ಕಲಬುರ್ಗಿ ಜಿಲ್ಲೆಯಲ್ಲಿ ಧಾರಾಕಾರ ಮಳೆ; ಸ್ಥಳೀಯರಲ್ಲಿ ಮತ್ತೆ ಆತಂಕ

ಕಲಬುರ್ಗಿ: ಕಳೆದ ಬಾರಿ ಕಲಬುರ್ಗಿ ನಗರದಲ್ಲಿ ರಾತ್ರಿಯಿಡೀ ಮಳೆಯಾದಾಗ ಮನೆಯೊಳಗೆ ನೀರು ನುಗ್ಗಿತ್ತು. ರಸ್ತೆಗಳಲ್ಲಿ ನೀರು ಸಂಗ್ರಹಗೊಂಡು ವಾಹನಗಳಲ್ಲಿ ಸಂಚರಿಸುವುದೇ ಕಷ್ಟವಾಗಿತ್ತು. ಪುನಃ ಅಂಥದ್ದೇ ಸ್ಥಿತಿ ಬರುವುದೆ ಎಂಬ ಆತಂಕ ನಗರದ ಜನರಲ್ಲಿ ಕಾಡುತ್ತಿದೆ. ಭಾನುವಾರ ಮಧ್ಯಾಹ್ನ ದಿಢೀರ್ ಮಳೆಯಾಗಿದ್ದು ಕಂಡು ಜನರು ಹೀಗೆ ಕಳವಳ ವ್ಯಕ್ತಪಡಿಸಿದರು.

ಮಳೆಯಿಂದ ಕೆಲ ಕೊಳಚೆ ಪ್ರದೇಶಗಳು ಜಲಾವೃತಗೊಂಡಿದ್ದವು. ಹಳೆಯ ಜೇವರ್ಗಿ ರಸ್ತೆಯ ಕೆಲ ಬಡಾವಣೆಗಳು, ಭಾಗ್ಯವಂತಿ ನಗರ, ಹೀರಾಪುರದ ಸುತ್ತಮುತ್ತಲೂ ಜನರ ಜೀವನ ಇನ್ನೂ ಸಹಜ ಸ್ಥಿತಿಗೆ ಬಂದಿಲ್ಲ. ಇದರ ಮಧ್ಯೆ ಮತ್ತೆ ಮಳೆಯಾಗುತ್ತಿದೆ.

ಸುರಿಯುತ್ತಿರುವ ಮಳೆಯಲ್ಲೇ ಕೆಲವರು ಓಡಾಡಿದರೆ, ಕೆಲವರು ಅಂಗಡಿಗಳ ಬಳಿ ಆಶ್ರಯ ಪಡೆದರು.