ದೇವಸ್ಥಾನಗಳಿಗೆ ₹ 28 ಕೋಟಿ ಬಿಡುಗಡೆ: ಶಶಿಕಲಾ ಜೊಲ್ಲೆ

ವಿಧಾನಪರಿಷತ್ ಸದಸ್ಯ ಸುನೀಲ್ ವಲ್ಯಾಪುರೆ ಅವರ ಪ್ರಶ್ನೆಗೆ ಲಿಖಿತ ಉತ್ತರ ನೀಡಿದ ಸಚಿವರು, ‘ದುರಸ್ತಿ, ಜೀರ್ಣೋದ್ಧಾರ, ನಿರ್ಮಾಣ, ಆರಾಧನಾ ಯೋಜನೆ, ಗಿರಿಜನ ಉಪ ಯೋಜನೆ, ತಸ್ತಿಕ್, ವರ್ಷಾಸನದ ಲೆಕ್ಕ ಶೀರ್ಷಿಕೆಗಳಡಿ ಕಲಬುರಗಿ ಜಿಲ್ಲೆಗೆ ₹ 18.42 ಕೋಟಿ ಹಾಗೂ ಯಾದಗಿರಿ ಜಿಲ್ಲೆಗೆ ₹ 9.71 ಕೋಟಿ ಬಿಡುಗಡೆ ಮಾಡಲಾಗಿದೆ’ ಎಂದರು.

‘ಕಲಬುರಗಿ ಜಿಲ್ಲೆಗೆ 2019–20ರಲ್ಲಿ ₹ 6.29 ಕೋಟಿ, 2020–21ರಲ್ಲಿ ₹ 7.70 ಕೋಟಿ ಹಾಗೂ 2021–22ರಲ್ಲಿ ₹ 4.42 ಕೋಟಿ ಬಿಡುಗಡೆಗೊಳಿಸಲಾಗಿದೆ. ಯಾದಗಿರಿ ಜಿಲ್ಲೆಯ ದೇವಸ್ಥಾನಗಳಿಗೆ ಕ್ರಮವಾಗಿ, ₹ 2.89 ಕೋಟಿ, ₹ 4.16 ಕೋಟಿ, ₹ 2.65 ಕೋಟಿ ನೀಡಲಾಗಿದೆ. ಹೊಸದಾಗಿ ಅನುದಾನ ಬಿಡುಗಡೆಗೆ ಕೋರಿ ಕಲಬುರಗಿ ಜಿಲ್ಲೆಯಲ್ಲಿ 12 ಪ್ರಸ್ತಾವನೆಗಳು ಹಾಗೂ ಯಾದಗಿರಿ ಜಿಲ್ಲೆಯಲ್ಲಿ 3 ಪ್ರಸ್ತಾವಗಳು ಸ್ವೀಕೃತವಾಗಿವೆ’ ಎಂದರು.

ಕಲಬುರಗಿ ಜಿಲ್ಲೆಯಲ್ಲಿ ಒಟ್ಟು 1630 ಹಾಗೂ ಯಾದಗಿರಿ ಜಿಲ್ಲೆಯಲ್ಲಿ 1212 ದೇವಸ್ಥಾನಗಳಿವೆ ಎಂದು ಮಾಹಿತಿ ನೀಡಿದರು.