ಕಲಬುರಗಿ: ಜಮೀನಿನ ಬಂಡಿ ದಾರಿ ಮತ್ತು ಅಕ್ರಮ ಸಂಬಂಧ ಹಿನ್ನೆಲೆಯಲ್ಲಿ ವ್ಯಕ್ತಿಯೊಬ್ಬರನ್ನು ಕೊಲೆ ಮಾಡಿದ ಆರೋಪ ಸಾಬೀತಾಗಿದ್ದರಿಂದ 1ನೇ ಹೆಚ್ಚುವರಿ ಮತ್ತು ಸೆಷನ್ಸ್ ನ್ಯಾಯಾಲಯವು ನಾಲ್ವರು ಅಪರಾಧಿಗಳಿಗೆ ಜೀವಾವಧಿ ಶಿಕ್ಷೆ ಹಾಗೂ ₹ 50 ಸಾವಿರ ದಂಡ ವಿಧಿಸಿದೆ.
ಅಫಜಲಪುರದ ಅಶೋಕ ನಗರ ನಿವಾಸಿ ಬಸವರಾಜ ಕಾಲೆಸಾಬ್ ಅವರ ಕೊಲೆ ಪ್ರಕರಣದಲ್ಲಿ ನಾಗೇಶ ಕಲ್ಲಹಿಪ್ಪರಗಿ (26), ಕಬೀರ್ ಸೊನ್ನ (35), ರಾಜು ಸೊನ್ನ (29) ಹಾಗೂ ಭೀಮಾಶಂಕರ ಕಲ್ಲಹಿಪ್ಪರಗಿ (28) ಶಿಕ್ಷೆಗೆ ಒಳಗಾದವರು.
2022ರ ಏಪ್ರಿಲ್ 11ರಂದು ಜಮೀನಿನ ಬಂಡಿ ಹಾದಿ ಹಾಗೂ ಮಹಿಳೆಯೊಂದಿಗಿನ ಅಕ್ರಮ ಸಂಬಂಧ ಹಿನ್ನೆಲೆಯಲ್ಲಿ ಹೊಲದಲ್ಲಿ ಮಲಗಿದ್ದ ಬಸವರಾಜ ಅವರನ್ನು ಈ ನಾಲ್ವರು ಮಾರಕಾಸ್ತ್ರಗಳಿಂದ ಹಲ್ಲೆ ಮಾಡಿ ಕೊಲೆ ಮಾಡಿದ್ದರು. ಈ ವೇಳೆ ಗಂಗಾಧರ ಗಾಯಗೊಂಡಿದ್ದರು. ಈ ಸಂಬಂಧ ಅಫಜಲಪುರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿತ್ತು.
ಸಿಪಿಐ ಜಗದೇವಪ್ಪ ಪಾಳ ಅವರು ತನಿಖೆ ಮಾಡಿ, ನ್ಯಾಯಾಲಯಕ್ಕೆ ದೋಷಾರೋಪ ಪಟ್ಟಿ ಸಲ್ಲಿಕೆ ಮಾಡಿದ್ದರು.
ವಾದ–ವಿವಾದ ಆಲಿಸಿದ 1ನೇ ಹೆಚ್ಚುವರಿ ಮತ್ತು ಸೆಷನ್ಸ್ ನ್ಯಾಯಾಲಯದ ನ್ಯಾಯಾಧೀಶ ಎ.ವಿ. ಶ್ರೀನಾಥ ಅವರು ನಾಗೇಶ, ಕಬೀರ್, ರಾಜು ಹಾಗೂ ಭೀಮಾಶಂಕರಗೆ ಕಲಂ 302 ಅಡಿ ಜೀವಾವಧಿ ಶಿಕ್ಷೆ ಮತ್ತು ನಾಲ್ವರಿಗೆ ₹50 ಸಾವಿರ ದಂಡ ಹಾಗೂ ಕಲಂ 307 ಅಡಿ ತಲಾ ₹25 ಸಾವಿರ ದಂಡ ವಿಧಿಸಿ ಆದೇಶ ಹೊರಡಿಸಿದ್ದಾರೆ. ದಂಡದ ಹಣವನ್ನು ಘಟನೆಯಲ್ಲಿ ಗಾಯಗೊಂಡಿದ್ದ ಗಂಗಾಧರ ಅವರಿಗೆ ಪರಿಹಾರವಾಗಿ ನೀಡುವಂತೆ ಸೂಚಿಸಿದ್ದಾರೆ.
ರಾಜ್ಯ ಸರ್ಕಾರದ ಪರವಾಗಿ ಸರ್ಕಾರಿ ಅಭಿಯೋಜಕ ಎಸ್‌.ಆರ್‌. ನರಸಿಂಹಲು ವಾದ ಮಂಡಿಸಿದ್ದರು.
