ಬೆಳಗಾವಿ ವಿಭಾಗ ತಂಡ ಚಾಂಪಿಯನ್

ಸಾರ್ವಜನಿಕ ಶಿಕ್ಷಣ ಇಲಾಖೆ, ಕ್ಷೇತ್ರ ಶಿಕ್ಷಣಾಧಿಕಾರಿ ಕಚೇರಿ, ತಾಲ್ಲೂಕು ದೈಹಿಕ ಶಿಕ್ಷಣ ಶಿಕ್ಷಕರ ಸಂಘ ಹಾಗೂ ಎ 1 ಕ್ರೀಡಾ ಅಕಾಡೆಮಿಯ ಸಹಯೋಗದಲ್ಲಿ ಪಟ್ಟಣದಲ್ಲಿ ಶನಿವಾರ ತಾಲ್ಲೂಕು ಕ್ರೀಡಾಂಗಣದಲ್ಲಿ ನಡೆದ ಅಂತಿಮ ಪಂದ್ಯದಲ್ಲಿ ಎದುರಾಳಿ ಕಲಬುರ್ಗಿ ವಿಭಾಗದ ತಂಡವನ್ನು 9 ವಿಕೆಟ್‌ಗಳಿಂದ ಸೋಲಿಸಿದ ಬೆಳಗಾವಿ ತಂಡ ಪ್ರಥಮ ಪ್ರಶಸ್ತಿ ತನ್ನದಾಗಿಸಿಕೊಂಡಿತು.

ಮೊದಲು ಬ್ಯಾಟಿಂಗ್ ಮಾಡಿದ ಕಲಬುರ್ಗಿ ತಂಡ ನಿಗದಿತ 8 ಓವರ್‌ಗಳಲ್ಲಿ 5 ವಿಕೆಟ್ ಕಳೆದುಕೊಂಡು 37 ರನ್ ಗಳಿಸಿತು. ಇದನ್ನು ಬೆನ್ನಟ್ಟಿದ ಬೆಳಗಾವಿ ತಂಡ 5.3 ಓವರ್‌ಗಳಲ್ಲಿ ಒಂದು ವಿಕೆಟ್ ಕಳೆದುಕೊಂಡು 38 ರನ್ ಗಳಿಸುವ ಮೂಲಕ ಜಯಗಳಿಸಿತು.

ಕಲಬುರ್ಗಿ ತಂಡದ ಜಿ. ಅನಿಕೇತ್, 9 ವಿಕೆಟ್ ಪಡೆದು ಟೂರ್ನಿಯಲ್ಲಿ ಉತ್ತಮ ಬೌಲರ್ ಪ್ರಶಸ್ತಿ ಪಡೆದರೆ, 120 ರನ್ ಗಳಿಸಿದ ಬೆಳಗಾವಿ ತಂಡದ ವಿನಾಯಕ್ ಪಾಂಡ್ಯ, ಉತ್ತಮ ಬ್ಯಾಟ್ಸ್‌ಮನ್ ಪ್ರಶಸ್ತಿ ಪಡೆದರು.
ಎರಡು ದಿನ ನಡೆದ ಪಂದ್ಯಾವಳಿಯಲ್ಲಿ ಬೆಂಗಳೂರು, ಮೈಸೂರು, ಕಲಬುರ್ಗಿ, ಬೆಳಗಾವಿ ತಂಡಗಳು ಭಾಗವಹಿಸಿದ್ದವು, ಪಂದ್ಯಾವಳಿ ಲೀಗ್ ಮಾದರಿಯಲ್ಲಿ ನಡೆಯಿತು.

ಪಂದ್ಯಾವಳಿಯಲ್ಲಿ ಪ್ರಥಮ ಸ್ಥಾನ ಪಡೆದ ಬೆಳಗಾವಿ ತಂಡದ 11 ಹಾಗೂ ದ್ವಿತೀಯ ಸ್ಥಾನಗಳಿಸಿದ ಕಲಬುರ್ಗಿ ತಂಡದ 5 ಆಟಗಾರರು ಉತ್ತರ ಪ್ರದೇಶದ ಆಗ್ರಾದಲ್ಲಿ ಈ ತಿಂಗಳ ಅಂತ್ಯದಲ್ಲಿ ನಡೆಯಲಿರುವ ರಾಷ್ಟ್ರಮಟ್ಟದ ಕ್ರಿಕೆಟ್ ಟೂರ್ನಿಯಲ್ಲಿ ಭಾಗವಹಿಸಲಿದ್ದಾರೆ.

ಆಯ್ಕೆಯಾದವರು: ರಾಷ್ಟ್ರಮಟ್ಟದ ಕ್ರಿಕೆಟ್ ಪಂದ್ಯಾವಳಿಯಲ್ಲಿ ಭಾಗವಹಿಸಲು ಆಯ್ಕೆಯಾಗಿರುವ 16 ಆಟಗಾರರು.

ಅನ್ಮೋಲ್ ಡಿ ಪಾಗದ, ವೀರಾಜ್ ಆರ್. ಹಾವೇರಿ, ಮಣಿಕಂಠ ಎಸ್ ಬುಕ್ತಿಗರ್, ಶಾಹಿಬಜ್ ಎ. ಜಮಖಂಡಿ, ಅನ್ಷ್ ಆರ್. ಪಲಂಕರ್, ಲಕ್ಷ್ಮೀನಾರಾಯಣ್ ಭಟ್, ವಿನಾಯಕ್ ಪಾಂಡ್ಯ, ಎ.ಸಿ. ಪ್ರೀತಂ, ಆದಿತ್ಯ ಉಮ್ರಾಣಿ, ಬಾಬಾಗೌಡ ಪಾಟೀಲ್, ಇಸ್ಮಾಯಿಲ್ ಬಿ. ಚೌಧರಿ (ಎಲ್ಲರೂ ಬೆಳಗಾವಿ ).
ಜೆ. ಮಹಮ್ಮದ್ ಮೋಹಿಬ್, ಅನಿಕೇತನ್, ಸಚಿನ್ ಕುಮಾರ್ ಯಾದವ್, ನಮನ್ ದಗ, ಅನಿಕೇತ್ ರೆಡ್ಡಿ (ಎಲ್ಲರೂ ಕಲಬುರ್ಗಿ)