ಸೊಪ್ಪು–ತರಕಾರಿ ಮತ್ತೆ ಹೆಚ್ಚಳ

ಜಿಲ್ಲೆಯ ವಿವಿಧೆಡೆ ಶುಭಕಾರ್ಯಗಳು ಶುರುವಾಗಿದ್ದು, ತರಕಾರಿ–ಸೊಪ್ಪು ತರಕಾರಿಗೆ ಬೇಡಿಕೆ ಹೆಚ್ಚಿವೆ. ಅಲ್ಲದೇ, ಜಾತ್ರೆಗಳೂ ಅಲ್ಲಲ್ಲಿ ನಡೆಯುತ್ತಿವೆ. ಹೀಗಾಗಿ, ಕಳೆದ ವಾರ ಸ್ವಲ್ಪ ಏರಿಕೆ ಕಂಡ ತರಕಾರಿ ದರವು ಈ ವಾರವೂ ಏರಿಕೆಯಾಗಿದೆಎಂದು ವ್ಯಾಪಾರಿ ಸುರೇಶ ಯಲ್ಲಾಪುರ ತಿಳಿಸಿದರು.

ನಗರ ಲಾಲ್‌ಬಹುದ್ದೂರ್‌ ಶಾಸ್ತ್ರಿ ಮಾರುಕಟ್ಟೆಯ ಗುರುವಾರದ ಸಂತೆಯಲ್ಲಿ ಕೆ.ಜಿ. ಈರುಳ್ಳಿ ₹20, ಆಲೂಗಡ್ಡೆ ₹20, ಮೆಣಸಿನಕಾಯಿ ₹60 ರಿಂದ 70, ಮುಳಗಾಯಿ (ಬದನೆ) ₹40, ಚೌಳಿಕಾಯಿ ₹40, ಬೀಟ್ ರೂಟ್ ₹30, ಕ್ಯಾರೆಟ್ ₹35, ಸೌತೆಕಾಯಿ ₹50, ಬೀನ್ಸ್ ₹40, ಟೊಮೆಟೊ ₹20, ಅವರೆಕಾಯಿ ₹40, ಹಾಗಲಕಾಯಿ ₹40, ಹೀರೆಕಾಯಿ ₹60 ಇತ್ತು. ಹೂಕೋಸು ಒಂದಕ್ಕೆ ₹25ರಿಂದ 20 ಇತ್ತು.

ಹಣ್ಣುಗಳ ದರವು ಬಹುತೇಕ ಸ್ಥಿರವಾಗಿದೆ. ಕೆ.ಜಿ. ದ್ರಾಕ್ಷಿ ₹80ರಿಂದ ₹100, ಸೇಬು ₹100 ರಿಂದ ₹ 120, ಚಿಕ್ಕು ₹70, ದಾಳಿಂಬೆ ₹100 ಇದೆ. ಡಜನ್‌ ಪಚ್ಚೆ ಬಾಳೆಹಣ್ಣಿಗೆ ₹40, ಜೀರಿಗೆ (ಮಿಟ್ಲಿ) ಬಾಳೆಹಣ್ಣಿಗೆ ₹35 ಇವೆ ಎಂದು ವ್ಯಾಪಾರಿ ರಸೂಲ್‌ ತಿಳಿಸಿದರು.

ಮೀನು ಮಾರುಕಟ್ಟೆಯಲ್ಲಿ ಕೆ.ಜಿ. ಬಂಗುಡೆ– ₹130, ರೂಪ್ ಚಂದ್– ₹150, ಬಾಳಾ– ₹120, ಗೌರಿ– ₹140, ಚೌಡಿ– ₹100, ಟ್ರಾಲಿ– ₹80, ಜೀಲೆಬಿ– ₹120, ಬುಳ್ಳೆಂಜೀರ್ –₹250, ಸೌದಾಳ್ –₹ 250 ಎಂದು ಮೀನಿನ ವ್ಯಾಪಾರಿ ಇಕ್ಬಾಲ್ ಗಣಜೂರ ತಿಳಿಸಿದರು.

ವರ್ಷಾಂತ್ಯ ಆಚರಣೆಯ ಡಿ.31ರಂದು ಮೀನು, ಕೋಳಿ ಮಾಂಸ ಹಾಗೂ ಕುರಿ ಮಾಂಸ ಮಾರಾಟ ಹೆಚ್ಚಿತ್ತು. ಆದರೆ, ದರದಲ್ಲಿ ಬದಲಾವಣೆ ಆಗಿಲ್ಲ ಎಂದು ಗೋವಿಂದಪ್ಪ ಕರ್ಜೂರ್‌ಕರ್ ತಿಳಿಸಿದರು.