ಅಂತರಂಗ, ಬಹಿರಂಗ ಶುದ್ಧಿ ಅಗತ್ಯ: ವಿಧುಶೇಖರ ಭಾರತೀ ಸ್ವಾಮೀಜಿ

ತಾಲ್ಲೂಕಿನ ಬಿದನೂರು ನಗರದಲ್ಲಿ ನೀಲಕಂಠೇಶ್ವರನ ನೂತನ ಶಿಲಾಮಯ ದೇಗುಲದಲ್ಲಿ ಶುಕ್ರವಾರ ಕುಂಭಾಭಿಷೇಕ ನೆರವೇರಿಸಿ ಅವರು ಮಾತನಾಡಿದರು.

ಪೂಜಾಮಂದಿರಗಳಲ್ಲಿ ಮಾತ್ರ ದೇವರಿದ್ದರೆ ಸಾಲದು. ನಮ್ಮ ಮನಸ್ಸಿನಲ್ಲೂ ದೇವರಿರಬೇಕು. ದೇವರು ನೆಲೆನಿಂತ ದೇವಸ್ಥಾನಗಳು ಪರಿಶುದ್ಧವಾಗಿರಬೇಕು ಮಾತ್ರವಲ್ಲ ಮನಸ್ಸು ಕೂಡ ಪರಿಶುದ್ಧವಾಗಿ ಇರಬೇಕು. ಬಾಹ್ಯ ಮತ್ತು ಅಂತರಂಗ ಶುದ್ಧಿ ಎರಡು ಅಗತ್ಯ. ಆಗ ಮಾತ್ರ ದೇವರು ದೇವಸ್ಥಾನ ಮತ್ತು ಮನಸ್ಸನ್ನು ತನ್ನ ಆವಾಸಸ್ಥಾನ ಮಾಡಿಕೊಳ್ಳುತ್ತಾನೆ. ನಾವು ಭಗವಂತನ ಆರಾಧನೆಯನ್ನು ಯಾರೊಬ್ಬರಿಗಾಗಿ ಮಾಡುವುದಲ್ಲ. ಆರಾಧನೆ ಮಾಡಿದರೆ ಲಾಭವೂ ನಮಗೆ, ಮಾಡದಿದ್ದರೆ ನಷ್ಟವೂ ನಮಗೆ. ಗುರುಗಳು ಬರುತ್ತಾರೆ ಎಂದಾಗ ಮಾತ್ರ ಶುದ್ಧವಾಗಿಡುವುದಲ್ಲ. ಸದಾಕಾಲ ಶುದ್ಧವಾಗಿರಬೇಕು ಎಂದರು.

ದೇವರು ಮತ್ತು ಪರವ್ಯಕ್ತಿಗಳಲ್ಲಿರುವ ಒಳ್ಳೆಯ ಗುಣಗಳನ್ನು ಅರಿತುಕೊಳ್ಳಬೇಕು. ಅದನ್ನು ಎಲ್ಲರಿಗೂ ಹೇಳಬೇಕು. ಆದರೆ ಕೆಟ್ಟಗುಣಗಳ ಕಡೆ ಗಮನ ನೀಡಬೇಕು. ಆದರೆ ಈಗಿನ ಸಮಾಜದಲ್ಲಿ ಒಳ್ಳೆಯ ಎಲ್ಲಾ ಕೆಲಸಗಳನ್ನು ಕೈಬಿಟ್ಟು. ಯಾವುದೋ ಒಂದು ಕೆಟ್ಟ ಕೆಲಸವನ್ನು ಹಿಡಿದು ನಿರಂತರವಾಗಿ ನಿಂದಿಸುವ ಕೆಲಸವಾಗುತ್ತಿದೆ. ಇದು ಒಳ್ಳೆಯ ಬೆಳವಣಿಗೆಯಲ್ಲ. ಈ ಚಿಂತನೆಯನ್ನು ಬದುಕಿನಲ್ಲಿ ಅಳವಡಿಸಿಕೊಳ್ಳಿ ಎಂದರು.

ಶೃಂಗೇರಿ ಪೀಠಕ್ಕೂ ಬಿದನೂರಿನ ನೀಲಕಂಠೇಶ್ವರ ದೇವಾಲಯಕ್ಕೂ ಅವಿನಾಭಾವ ಸಂಬಂಧವಿದೆ. ಇದಕ್ಕೆ ಸೇತುವಾಗಿ ಕಾರ್ಯನಿರ್ವಹಿಸಿದ ವೇದಮೂರ್ತಿ ವಿನಾಯಕ ಉಡುಪರು ಕಾರ್ಯ ನಿರ್ವಹಿಸಿದ್ದಾರೆ ಎಂದರು.

ಸಭಾ ಕಾರ್ಯಕ್ರಮದಲ್ಲಿ ಉತ್ಸವ ಕಾರ್ಯಕ್ರಮಕ್ಕೆ ಶ್ರಮದಾನದ ಮೂಲಕ ಸೇವೆ ಮಾಡಿದ ಮಧು ಕೆಸರೆಮನೆ, ಬಾಬು ಬಾಳೆಕೊಪ್ಪ, ಅಬ್ಬಾಸ್ ನೂಲಿಗ್ಗೇರಿ, ನಾಗರಾಜ ಭಂಡಾರಿ, ಕೃಷ್ಣದೇವಾಡಿಗ ಚೀಕಳಿ, ನಾಗರಾಜ ವಾಕೋಡು, ನಾಗರಾಜ ಭಟ್ ಕುಂದಗಲ್ ಸೇರಿ 150ಕ್ಕೂ ಹೆಚ್ಚು ಮಂದಿಯನ್ನು ಗೌರವಿಸಿದರು.

ಸ್ವಾಮೀಜಿ ಸಾನ್ನಿಧ್ಯದಲ್ಲಿ ಮಹಾರುದ್ರಯಾಗದ ಪೂರ್ಣಾಹುತಿ ನೆರವೇರಿತು. ಮಹಾರುದ್ರಯಾಗದ ಸೇವಾಕರ್ತ ರಂಗನಾಥ ಭಾಗವತರನ್ನು ಗೌರವಿಸಿ ಸನ್ಮಾನಿಸಿದರು.

ಸಭೆಯಲ್ಲಿ ವಸಂತ ಹೋಬಳಿದಾರ್ ಕುಟುಂಬ, ಗಿರಿಜಾ ಶಂಕರ್ ಚೆನ್ನೈ, ನೇರುಮಂಗಲ ವೆಂಕಟರಾಮನ್, ಶೃಂಗೇರಿ ಆಸ್ಥಾನ ವಿದ್ವಾನ್ ಶಂಕರ ಸ್ಥಪತಿ, ನೀಲಕಂಠೇಶ್ವರ ಜೀರ್ಣೋದ್ಧಾರ ಟ್ರಸ್ಟ್‌ನ ಹಾಜರಿದ್ದರು. ತಾಲ್ಲೂಕು ಪಂಚಾಯಿತಿ ಮಾಜಿ ಸದಸ್ಯ ಕೆ.ವಿ. ಕೃಷ್ಣಮೂರ್ತಿ, ವಸುಧಾ ಡಾ. ಚೈತನ್ಯ ಕಾರ್ಯಕ್ರಮ ನಿರ್ವಹಿಸಿದರು. ಕೊನೆಯಲ್ಲಿ ಭಕ್ತರಿಗೆ ವಿಧುಶೇಖರ ಭಾರತಿ ಸ್ವಾಮೀಜಿ ಆಶೀರ್ವಾದ ಪೂರಕ ಮಂತ್ರಾಕ್ಷತೆ ನೀಡಿ ಅನುಗ್ರಹಿಸಿದರು.