ಬಿತ್ತನೆ ಬೀಜ: 3 ಕ್ವಿಂಟಲ್‌ ಅಕ್ರಮ ದಾಸ್ತಾನು ಪತ್ತೆ

ಇಲ್ಲಿನ ಅಶೋಕ ನಗರದ ಮಲ್ಲಿಕಾರ್ಜುನ ಸೀಡ್ಸ್ ಮಾಲೀಕತ್ವದ ಗೋದಾಮಿನಲ್ಲಿ ಅನಧಿಕೃತವಾಗಿ ಸಂಗ್ರಹಿಸಿ ಇಟ್ಟಿದ್ದ 305 ಪಾಕೀಟ್‌ (ತಲಾ 4 ಕೆ.ಜಿ)ನ ಒಟ್ಟು 1,220 ಕೆ.ಜಿ ಮೆಕ್ಕೆಜೋಳ ಬಿತ್ತನೆ ಬೀಜಗಳನ್ನು ಹಾಗೂ ಗೂಡ್ಸ್‌ ವಾಹನದಲ್ಲಿ ಯಾವುದೇ ದಾಖಲಾತಿ ಇಲ್ಲದೆ ಸಂಗ್ರಹಿಸಿದ್ದ ರಾಸಾಯನಿಕ ಉಪಚಾರ ಮಾಡದ 37 ಗೋಣಿ ಚೀಲ (ಅಂದಾಜು 1,850 ಕೆ.ಜಿ) ಮೆಕ್ಕೆಜೋಳ ಬಿತ್ತನೆ ಬೀಜಗಳನ್ನು ಜಪ್ತು ಮಾಡಲಾಗಿದೆ.

ಈ ಸಂಬಂಧ ಕಿರಣ ಮಲ್ಲಿಕಾರ್ಜುನ ಅಂಗಡಿ ಹಾಗೂ ಗಂಗೇನಹಳ್ಳಿಯ ಹನುಮಂತ ಚೌಡಪ್ಪ ಎಂಬುವವರ ಮೇಲೆ ಕೃಷಿ ಅಧಿಕಾರಿ ಅರವಿಂದ ಎಂ. ನಗರ ಠಾಣೆಗೆ ದೂರು ನೀಡಿದ್ದಾರೆ.

ಜಾಗೃತ ಕೋಶದ ಜಂಟಿ ಕೃಷಿ ನಿರ್ದೇಶಕ ಜಿಲಾನಿ ಮೊಖಾಶಿ, ಕೃಷಿ ಇಲಾಖೆ ಉಪ ನಿರ್ದೇಶಕ ಬಿ. ವೆಂಕಟರಮಣಪ್ಪ, ಸ್ಫೂರ್ತಿ ಜಿ.ಎಸ್‌. ಹಾಗೂ ಕೃಷಿ ಅಧಿಕಾರಿಗಳು ದಾಳಿಯಲ್ಲಿ ಪಾಲ್ಗೊಂಡಿದ್ದರು.