ಕೈದಿಗಳ ಮನ ಪರಿವರ್ತನೆ ಅಗತ್ಯ: ನ್ಯಾಯಾಧೀಶ ಪ್ರಕಾಶ್ ಎಲ್. ನಾಡಿಗೇರ್‌

7
ಮೈತ್ರಿ ಟ್ರಸ್ಟ್ ವತಿಯಿಂದ ಜಿಲ್ಲಾ ಕಾರಾಗೃಹದಲ್ಲಿ ಕಾರ್ಯಕ್ರಮ

ಕೈದಿಗಳ ಮನ ಪರಿವರ್ತನೆ ಅಗತ್ಯ: ನ್ಯಾಯಾಧೀಶ ಪ್ರಕಾಶ್ ಎಲ್. ನಾಡಿಗೇರ್‌

Published:
Updated:
Deccan Herald

ರಾಮನಗರ: ‘ಕೆಲವರು ಆಕಸ್ಮಿಕವಾಗಿ ಅಪರಾಧಿಗಳಾಗಿರುತ್ತಾರೆ. ಅಂತಹವರು ತಾಳ್ಮೆ ಕಳೆದುಕೊಳ್ಳದೇ ಮನಃ ಪರಿವರ್ತನೆ ಮಾಡಿಕೊಂಡು ಉತ್ತಮ ನಾಗರಿಕರಾಗಬೇಕು’ ಎಂದು ಪ್ರಧಾನ ಜಿಲ್ಲಾ ಮತ್ತು ಸೆಷನ್ಸ್‌ ನ್ಯಾಯಾಧೀಶ ಪ್ರಕಾಶ್ ಎಲ್. ನಾಡಿಗೇರ್‌ ಹೇಳಿದರು.

ಇಲ್ಲಿನ ಜಿಲ್ಲಾ ಕಾರಾಗೃಹದಲ್ಲಿ ಮೈತ್ರಿ ಸಾಮಾಜಿಕ ಮತ್ತು ಸಾಂಸ್ಕೃತಿಕ ಟ್ರಸ್ಟ್‌ ವತಿಯಿಂದ ಗುರುವಾರ ಹಮ್ಮಿಕೊಂಡಿದ್ದ ಬಂಧಿನಿವಾಸಿಗಳ ಮನಃ ಪರಿವರ್ತನೆ ಮತ್ತು ಸಾಂಸ್ಕೃತಿಕ ಕಾರ್ಯಕ್ರಮವನ್ನು ಉದ್ಘಾಟಿಸಿ ಅವರು ಮಾತನಾಡಿದರು. ಸಿಟ್ಟಿನಲ್ಲಿ ಶಕ್ತಿಯನ್ನು ಪ್ರಯೋಗಿಸದೆ, ಸೇಡಿಗೆ ಬುದ್ಧಿ ನೀಡದೆ ಸಮಾಜದ ಒಳಿತಿಗಾಗಿ ಕಾನೂನು ಪಾಲಿಸಬೇಕು ಎಂದು ತಿಳಿಸಿದರು.

‘ಯಾವುದೋ ಒಂದು ವಿಷಮ ಸ್ಥಿತಿಯಲ್ಲಿ ಅಪರಾಧ ಮಾಡಿ ಜೈಲು ಸೇರಿದ್ದೀರಿ. ಜೈಲಿನಲ್ಲಿದ್ದವರೆಲ್ಲ ಕೆಟ್ಟವರಲ್ಲ. ಆತ್ಮಶುದ್ಧಿ, ಒಳ್ಳೆಯ ನಡತೆವುಳ್ಳವರೂ ಇದ್ದಾರೆ. ನೀವು ಜೈಲಿನಿಂದ ಆಚೆ ಬರುತ್ತಿದ್ದಂತೆ ತಮ್ಮ ಕುಟುಂಬ, ಸಮಾಜ ಸೇರಿ ಉತ್ತಮ ಬದುಕು ರೂಪಿಸಿಕೊಳ್ಳಬೇಕು’ ಎಂದು ತಿಳಿಸಿದರು.

ಮೈಸೂರಿನ ಉರಿಗದ್ದುಗೆ ಪೆದ್ದಲಿಂಗೇಶ್ವರ ಮಠದ ಜ್ಞಾನಪ್ರಕಾಶ ಸ್ವಾಮೀಜಿ ಮಾತನಾಡಿ ಅಪರಾಧ ಎಸಗುವ ಮುನ್ನ ಆತ್ಮಾವಲೋಕನ ಮಾಡಿಕೊಳ್ಳಬೇಕು. ಕ್ಷಣದಲ್ಲಿನ ಸಿಟ್ಟು ಇಡೀ ಜೀವನವನ್ನೇ ಬಲಿತೆಗೆದುಕೊಳ್ಳುತ್ತದೆ ಎಂದು ತಿಳಿಸಿದರು.

ಕಾರಾಗೃಹಗಳಲ್ಲಿ ಯುವಕರೇ ಹೆಚ್ಚಿನ ಸಂಖ್ಯೆಯಲ್ಲಿರುವುದು ವಿಷಾದದ ಸಂಗತಿ. ಕುಟುಂಬಗಳೂ ಸಹ ನೋವನ್ನೂ ಅನುಭವಿಸುತ್ತವೆ. ಕೈದಿಗಳು ಮಾನಸಿಕವಾಗಿ ಬಳಲದೇ, ನೋವುಗಳನ್ನು ಮುಕ್ತವಾಗಿ ಹಂಚಿಕೊಳ್ಳಬೇಕು ಎಂದು ಅವರು ಹೇಳಿದರು.

ಯಾರೂ ಬೇಕೆಂತಲೇ ಕೈದಿಯಾಗಬೇಕೆಂದು ಬಯಸುವುದಿಲ್ಲ. ಸಿಟ್ಟಿನ ಭರದಲ್ಲಿ ತಾಳ್ಮೆ ಕಳೆದುಕೊಳ್ಳಬಾರದು ಎಂದು ತಿಳಿಸಿದರು.
ಇದೇ ಸಂದರ್ಭದಲ್ಲಿ ಗಾಯಕರಾದ ಬೇವೂರು ರಾಮಯ್ಯ, ಚೆಲ್ಲಯ್ಯ, ಸಿದ್ದರಾಮು, ಮಹದೇವು, ಅಂದಾನಯ್ಯ ಗೀತಗಾಯನ ಕಾರ್ಯಕ್ರಮ ನಡೆಸಿಕೊಟ್ಟರು.

ಜಿಲ್ಲಾ ಕಾನೂನು ಸೇವೆಗಳ ಪ್ರಾಧಿಕಾರದ ಸದಸ್ಯ ಕಾರ್ಯದರ್ಶಿ ಬಿ.ಎಸ್. ಹೊನ್ನಸ್ವಾಮಿ, ಜಿಲ್ಲಾ ಕಾರಾಗೃಹ ಅಧೀಕ್ಷಕ ಎಚ್.ಎಚ್್. ರಾಮಯ್ಯ, ಮುಖಂಡರಾದ ಈಶ್ವರ್, ಮಹಮದ್‌ ಹಿಶನ್‌ ಉಲ್ಲಾ ಖಾನ್, ಲಯನ್ಸ್ ಕ್ಲಬ್‌ ಅಧ್ಯಕ್ಷ ಸಾಹುಕಾರ್‌ ಅಂಜಾದ್‌, ಲಯನೆಸ್‌ ಕ್ಲಬ್‌ ಅಧ್ಯಕ್ಷೆ ಎಂ.ಎಸ್. ಲಾವಣ್ಯ, ಸರ್ವಧರ್ಮ ಸೇವಾ ಸಂಸ್ಥೆ ಅಧ್ಯಕ್ಷೆ ಜಯಮ್ಮ, ಅರ್ಪಿತಾ ಚಾರಿಟಬಲ್‌ ಟ್ರಸ್ಟಿನ ಎನ್‌.ವಿ. ಲೋಕೇಶ್, ಮೈತ್ರಿ ಸಾಮಾಜಿಕ ಮತ್ತು ಸಾಂಸ್ಕೃತಿಕ ಟ್ರಸ್ಟಿನ ಅಧ್ಯಕ್ಷ ಪುಟ್ಟಲಿಂಗಯ್ಯ ಇದ್ದರು.

ಟ್ರಸ್ಟಿನ ಕಾರ್ಯದರ್ಶಿ ಕೆ. ಶಾರದಾ ಸ್ವಾಗತಿಸಿದರು. ಜಿಲ್ಲಾ ಕಾರಾಗೃಹ ಅಧೀಕ್ಷಕ ಪಿ. ವಿಷಕಂಠಯ್ಯ ನಿರೂಪಿಸಿದರು. ಪ್ರಭಾಕರ್‌ ವಂದಿಸಿದರು.

* ಅಪರಾಧಿಗಳು ಘಟಿಸಿ ಹೋದ ಕಹಿ ಪ್ರಕರಣಗಳನ್ನು ಮರೆತು ಸದ್ವಿಚಾರ, ಸನ್ನಡತೆಗಳ ಮೂಲಕ ಮನಃ ಪರಿವರ್ತನೆ ಮಾಡಿಕೊಳ್ಳಬೇಕು
-ಜ್ಞಾನಪ್ರಕಾಶ ಸ್ವಾಮೀಜಿ, ಉರಿಗದ್ದುಗೆ ಪೆದ್ದಲಿಂಗೇಶ್ವರ ಮಠ

Tags: 

ಬರಹ ಇಷ್ಟವಾಯಿತೆ?

  • 1

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !