುತ್ತಿದೆ. ಸೂಕ್ಷ್ಮ ಪ್ರದೇಶಗಳಲ್ಲಿ ಜಿಲ್ಲಾ ಸಶಸ್ತ್ರ ಮೀಸಲು ಪಡೆ ಕಾವಲು ಹಾಕಲಾಗುತ್ತಿದೆ.

ಹಿಂದೂ ಮಹಾಸಭಾ ಗಣಪತಿ ಸೇರಿದಂತೆ ಕೆಲವು ಗಣೇಶ ಮುರ್ತಿಗಳ ವಿಸರ್ಜನೆಯ ಮೆರವಣಿಗೆ ವೇಳೆ ಪೂರ್ವ ವಲಯ ವ್ಯಾಪ್ತಿಯ ಚಿತ್ರದುರ್ಗ, ದಾವಣಗೆರೆ, ಹಾವೇರಿ ಜಿಲ್ಲೆಗಳಿಂದ ಹೆಚ್ಚುವರಿ ಬಲ ಕರೆಸಿಕೊಳ್ಳಲಾಗುವುದು ಎಂದು ಪೊಲೀಸ್‌ ಉನ್ನತಾಧಿಕಾರಿಗಳು ಮಾಹಿತಿ ನಿಡಿದರು. 

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !