ನುಡಿಗೆ ಬಣ್ಣ ಹಚ್ಚಿ ಮೆಚ್ಚಿಸುವ ಹುಚ್ಚುತನ ಬೇಡ

ಮನುಷ್ಯ ಜೀವನದ ಹರುಷ ನಮ್ಮ ಬದುಕಿನ ಶೈಲಿಯ ಮೇಲೆ ಅವಲಂಬಿಸಿರುತ್ತದೆಯೇ ಹೊರತು ನಮ್ಮ ಮಾತುಗಳ ಮೇಲಲ್ಲ. ನಾವು ಒಳ್ಳೆಯವರೆಂಬುದನ್ನು ಸಾಬೀತು ಪಡಿಸುವ ಸಲುವಾಗಿ ಗೌರವ, ಸ್ಥಾನಮಾನಕ್ಕಾಗಿ ನಮ್ಮನ್ನು ನಾವು ಹೊಗಳಿಕೊಳ್ಳುವ ಭರದಲ್ಲಿ ಬೇರೆಯವರ ಮೇಲೆ ದೋಷಾರೋಪ ಮಾಡುವ ಪ್ರವೃತ್ತಿಯು ಬದುಕಿನ ಸಂತೆಯಲ್ಲಿ ನಮ್ಮನ್ನು ನಾವು ಹರಾಜಿಗಿಟ್ಟಂತೆ. ‘ಗುಂಪಿನಲ್ಲಿ ಗೋವಿಂದ’ ಎನ್ನುತ್ತಾ ಪರನಿಂದೆ ಮಾಡುವ ಮನಸ್ಥಿತಿಯಿಂದ ನಾವು ಹೊರಬರಬೇಕು.

ಕೆಲವರಿಗೆ ನುಡಿಗೆ ಬಣ್ಣ ಹಚ್ಚಿ, ಪರರನ್ನು ಮೆಚ್ಚಿಸುವ ಹುಚ್ಚುತನವೇ ಕಾಯಕವಾಗಿರುತ್ತದೆ. ಸದಾ ಸತ್ಕಾರ್ಯ ಮಾಡುವವನು ಯಾವಾಗಲೂ ತನ್ನ ಮುಂದಿನ ಸತ್ಕಾರ್ಯಗಳ ಬಗ್ಗೆ ಆಲೋಚಿಸುತ್ತಿರುತ್ತಾನೆಯೇ ಹೊರತು ಬೇರೆಯವರ ಕಾರ್ಯಗಳ ಬಗ್ಗೆ ಆರೋಪಿಸುವುದನ್ನಾಗಲಿ ವಿರೂಪಗೊಳಿಸುವುದನ್ನಾಗಲಿ ಮಾಡುವುದಿಲ್ಲ. ನಮ್ಮ ಮಾತುಗಳು ವಿರಸಕ್ಕೆ ಕಾರಣವಾಗದೇ ಸಮರಸಕ್ಕೆ ಕಾರಣವಾಗುತ್ತ ಸೌಹಾರ್ದ ಬೆಳೆಸಬೇಕು.

-ನಿರಂಜನಾನಂದಪುರಿ ಸ್ವಾಮೀಜಿ, ಕನಕ ಗುರುಪೀಠ ಕಾಗಿನೆಲೆ ಕ್ಷೇತ್ರ, ಹಾವೇರಿ ಜಿಲ್ಲೆ