550 ಗ್ರಾಂ ಚಿನ್ನಾಭರಣ, 1 ಕೆ.ಜಿ ಬೆಳ್ಳಿ ಆಭರಣ ವಶ

7
ಸೊಲ್ಲಾಪುರದಿಂದ ಕಾರಿನಲ್ಲಿ ಬರುತ್ತಿದ್ದ ಕಳ್ಳರು; 4 ಜನರ ಬಂಧನ

550 ಗ್ರಾಂ ಚಿನ್ನಾಭರಣ, 1 ಕೆ.ಜಿ ಬೆಳ್ಳಿ ಆಭರಣ ವಶ

Published:
Updated:
Deccan Herald

ಕಲಬುರ್ಗಿ: ಮನೆಗಳಿಗೆ ಬೀಗ ಹಾಕಿರುವ ಖಚಿತ ಮಾಹಿತಿ ಆಧರಿಸಿ ಸೊಲ್ಲಾಪುರದಿಂದ ಕಾರಿನಲ್ಲಿ ಬಂದು ಚಿನ್ನಾಭರಣ ಕಳವು ಮಾಡುತ್ತಿದ್ದ 4 ಜನ ಅಂತರರಾಜ್ಯ ಕಳ್ಳರನ್ನು ಬಂಧಿಸುವಲ್ಲಿ ಪೊಲೀಸರು ಯಶಸ್ವಿಯಾಗಿದ್ದಾರೆ.

ಸೊಲ್ಲಾಪುರದ ಹುಸೇನ್ ಅಲಿಯಾಸ್ ಸಾಗರ ದಾದಾ ಗಾಯಕವಾಡ, ಕಮಲಾಪುರದ ನಾಗರಾಜ, ಸೊಲ್ಲಾಪುರದ ಶ್ರೀಕಾಂತ ಸಿಂಧೆ, ಶಂಕರ ಜಾಧವ ಬಂಧಿತರು. 

ಇವರಿಂದ ₹18 ಲಕ್ಷ ಮೌಲ್ಯದ 550 ಗ್ರಾಂ ಚಿನ್ನಾಭರಣ, 1 ಕೆ.ಜಿ ಬೆಳ್ಳಿ ಆಭರಣ, ಕೃತ್ಯಕ್ಕೆ ಬಳಸಿದ್ದ ಕಾರು, 1 ಪಿಸ್ತೂಲ್, 9 ಗುಂಡುಗಳನ್ನು ವಶಪಡಿಸಿಕೊಳ್ಳಲಾಗಿದೆ.

ಶುಕ್ರವಾರ ಪತ್ರಿಕಾಗೋಷ್ಠಿಯಲ್ಲಿ ಈ ವಿಷಯ ತಿಳಿಸಿದ ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಎನ್.ಶಶಿಕುಮಾರ್, ‘ಕಮಲಾಪುರದ ನಾಗರಾಜ, ನಗರದ ಮಹಾಲಕ್ಷ್ಮಿ ಲೇಔಟ್‌ನಲ್ಲಿ ಬಾಡಿಗೆ ಮನೆಯಲ್ಲಿ ವಾಸವಿದ್ದ. ಪ್ರತಿಷ್ಠಿತ ಬಡಾವಣೆಗಳಲ್ಲಿ ಬೀಗ ಹಾಕಿರುವ ಮನೆಗಳನ್ನು ಗುರುತಿಸಿ, ಹುಸೇನ್‌ಗೆ ಮಾಹಿತಿ ನೀಡುತ್ತಿದ್ದ. ಹುಸೇನ್ ಸೊಲ್ಲಾಪುರದಿಂದ ಶ್ರೀಕಾಂತ ಮತ್ತು ಶಂಕರ ಅವರೊಂದಿಗೆ ಸಂಜೆ 4–5 ಗಂಟೆಗೆ ಕಾರಿನಲ್ಲಿ ಹೊರಟು ಕಲಬುರ್ಗಿಗೆ ಬರುತ್ತಿದ್ದ. ಆ ಬಳಿಕ ಎಲ್ಲರೂ ಸೇರಿ ಮದ್ಯ ಸೇವಿಸಿ, ಊಟ ಮಾಡಿ, ಬೆಳಗಿನ ಜಾವ 2–3 ಗಂಟೆಗೆ ಕಳ್ಳತನ ಮಾಡುತ್ತಿದ್ದರು’ ಎಂದರು.

‘ಆರೋಪಿಗಳ ಬಂಧನದಿಂದ ನಗರದ ವಿವಿಧ ಠಾಣೆಗಳಲ್ಲಿನ 16 ಪ್ರಕರಣಗಳು ಪತ್ತೆಯಾಗಿವೆ. ಒಂದು ತಿಂಗಳಲ್ಲಿ ಗ್ರಾಮೀಣ ಪೊಲೀಸ್ ಠಾಣೆ, ‘ಎ’ ಉಪ ವಿಭಾಗದಲ್ಲಿ ನಡೆದ ಹಲವಾರು ಕಳ್ಳತನ ಪ್ರಕರಣಗಳನ್ನು ಬೇಧಿಸಲಾಗಿದೆ. ಒಟ್ಟಾರೆ ₹50 ಲಕ್ಷಕ್ಕೂ ಅಧಿಕ ಮೌಲ್ಯದ ಚಿನ್ನಾಭರಣ ಮತ್ತು ಬೆಳ್ಳಿ ಆಭರಣಗಳನ್ನು ವಶಪಡಿಸಿಕೊಳ್ಳಲಾಗಿದೆ’ ಎಂದು ತಿಳಿಸಿದರು.

ಸಹಾಯಕ ಪೊಲೀಸ್ ವರಿಷ್ಠಾಧಿಕಾರಿ ಲೋಕೇಶ ಬಿ.ಜೆ.ನೇತೃತ್ವದಲ್ಲಿ ಡಿಸಿಐಬಿ ಇನ್‌ಸ್ಪೆಕ್ಟರ್ ಸೋಮಲಿಂಗ ಕಿರದಳ್ಳಿ, ಅಶೋಕ ನಗರ ಠಾಣೆ ಇನ್‌ಸ್ಪೆಕ್ಟರ್ ಕಪಿಲ್‌ದೇವ್, ಬ್ರಹ್ಮಪುರ ಠಾಣೆ ಇನ್‌ಸ್ಪೆಕ್ಟರ್ ಎಸ್.ಎಂ.ಯಾಳಗಿ, ಸ್ಟೇಷನ್ ಬಜಾರ್ ಠಾಣೆ ಇನ್‌ಸ್ಪೆಕ್ಟರ್ ಶಕೀಲ್ ಅಂಗಡಿ, ರಾಘವೇಂದ್ರ ನಗರ ಠಾಣೆ ಪೊಲೀಸ್ ಸಬ್‌ ಇನ್‌ಸ್ಪೆಕ್ಟರ್ ಅಕ್ಕಮಹಾದೇವಿ ಪತ್ತೆ ಕಾರ್ಯಾಚರಣೆಯಲ್ಲಿ ಪಾಲ್ಗೊಂಡಿದ್ದರು.

***

ಕಲಬುರ್ಗಿ: ಇಲ್ಲಿಯ ಗೋದುತಾಯಿ ನಗರದಲ್ಲಿರುವ ಸೋಮಶೇಖರ ಅಣ್ಣಾರಾವ ಅವರ ಮನೆಗೆ ನುಗ್ಗಿದ್ದ ಕಳ್ಳರು ಚಿನ್ನಾಭರಣದ ಜತೆ ಪಿಸ್ತೂಲ್ ಮತ್ತು 15 ಗುಂಡುಗಳನ್ನು ಕಳವು ಮಾಡಿದ್ದರು.

‘ಬೆಂಗಳೂರಿನಲ್ಲಿರುವ ನಿವೃತ್ತ ಉಪ ವಿಭಾಗಾಧಿಕಾರಿಯ ಸಂಬಂಧಿಕರು ಮನೆ ಇದಾಗಿದೆ. ಅವರು ಸುರಕ್ಷತೆ ದೃಷ್ಟಿಯಿಂದ ತಮಗೆ ಸೇರಿದ ಚಿನ್ನಾಭರಣ ಹಾಗೂ ಪಿಸ್ತೂಲ್ ಅನ್ನು ಇಲ್ಲಿಯೇ ಇಟ್ಟಿದ್ದರು. ಪಿಸ್ತೂಲ್ ಕದ್ದ ಬಳಿಕ ಹುಸೇನ್ ಅದರಲ್ಲಿದ್ದ 6 ಗುಂಡುಗಳನ್ನು ಹಾರಿಸಿ ಖಾಲಿ ಮಾಡಿದ್ದ’ ಎಂದು ಎನ್.ಶಶಿಕುಮಾರ್ ಮಾಹಿತಿ ನೀಡಿದರು.

ಮೂವರು ಹೆಂಡತಿಯರು, 7 ಜನ ಮಕ್ಕಳು

ಆರೋಪಿ ಹುಸೇನ್‌ಗೆ ಮೂರು ಜನ ಪತ್ನಿಯರು ಹಾಗೂ 7 ಜನ ಮಕ್ಕಳಿದ್ದಾರೆ. ಮೂರೂ ಜನ ಪತ್ನಿಯರಿಗೆ ಪ್ರತ್ಯೇಕವಾಗಿ ಐಷಾರಾಮಿ ಮನೆ ಮಾಡಿಕೊಟ್ಟಿದ್ದ. ನಶೆ ಪದಾರ್ಥಗಳ ಸೇವನೆ, ಗೋವಾ, ಮುಂಬೈ ಪ್ರವಾಸ ಈತನ ಹವ್ಯಾಸಗಳಾಗಿದ್ದವು.

2002ರಲ್ಲಿ ವಿಜಯಪುರದಲ್ಲಿ ವಾಹನವನ್ನು ಅಡ್ಡಗಟ್ಟಿ ದೊಡ್ಡ ಮೊತ್ತದ ನಗದು ಹಣವನ್ನು ದೋಚಿದ್ದ. ಸೊಲ್ಲಾಪುರದಲ್ಲಿ ಖೋಟಾ ನೋಟು ಚಲಾವಣೆ ಮಾಡುತ್ತಿದ್ದ ಎಂಬುದು ವಿಚಾರಣೆ ವೇಳೆ ತಿಳಿದು ಬಂದಿದೆ.

ಬರಹ ಇಷ್ಟವಾಯಿತೆ?

  • 1

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !