ಎತ್ತು ಖರೀದಿಸಲು ಸಿಗದ ಸಾಲ: ಟಗರುಗಳಿಂದ ಉಳುಮೆ ಮಾಡಿದ ರೈತ

ಒಂದೂವರೆ ಎಕರೆ ಜಮೀನಿನಲ್ಲಿ ಬೆಳೆದ ಸೋಯಾಬಿನ್ ಬೆಳೆಯ ಮಧ್ಯದ ಕಳೆಯನ್ನು ತೆಗೆಯಲು ಟಗರಿಗೆ ನೊಗವನ್ನು ಕಟ್ಟಿ ಎಡೆಕುಂಟೆ ಹೊಡೆಯಲು ಆರಂಭಿಸಿದ್ದಾರೆ.

‘ಬಿತ್ತನೆ ಬೀಜ, ರಸಗೊಬ್ಬರ ಖರೀದಿಸಲು ಕೂಡ ಸಾಲ ಸಿಗುತ್ತಿಲ್ಲ. ಮಾರುಕಟ್ಟೆಯಲ್ಲಿ ಎತ್ತುಗಳನ್ನು ಖರೀದಿಸಲು ಕನಿಷ್ಠ ₹70ರಿಂದ 80 ಸಾವಿರವಾಗುತ್ತದೆ. ಎಲ್ಲಿಯೂ ಸಾಲ ಸಿಗದ ಕಾರಣ ಟಗರುಗಳ ಮೂಲಕ ಉಳುಮೆ ಮಾಡಿ, ಅಲ್ಪ ಪ್ರಮಾಣದಲ್ಲಿ ಆದ ಮಳೆಗೆ ಬಿತ್ತನೆ ಮಾಡಿದ್ದೇನೆ’ ಎಂದು ರೈತ ಶೇಖಪ್ಪ ತಿಳಿಸಿದರು.

‘ಕುರುಬರ ದೊಡ್ಡಿಯಲ್ಲಿ ಹತ್ತು ತಿಂಗಳ ಹಿಂದೆ ₹13 ಸಾವಿರಕ್ಕೆ ಎರಡು ಟಗರುಗಳನ್ನು ಖರೀದಿಸಿ, ಅವುಗಳಿಗೆ ‘ಕನಕ’ ಮತ್ತು ‘ರಾಯಣ್ಣ’ ಎಂದು ನಾಮಕರಣ ಮಾಡಿ, ಮಕ್ಕಳಂತೆ ಪೋಷಣೆ ಮಾಡಿದ್ದೇನೆ. ಹೊಲಕ್ಕೆ ಹೋಗುವಾಗ ಕೃಷಿ ಸಲಕರಣೆಗಳನ್ನು ಸಾಗಿಸಲು ಮತ್ತು ಮನೆಗೆ ನೀರು ತರಲೆಂದು ಇರುವ ಪುಟ್ಟ ಬಂಡಿಯ ನೊಗಕ್ಕೆ ಟಗರುಗಳು ಹೆಗಲು ಕೊಡುತ್ತಿವೆ’ ಎಂದು ಶೇಖಪ್ಪ ಹೇಳಿದರು.