ಸಿಲಿಂಡರ್ ಸ್ಫೋಟ; ಮನೆಗೆ ಸಂಪೂರ್ಣ ಹಾನಿ

ಎಲೆಕ್ಟ್ರಾನಿಕ್ಸ್ ಕೆಲಸ ಮಾಡುವ ಮನ್ಸೂರ್ ಎಂಬುವರ ಮನೆಯಲ್ಲಿ ಭಾನುವಾರ ಮಧ್ಯಾಹ್ನ ಈ ಘಟನೆ ನಡೆದಿದೆ. ಸಿಲಿಂಡರ್ ಸ್ಫೋಟಗೊಂಡು ಬೆಂಕಿ ಹೊತ್ತಿಕೊಳ್ಳುತ್ತಿದ್ದಂತೆಯೇ ಮನೆಯಲ್ಲಿದ್ದ ಎಲ್ಲರೂ ಹೊರಗಡೆ ಓಡಿ ಬಂದಿದ್ದಾರೆ. ಮನೆಯಲ್ಲಿದ್ದವರ ಸಮಯ ಪ್ರಜ್ಞೆಯಿಂದ ಸಂಭಾವ್ಯ ಅನಾಹುತವೊಂದು ತಪ್ಪಿದಂತಾಗಿದೆ. ಆದರೆ ಸ್ಫೋಟದ ತೀವ್ರತೆಗೆ ಮನೆಯಲ್ಲಿದ್ದ ಬಟ್ಟೆಗಳು ಸೇರಿದಂತೆ ಗೃಹಬಳಕೆ ವಸ್ತುಗಳು ಕರಕಲಾಗಿವೆ. ವಾಸದ ಮನೆ ಬಹುತೇಕ ಹಾನಿಗೀಡಾಗಿದೆ. ಮನೆಯ ಛಾವಣಿ ಕಿತ್ತು ಹೋಗಿದ್ದು, ಹೆಂಚುಗಳು ಪುಡಿ ಪುಡಿಯಾಗಿವೆ.

ಘಟನೆಯಿಂದ ಸಣ್ಣ ಮನೆಯಲ್ಲಿದ್ದುಕೊಂಡು ದುಡಿದು ಬದುಕುತ್ತಿದ್ದ ಕುಟುಂಬದ ಸ್ಥಿತಿ ಈಗ ಅತಂತ್ರವಾಗಿದೆ. ಸಂಬಂಧಪಟ್ಟ ಇಲಾಕೆಯ ಅಧಿಕಾರಿಗಳು ಪರಿಶೀಲಿಸಿ ನೆರವಿನ ಸಹಾಯಹಸ್ತ ಚಾಚುವಂತೆ ಬಡ ಕುಟುಂಬ ಮನವಿ ಮಾಡಿದೆ.