ಜನತಾ ಕರ್ಫ್ಯೂ: ಕಲಬುರ್ಗಿ ಜಿಲ್ಲೆ ಪೂರ್ಣ ಸ್ತಬ್ದ

ರೈಲುಗಳು, ಬಸ್ಸುಗಳು, ಆಟೊಗಳು ತಮ್ಮ ಸೇವೆಯನ್ನು ಸ್ಥಗಿತಗೊಳಿಸಿದ್ದವು. ಹೀಗಾಗಿ, ‘ಜನತಾ ಕರ್ಫ್ಯೂ’ ಮಾಹಿತಿ ಇರದೇ ನಗರಕ್ಕೆ ಬಂದಿದ್ದ ಕೆಲ ಸಾರ್ವಜನಿಕರು ಬಸ್‌ ಇಲ್ಲದೇ ಪರದಾಡಬೇಕಾಯಿತು. ಇಡೀ ನಗರ ಸ್ತಬ್ದಗೊಂಡಿದ್ದರಿಂದಾಗಿ ರಸ್ತೆ ಬದಿಯಲ್ಲಿದ್ದ ಭಿಕ್ಷುಕರಿಗೂ ಹನಿ ನೀರು ಸಹ ಸಿಗದಂತಾಯಿತು.

ಕಳೆದ ಒಂದು ವಾರದಿಂದ ನಗರದಲ್ಲಿ ಅಘೋಷಿತ ಬಂದ್‌ ವಾತಾವರಣ ಇತ್ತಾದರೂ ದಿನಸಿ ಅಂಗಡಿ, ಪೆಟ್ರೋಲ್‌ ಪಂಪ್‌, ಔಷಧಿ ಅಂಗಡಿ ಹಾಗೂ ಹಣ್ಣಿನ ಮಾರಾಟ ಮಳಿಗೆಗಳು ತೆರೆದಿದ್ದವು. ಆದರೆ, ಭಾನುವಾರ ಇವೆಲ್ಲವೂ ಮುಚ್ಚಿದ್ದವು. ಹೀಗಾಗಿ ರೂಮ್‌ ಮಾಡಿಕೊಂಡಿರುವ ಯುವಕ–ಯುವತಿಯರು, ಊಟಕ್ಕಾಗಿ ಹೋಟೆಲ್‌, ಖಾನಾವಳಿಗಳನ್ನೇ ನೆಚ್ಚಿಕೊಂಡಿದ್ದವರು ಊಟಕ್ಕಾಗಿ ಪರದಾಡಬೇಕಾಯಿತು.

ನಗರದ ಜನನಿಬಿಡ ಸೂಪರ್‌ ಮಾರ್ಕೆಟ್, ಜಗತ್ ಸರ್ಕಲ್, ಎಸ್‌ವಿಪಿ ಸರ್ಕಲ್, ಬಸ್‌ ನಿಲ್ದಾಣ, ರೈಲು ನಿಲ್ದಾಣ, ಸೇಡಂ ರಸ್ತೆಯಲ್ಲಿರುವ ಖರ್ಗೆ ಪೆಟ್ರೋಲ್‌ ಪಂಪ್‌ ಬಳಿ ಜನರು ಸುಳಿಯಲಿಲ್ಲ. ಕುತೂಹಲದಿಂದ ನಗರ ಸುತ್ತುವ ಯುವಕರನ್ನು ಅಲ್ಲಲ್ಲಿ ನಿಂತಿದ್ದ ಪೊಲೀಸರು ಹಾಗೂ ಮಹಾನಗರ ಪಾಲಿಕೆ ಸಿಬ್ಬಂದಿ ಮನೆಗೆ ನಡೆಯುವಂತೆ ತಾಕೀತು ಮಾಡಿ ಕಳಿಸಿದರು.

ಮತ್ತೆ ಮೂರು ದಿನ ನಿಷೇಧಾಜ್ಞೆ: ಜಿಲ್ಲೆಯಾದ್ಯಂತ ಮತ್ತೆ ಮೂರು ದಿನ ನಿಷೇಧಾಜ್ಞೆ ವಿಸ್ತರಿಸಿ ಜಿಲ್ಲಾಧಿಕಾರಿ ಶರತ್ ಬಿ. ಆದೇಶ ಹೊರಡಿಸಿದ್ದಾರೆ. ಮಾರ್ಚ್‌ 19ರಿಂದ ಮೂರು ದಿನ ನಿಷೇಧಾಜ್ಞೆ ವಿಧಿಸಲಾಗಿತ್ತು. ಕೊರೊನಾ ಸೋಂಕು ಹರಡಬಾರದು ಎಂಬ ಮುನ್ನೆಚ್ಚರಿಕೆ ಕ್ರಮವಾಗಿ ಮತ್ತೆ ಮಾ 25ರವರೆಗೆ ನಿಷೇಧಾಜ್ಞೆಯನ್ನು ವಿಸ್ತರಿಸಲಾಗಿದೆ.

ದೇಶದಲ್ಲಿ ಮೊದಲ ಬಾರಿಗೆ ಕೋವಿಡ್‌ 19 ಸೋಂಕಿನಿಂದ ಮೃತಪಟ್ಟ ನಗರದ ಮೊಹ್ಮದ್ ಹುಸೇನ್‌ ಸಿದ್ದಿಕಿ (76) ಹಾಗೂ ಇದೀಗ ಕೊರೊನಾ ಸೋಂಕಿನಿಂದಾಗಿ ಆಸ್ಪತ್ರೆಯಲ್ಲಿ ನಿಗಾದಲ್ಲಿರುವ ಮೃತ ಸಿದ್ದಿಕಿ ಅವರ ಕುಟುಂಬ ವೈದ್ಯನ ಮನೆ ಇರುವ ಬಡಾವಣೆಯ ರಸ್ತೆಗೆ ಪೊಲೀಸರು ಬ್ಯಾರಿಕೇಡ್ ಹಾಕಿ ಬಂದ್‌ ಮಾಡಿದ್ದರು.

ನಗರದ ವಿವಿಧ ಮಸೀದಿ, ದರ್ಗಾಗಳಲ್ಲಿ ನಮಾಜ್‌ ನಡೆಯಿತಾದರೂ ಭಾಗವಹಿಸಿದವರ ಸಂಖ್ಯೆ ಗಣನೀಯವಾಗಿ ಇಳಿಕೆಯಾಗಿತ್ತು.

ಜಿಲ್ಲೆಯ ಸೇಡಂ, ಚಿಂಚೋಳಿ, ಕಮಲಾಪುರ, ಆಳಂದ, ಅಫಜಲಪುರ, ಜೇವರ್ಗಿ, ಕಾಳಗಿ, ಶಹಾಬಾದ್‌, ಚಿತ್ತಾಪುರ ತಾಲ್ಲೂಕಿನಲ್ಲಿಯೂ ಜನತಾ ಕರ್ಫ್ಯೂಗೆ ವ್ಯಾಪಕ ಸ್ಪಂದನೆ ದೊರೆಯಿತು.