ಚಿಂಚೋಳಿ: ಪಟ್ಟಣದ ಚಂದಾಪುರದಲ್ಲಿ ಕ್ರಿಸ್ಮಸ್ ಹಬ್ಬವನ್ನು ಸಂಭ್ರಮದಿಂದ ಶನಿವಾರ ಆಚರಿಸಲಾಯಿತು.
ಇಲ್ಲಿನ ಚಂದಾಪುರದ ಆಶ್ರಯ ಬಡಾವಣೆ ಬಳಿ ಐಪಿಸಿ ಚರ್ಚ್ ವತಿಯಿಂದ ಆಯೋಜಿಸಿದ ಕ್ರಿಸ್ಮಸ್ ಉತ್ಸವದಲ್ಲಿ ಗೋದಲಿ ನಿರ್ಮಿಸಿದ ಯೇಸು ಭಕ್ತರು, ಬಣ್ಣ ಬಣ್ಣದ ವಿದ್ಯುದ್ದೀಪಗಳಿಂದ ಅಲಂಕರಿಸಿ ಆರಾಧಿಸಿದರು.
ಸಾಂತಾಕ್ಲಾಸ್ ವೇಷಧಾರಿ ವ್ಯಕ್ತಿ ಪುಟ್ಟ ಮಕ್ಕಳ ಮಧ್ಯೆ ನಿಂತು ಕೈಬೀಸುತ್ತ ಕ್ರಿಸ್ಮಸ್ ಸಡಗರ ಹೆಚ್ಚಿಸಿದ್ದರು.ಪುಟ್ಟ ಮಕ್ಕಳು, ಯುವತಿಯರು ಹೊಸ ಬಟ್ಟೆ ಧರಿಸಿ ಕಾರ್ಯಕ್ರಮದಲ್ಲಿ ಪಾಲ್ಗೊಂಡು ಸಂಭ್ರಮಿಸಿದರು.
ಮಕ್ಕಳಿಗಾಗಿ ಏರ್ಪಡಿಸಿದ್ದ ವಿವಿಧ ಸ್ಪರ್ಧೆಗಳಲ್ಲಿ ವಿಜೇತರಾದವರಿಗೆ ಬಹುಮಾನ ವಿತರಿಸಲಾಯಿತು. ಕೇಕ್ ಕತ್ತರಿಸುವ ಮೂಲಕ ಪಾಸ್ಟರ್ ಚಂದ್ರಕಾಂತ ಮತ್ತು ಫಾದರ್ ಜಾರ್ಜ ಉದ್ಘಾಟಿಸಿದರು.
ಪುರಸಭೆ ಸದಸ್ಯೆ ಕವಿತಾ ಬಸವರಾ ಕಡಬೂರು, ಸಿಸ್ಟರ್ ನ್ಯಾನ್ಸಿ, ಪಾಸ್ಟರ್ ಸಂಪತಕುಮಾರ, ರಾಜಕುಮಾರ ಕೊಳ್ಳೂರು, ಲಾಲಪ್ಪ, ನಾಗಪ್ಪ ದೊಡ್ಮನಿ ಇದ್ದರು. ವಿವಿಧೆಡೆಯಿಂದ ಭಕ್ತರು ಆಗಮಿಸಿದ್ದರು.