ಕಲಬುರ್ಗಿ ಜಿಲ್ಲೆಯಲ್ಲಿವೆ ಕೇವಲ 55 ಆಂಬುಲೆನ್ಸ್‌

ನಗರದಲ್ಲಿ ಕೇವಲ ನಾಲ್ಕು ಆಂಬುಲೆನ್ಸ್‌ ಮಾತ್ರ ಮೀಸಲಿಟ್ಟಿದ್ದು, ಇದರಲ್ಲಿ ಎರಡು ಜಿಮ್ಸ್‌ಗೆ ಇನ್ನೆರಡು ಆರೋಗ್ಯ ಮತ್ತು ಮತ್ತು ಕುಟುಂಬ ಕಲ್ಯಾಣ ಇಲಾಖೆಯ ಕೆಲಸಗಳಿಗೆ ಮೀಸಲಿಡಲಾಗಿದೆ.

ಸದ್ಯ (ಮಾರ್ಚ್‌ 24) ಜಿಲ್ಲೆಯಲ್ಲಿ ಕೋವಿಡ್‌–19 ಸೋಂಕಿತರು ಇಬ್ಬರು (ಮೃತಪಟ್ಟ ವ್ಯಕ್ತಿಯನ್ನೂ ಹೊರತುಪಡಿಸಿ) ಇದ್ದಾರೆ. ಮಂಗಳವಾರದ ಹೊತ್ತಿಗೆ ಒಟ್ಟು 47 ಶಂಕಿತರ ಮಾದರಿಗಳನ್ನು ಸಂಗ್ರಹಿಸಿಲಾಗಿದೆ. ಇದರಲ್ಲಿ 31 ನೆಗೆಟಿವ್‌ ಬಂದಿದ್ದು, ಉಳಿದವರ ವರದಿ ಬರಬೇಕು. ಜತೆಗೆ, ಪಾಸಿಟಿವ್‌ ಇರುವ ವ್ಯಕ್ತಿಗಳೊಂದಿಗೆ ನೇರ ಸಂಪರ್ಕಕ್ಕೆ ಬಂದವರ ಸಂಖ್ಯೆ 99ಕ್ಕೆ ಏರಿದೆ. ಆದರೆ, ಪರೋಕ್ಷ ಸಂಪರ್ಕಕ್ಕೆ ಬಂದವರ ಸಂಖ್ಯೆ ನಾಲ್ಕಂಕಿ ದಾಟಿದೆ. ಒಂದು ವೇಳೆ ಮಾರಿಯ ಪ್ರಭಾವ ಹೆಚ್ಚುತ್ತ ಸಾಗಿದರೆ ಈಗಿರುವ ಆಂಬುಲೆನ್ಸ್‌ಗಳು ಸಾಲುವುದಿಲ್ಲ ಎಂದೂ ಪರಿಣತರು ಈಗಾಗಲೇ ಎಚ್ಚರಿಕೆ ನೀಡಿದ್ದಾರೆ.

ಜಿಲ್ಲೆಯನ್ನು ಬಂದ್‌ ಮಾಡಿದ್ದರಿಂದ ಕಳೆದ 15 ದಿನಗಳಿಂದ ಅಪಘಾತ ಅಥವಾ ತುರ್ತು ಚಿಕಿತ್ಸೆಯಂಥ ಪ್ರಕರಣಗಳ ಸಂಖ್ಯೆ ಗಣನೀಯವಾಗಿ ಇಳಿದಿದೆ. ಬಹಳಷ್ಟು ಆಂಬುಲೆನ್ಸ್‌ಗಳನ್ನು ಕೊರೊನಾ ಶಂಕಿತರನ್ನು ಕರೆತರುವುದಕ್ಕಾಗಿಯೇ ಮೀಸಲಿಡಲಾಗಿದೆ.

ಜತೆಗೆ, ಜಿಲ್ಲೆಯಲ್ಲಿ ಆರೋಗ್ಯ ಇಲಾಖೆಯ ಸಿಬ್ಬಂದಿ ಕೊರತೆ ಎದುರಿಸುತ್ತಿಲ್ಲ ಎಂಬುದು ಸಮಾಧಾನಕರ ಸಂಗತಿ. ಇದರೊಂದಿಗೆ ಪ್ರತಿ ಆಂಬುಲೆನ್ಸ್‌ಗೂ ಒಬ್ಬ ಚಾಲಕ, ಒಬ್ಬ ತಜ್ಞವೈದ್ಯ, ಒಬ್ಬ ನರ್ಸ್‌ ಸೇರಿದಂತೆ ತಲಾ ಮೂವರು ಸಿಬ್ಬಂದಿಯನ್ನು ನೀಡಲಾಗಿದೆ.

ಖಾಸಗಿಯ ಆಸ್ಪತ್ರೆಗಳ ಬಳಿ 24 ಆಂಬುಲೆನ್ಸ್‌

ನಗರವೂ ಸೇರಿದಂತೆ ಜಿಲ್ಲೆಯಲ್ಲಿರುವ ಕೆಲವು ದೊಡ್ಡ ಖಾಸಗಿ ಆಸ್ಪತ್ರೆಗಳಲ್ಲಿ 24 ಆಂಬುಲೆನ್ಸ್‌ಗಳಿವೆ. ಕೊರೊನಾ ಶಂಕಿತರ ಸಂಖ್ಯೆ ಹೆಚ್ಚುತ್ತ ಸಾಗಿದರೆ; ಚಾಲಕರು ಹಾಗೂ ಸಿಬ್ಬಂದಿ ಸಮೇತವಾಗಿ ಖಾಸಗಿ ಆಂಬುಲೆನ್ಸ್‌ಗಳನ್ನೂ ಬಳಸಿಕೊಳ್ಳಲು ಅಧಿಕಾರಿಗಳು ಸಿದ್ಧತೆ ಮಾಡಿಕೊಂಡಿದ್ದಾರೆ.‌