ಧಾರಾಕಾರ ಮಳೆ: ಸಂಚಾರ ಅಸ್ತವ್ಯಸ್ತ

ರಾಷ್ಟ್ರೀಯ ಹೆದ್ದಾರಿ ಕಡೆಯಿಂದ ಹರಿದು ಬಂದ ನೀರು ಹಾನಗಲ್‌ ಮುಖ್ಯರಸ್ತೆಗೆ ನುಗ್ಗಿತು. ಬಸ್‌ ನಿಲ್ದಾಣದ ಮುಂಭಾಗದಿಂದ ಎಪಿಎಂಸಿ ಮಾರುಕಟ್ಟೆವರೆಗೆ ಮಳೆ ನೀರು ಹೊಳೆಯಂತೆ ಹರಿಯಿತು. ರಭಸಕ್ಕೆ ಹರಿಯುತ್ತಿದ್ದ ನೀರಿನಲ್ಲಿ ಬೈಕ್‌ ಸವಾರರು ಚಾಲನೆ ಮಾಡಲು ಸಾಧ್ಯವಾಗದೆ ದ್ವಿಚಕ್ರ ವಾಹನಗಳನ್ನು ತಳ್ಳಿಕೊಂಡು ಹೋದರು. ಸಂಚಾರ ‘ಒನ್‌ವೇ’ ಆದ ಕಾರಣ ವಾಹನಗಳು ಸಾಲುಗಟ್ಟಿ ನಿಂತವು.

ಸರಸ್ವತಿ ಟಾಕೀಸ್‌ ರಸ್ತೆ ಕೂಡ ಬಂದ್‌ ಆಯಿತು. ಇದರಿಂದ ವಾಹನ ಸವಾರರು ಒಳರಸ್ತೆಗಳಲ್ಲಿ ಬಳಸಿಕೊಂಡು ಸಂಚಾರ ಮಾಡಿದರು. ಹಳೇ ಪಿ.ಬಿ.ರಸ್ತೆಯಲ್ಲಿ ನೀರಿನ ಹರಿವು ಜೋರಾಗಿತ್ತು. ಪೊಲೀಸ್‌ ವಸತಿಗೃಹಕ್ಕೂ ನೀರು ನುಗ್ಗಿದ ಪರಿಣಾಮ ನಿವಾಸಿಗಳು ಪರದಾಡಿದರು. ಪ್ರತಿ ಬಾರಿ ಜೋರು ಮಳೆ ಬಂದಾಗಲೂ ಇದೇ ಪರಿಸ್ಥಿತಿ ಇರುತ್ತದೆ.

ಕೊಚ್ಚಿಹೋದ ವ್ಯಾಪಾರಿಗಳು:ಹುಕ್ಕೇರಿ ಮಠದ ರಸ್ತೆಯಲ್ಲಿ ನೀರು ಹೊಳೆಯಂತೆ ಹರಿದ ಪರಿಣಾಮ, ತಳ್ಳುಗಾಡಿ ವ್ಯಾಪಾರಸ್ಥರು ಹಲವಾರು ಮೀಟರ್‌ ದೂರ ನೀರಿನಲ್ಲಿ ಕೊಚ್ಚಿಕೊಂಡು ಹೋದರು. ಮಳಿಗೆಗಳಲ್ಲಿದ್ದ ಜನರು ರಕ್ಷಣೆಗೆ ಕೂಗಿಕೊಳ್ಳುವ ದೃಶ್ಯ ವಿಡಿಯೊದಲ್ಲಿ ಸೆರೆಯಾಗಿದೆ. ವಿವಿಧ ಜನವಸತಿ ಪ್ರದೇಶಗಳಲ್ಲಿ ಮಳೆ ಅವಾಂತರದಿಂದ ಜನರು ಕಂಗಾಲಾದರು.