ಗಣೇಶೋತ್ಸವಕ್ಕೆ ಸಜ್ಜಾದ ಹಾವೇರಿ

7
ಸಂಸ್ಕೃತಿ, ಜಲಮೂಲಗಳ ಸಂರಕ್ಷಣೆಯ ಪರಿಸರ ಸ್ನೇಹಿ ಆಚರಣೆಗೆ ಮನವಿ

ಗಣೇಶೋತ್ಸವಕ್ಕೆ ಸಜ್ಜಾದ ಹಾವೇರಿ

Published:
Updated:
Deccan Herald

ಹಾವೇರಿ: ಸಾರ್ವಜನಿಕ ಗಣೇಶೋತ್ಸವ ಸಮೀಪಿಸಿದ್ದು, ಎಲ್ಲೆಡೆ ಸಿದ್ಧತೆಗಳು ಜೋರಾಗಿವೆ. ಪರಿಸರ ಸ್ನೇಹಿ ಗಣೇಶೋತ್ಸವ ಆಚರಣೆಯ ಹಿನ್ನೆಲೆಯಲ್ಲಿ ಪಿಒಪಿ ಮೂರ್ತಿಗಳ ನಿಷೇಧ, ಅಧಿಕ ಶಬ್ದ ಹೊರಸೂಸುವ ಡಿ.ಜೆ. ನಿಷೇಧ, ಶಾಂತಿ ಪಾಲನೆಗಾಗಿ ಕಟ್ಟುನಿಟ್ಟಿನ ಕ್ರಮಗಳಿಗೆ ಜಿಲ್ಲಾಡಳಿತ ಸಜ್ಜಾಗಿದೆ. 

ಪರಿಸರ ಸ್ನೇಹಿ ಹಬ್ಬ

ಗೌರಿ-ಗಣೇಶ ಹಬ್ಬದ ಆಚರಣೆ ಸಂದರ್ಭದಲ್ಲಿ ಪ್ಲಾಸ್ಟರ್ ಆಫ್ ಪ್ಯಾರಿಸ್, ರಾಸಾಯನಿಕ ಬಣ್ಣ ಲೇಪಿತ ವಿಗ್ರಹಗಳನ್ನು ಬಳಸ ಬಳಸಬಾರದು ಎಂದು ಕರ್ನಾಟಕ ರಾಜ್ಯ ಮಾಲಿನ್ಯ ನಿಯಂತ್ರಣ ಮಂಡಳಿ ಸೂಚನೆ ನೀಡಿದೆ.

ಮೂರ್ತಿಗಳಿಗೆ ನೀರಿನಲ್ಲಿ ಕರಗುವ ನೈಸರ್ಗಿಕ ಬಣ್ಣಗಳನ್ನು ಉಪಯೋಗಿಸಬೇಕು. ಚಿಕ್ಕ ಮೂರ್ತಿಗಳು ವಿಸರ್ಜನೆಗೂ ಸರಳವವಾಗಿವೆ. ಸ್ಥಳೀಯ ಸಂಸ್ಥೆ ನಿರ್ಮಿಸಿದ ತಾತ್ಕಾಲಿಕ ಹೊಂಡ ಮತ್ತು ತೊಟ್ಟಿಗಳು ಹಾಗೂ ಬಕೆಟ್‌ನಲ್ಲಿ ವಿಸರ್ಜಿಸಬೇಕು ಎಂದು ಅಧಿಕಾರಿಗಳು ವಿನಂತಿಸಿದ್ದಾರೆ.

ಗಣಪತಿಯಷ್ಟೇ ಪರಿಸರ ಮಾತೆಯನ್ನೂ ಭಕ್ತಿಯಿಂದ ಪೂಜಿಸುವ ಸಂಸ್ಕೃತಿ ನಮ್ಮದು. ಅದಕ್ಕಾಗಿ, ಆಚರಣೆಗಳು ಪರಿಸರ ಸ್ನೇಹಿ ಆಗಿರಬೇಕು. ಈಗ ಬಾವಿಗಳೇ ವಿರಳ. ಇದ್ದ ಕೆರೆ, ಬಾವಿ, ನದಿಗಳನ್ನು ರಕ್ಷಿಸುವ ಜವಾಬ್ದಾರಿಯೂ ನಮ್ಮೆಲ್ಲರ ಮೇಲಿದೆ. ಅಲ್ಲದೇ, ಮಣ್ಣಿನ ಮೂರ್ತಿಯ ಬಳಕೆಯಿಂದ ಸ್ಥಳೀಯ ಕಲಾವಿದರಿಗೆ ಅವಕಾಶ ಹೆಚ್ಚುತ್ತದೆ ಎನ್ನುತ್ತಾರೆ ಕಲಾವಿದ ವಸಂತ ಕಡತಿ.

ಪಿಒಪಿ ಮೂರ್ತಿ ಬಳಕೆ ವಿರುದ್ಧ ಈ ಬಾರಿ ನಗರಸಭೆ ಕಾರ್ಯಾಚರಣೆಗೆ ಇಳಿದಿದೆ. ಹೀಗಾಗಿ, ಈ ಬಾರಿ ಭಾರಿ ಪ್ರಮಾಣದಲ್ಲಿ ಬಂದಿಲ್ಲ. ಆದರೆ, ಕೆಲವೆಡೆ ಕದ್ದುಮುಚ್ಚಿ ಮಾರಲು ಯತ್ನಿಸಿದ್ದು, ದಾಳಿ ನಡೆಸಿದ ಅಧಿಕಾರಿಗಳು ಮೂರ್ತಿಗಳನ್ನು ಜಪ್ತ ಮಾಡಿದ್ದಾರೆ.

‘ನಾವು ಸತತ ದಾಳಿಗಳನ್ನು ನಡೆಸಿದ್ದು, ಕೆಲವು ಮೂರ್ತಿಗಳನ್ನು ವಶಪಡಿಸಿಕೊಂಡಿದ್ದೇವೆ. ಪಿಒಪಿ ಮೂರ್ತಿಯನ್ನು ಸಾರ್ವಜನಿಕರೂ ಖರೀದಿಸಬಾರದು. ಅದು ಪರಿಸರಕ್ಕೆ ಸೂಕ್ತ ಅಲ್ಲ’ ಎಂದು ನಗರಸಭೆ ಪರಿಸರ ಎಂಜಿನಿಯರ್ ಚಂದ್ರಕಾಂತ ಗುಡ್ನೆವರ ಮನವಿ ಮಾಡಿದ್ದಾರೆ.

ನಗರದಲ್ಲಿ

ನಗರದ ಸುಭಾಷ್‌ ಸರ್ಕಲ್‌ನಲ್ಲಿ ‘ಹಾವೇರಿ ಕಾ ರಾಜ’, ಪುರದ ಓಣಿ (ಹುಕ್ಕೇರಿಮಠದ ಹತ್ತಿರ), ಗಾಂಧಿ ವೃತ್ತದ ಬಳಿ , ಕಾಗಿನಲೆ ಕ್ರಾಸ್‌, ಜೆ.ಪಿ ವೃತ್ತದ ಬಳಿ, ತರಕಾರಿ ಮಾರುಕಟ್ಟೆಯ ರಸ್ತೆ , ಮುನ್ಸಿಪಲ್‌ ಹೈಸ್ಕೂಲ್‌, ಗೂಗಿ ಕಟ್ಟೆ ಓಣಿ, ನಗರ ಪೊಲೀಸ್‌ ಠಾಣೆ, ಜೆ.ಪಿ ವೃತ್ತದಲ್ಲಿ, ಡಾ.ಬಿ.ಆರ್ ಅಂಬೇಡ್ಕರ್‌ ವೃತ್ತ, ಜೆ.ಎಚ್‌. ಪಟೇಲ್‌ ವೃತ್ತ, ಬಸ್‌ನಿಲ್ದಾಣ, ತರಕಾರಿ ಮಾರುಕಟ್ಟೆ, ಇಜಾರಿಲಕಮಾಪುರ, ಉದಯನಗರ, ಕೇಂದ್ರೀಯ ಬಸ್‌ ನಿಲ್ದಾಣ, ಹೆಸ್ಕಾಂ ಕಚೇರಿ, ನಗರಸಭೆ ಆವರಣ, ನಾಗೇಂದ್ರನಮಟ್ಟಿ, ಶಿವಯೋಗೇಶ್ವರ ನಗರ, ವಿದ್ಯಾನಗರ ಪಶ್ಚಿಮ ಬಡಾವಣೆ, ಜಿಲ್ಲಾ ಸಶಸ್ತ್ರ ಮೀಸಲು ಪಡೆ, ವಿದ್ಯಾನಗರ ಪೂರ್ವ ಬಡಾವಣೆ, ಬಸವೇಶ್ವರ ನಗರ, ವಿನಾಯಕ ನಗರ, ಮೆಹಬೂಬ್‌ ನಗರ, ದಾನೇಶ್ವರಿ ನಗರ ಸೇ ವಿವಿಧೆಡೆ ಪ್ರತಿವರ್ಷ ಗಣೇಶ ಮೂರ್ತಿ ಪ್ರತಿಷ್ಠಾಪಿಸುತ್ತಿದ್ದು, ವಿಶೇಷವಾಗಿದೆ.

ಈ ಬಾರಿ ಸೆ. 13 ರಿಂದ 23ರವರೆಗೆ ಆಚರಿಸಲಾಗುತ್ತದೆ. ಸಾರ್ವಜನಿಕ ದಟ್ಟಣೆ ಉಂಟಾಗದಂತೆ ಹಾವೇರಿಯ ಮುನ್ಸಿಪಲ್ ಹೈಸ್ಕೂಲ್ ಮೈದಾನ, ಬ್ಯಾಡಗಿಯ ತಾಲ್ಲೂಕು ಕ್ರೀಡಾಂಗಣ, ರಾಣೆಬೆನ್ನೂರಿನ ತಾಲ್ಲೂಕು ಕ್ರೀಡಾಂಗಣ, ಹಿರೇಕೆರೂರಿನ ಸರ್ವಜ್ಞ ಕಲಾಭವನ ಹತ್ತಿರದ ಸಾರ್ವಜನಿಕ ಸ್ಥಳ, ಶಿಗ್ಗಾವಿಯ ಸಂತೆ ಮೈದಾನ, ಸವಣೂರಿನ ಭರಮದೇವರ ಮೈದಾನ ಹಾಗೂ ಹಾನಗಲ್‌ನ ಕುಂಬಾರಗುಂಡಿ ಬಯಲು ಜಾಗೆಯಲ್ಲಿ ಪಟಾಕಿ ಮಾರಾಟಕ್ಕೆ ಸ್ಥಳ ನಿಗದಿ ಮಾಡಲಾಗಿದೆ.

ನಿಗದಿಪಡಿಸಿದ ಸ್ಥಳದಲ್ಲಿ ಪಟಾಕಿ ಮಾರಾಟ ಮಾಡದೇ ಆದೇಶವನ್ನು ಉಲ್ಲಂಘಿಸಿದರೆ ಪರವಾನಗಿದಾರರ ಮೇಲೆ ಕಾನೂನು ಕ್ರಮ ಕೈಕೊಳ್ಳಲಾಗುವುದು ಎಂದು ಜಿಲ್ಲಾಧಿಕಾರಿ ಡಾ.ವೆಂಕಟೇಶ್ ಎಂ.ವಿ. ತಿಳಿಸಿದ್ದಾರೆ.

ಸಂಸ್ಕೃತಿ ರಕ್ಷಣೆ: ಹಾವೇರಿ ಮಾದರಿ

ವಿವಿಧ ನಾಯಕರ ಜಯಂತ್ಯುತ್ಸವ, ಧಾರ್ಮಿಕ ಆಚರಣೆಗಳ ಸಂದರ್ಭದಲ್ಲಿ ನಮ್ಮ ಸಂಸ್ಕೃತಿಯನ್ನು ನಿರ್ಲಕ್ಷಿಸಿಕೊಂಡು ಡಿ.ಜೆ. ಹಾಕಿ ಕುಣಿಯುವುದನ್ನು ನಿಲ್ಲಿಸಬೇಕು ಎಂದು ಜಿಲ್ಲೆಯ ಪ್ರಮುಖ ಮಠಗಳ ಸ್ವಾಮೀಜಿಗಳು, ಧಾರ್ಮಿಕ ಮುಖಂಡರು ಆಗ್ರಹಿಸಿದ್ದರು.
ದೇಸಿ ಸಂಸ್ಕೃತಿ, ಧರ್ಮ ರಕ್ಷಿಸುವ ನಿಟ್ಟಿನಲ್ಲಿ ಜಿಲ್ಲೆಯ ಮಠಾಧೀಶರು, ಧಾರ್ಮಿಕ ನಾಯಕರು ಕೈಗೊಂಡ ನಿರ್ಧಾರವು ರಾಜ್ಯಕ್ಕೆ ಮಾದರಿಯಾಗಿವೆ. ಸಂಸ್ಕೃತಿ ರಕ್ಷಣೆ ಹಿನ್ನೆಲೆಯಲ್ಲಿ ಜಯಂತ್ಯುತ್ಸವ ಆಚರಣೆಯ ಪೂರ್ವಭಾವಿ ಸಭೆಗಳಲ್ಲಿ ಜಿಲ್ಲಾಡಳಿತಕ್ಕೆ ಈ ರೀತಿಯ ಸಲಹೆಗಳು ಹಲವು ಬಾರಿ ಬಂದಿದ್ದು, ಜಿಲ್ಲಾಡಳಿತವೂ ಕಟ್ಟುನಿಟ್ಟಿನ ಕ್ರಮಕ್ಕೆ ಮುಂದಾಗಿದೆ.

ಧ್ವನಿ ವರ್ಧಕ ಬಳಕೆ ಮಿತಿ (ಡೆಸಿಬೆಲ್)

ವಲಯ; ಹಗಲು; ರಾತ್ರಿ

ಕೈಗಾರಿಕಾ; 75; 70

ವಾಣಿಜ್ಯ; 65; 55

ವಸತಿ; 55; 45

ಶಾಂತ ; 50 ; 40

* ಮೂರ್ತಿಗೆ ಹಾಕಲಾದ ಬೆಲೆ ಬಾಳುವ ನಗದು, ಚಿನ್ನಾಭರಣವನ್ನು ವಿಸರ್ಜನೆಗೂ ಮೊದಲೇ ತೆಗೆದಿಡುವಂತೆಯೇ, ಪೂಜಾ ಮತ್ತು ಅಲಂಕಾರಿಕ ವಸ್ತುಗಳನ್ನು ತೆಗೆದು ವಿಸರ್ಜಿಸಬೇಕು
–ವಸಂತಕುಮಾರ್ ಕಡತಿ, ಕಲಾವಿದ, ಹಾವೇರಿ

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !