ಹಾಸನ: ರೈತರೊಬ್ಬರು ಜೋಳಕ್ಕೆ ಇರಿಸಿದ್ದ ಕ್ರಿಮಿನಾಶಕ ಸೇವಿಸಿ ನವಿಲು ನಿತ್ರಾಣವಾಗಿರುವ ಘಟನೆ ತಾಲ್ಲೂಕಿನ ಚಿಗಹಳ್ಳಿ ಗ್ರಾಮದಲ್ಲಿ ನಡೆದಿದೆ.
ಗ್ರಾಮದ ಮಂಜೇಗೌಡ ಎಂಬುವರು ಜೋಳ ಬಿತ್ತನೆ ಮಾಡಿದ್ದರು. ಜೋಳದ ಕಾಳುಗಳನ್ನು ಪ್ರಾಣಿ, ಪಕ್ಷಿಗಳು ಹಾಳು ಮಾಡದಂತೆ ಔಷಧ ಇರಿಸಿದ್ದರು. ಆಹಾರ ಅರಸಿ ಬಂದ ನವಿಲು ಆಕಸ್ಮಿಕವಾಗಿ ತಿಂದಿದ್ದರಿಂದ ನಿತ್ರಾಣಗೊಂಡಿದೆ.
ಗ್ರಾಮಸ್ಥರು ನವಿಲನ್ನು ಆಸ್ಪತ್ರೆಗೆ ಕರೆದೊಯ್ಯಲು ಪ್ರಯತ್ನಪಟ್ಟರು. ಅಷ್ಟರಲ್ಲಿ ಅದು ಕುರುಚುಲು ಗಿಡದ ಮಧ್ಯೆ ತಪ್ಪಿಸಿಕೊಂಡು ಹೋಗಿದೆ. ಹಾಸನ ತಾಲ್ಲೂಕಿನ ಸುತ್ತಮುತ್ತ ಜೋಳವನ್ನು ಹೆಚ್ಚಾಗಿ ಬೆಳೆಯಲಾಗುತ್ತದೆ. ಈ ಜೋಳ ತಿನ್ನಲು ನವಿಲುಗಳ ಹಿಂಡು ಬರುತ್ತವೆ. ಇದನ್ನು ನಿಯಂತ್ರಿಸಲು ರೈತರು ಈ ರೀತಿ ಮಾಡಿದ್ದಾರೆ.
