ಸೇಡಂ: ಕಲಿಕೆಗೆ ಪೂರಕ ಈ ವಸತಿ ಶಾಲೆ!

ಗ್ರಾಮದ ಹೊರವಲಯದಲ್ಲಿ 13 ಎಕರೆ ಪ್ರದೇಶದಲ್ಲಿ ₹ 17 ಕೋಟಿ ವೆಚ್ಚದಲ್ಲಿ ನಿರ್ಮಿಸಿರುವ ಮೊರಾರ್ಜಿ ದೇಸಾಯಿ ವಸತಿ ಶಾಲೆಯ ಕಟ್ಟಡವು ಕಳೆದ ಎರಡು ವರ್ಷಗಳ ಹಿಂದೆ ನಿರ್ಮಾಣವಾಗಿದ್ದು, ವಿದ್ಯಾರ್ಥಿಗಳನ್ನು ಆಕರ್ಷಿಸುತ್ತಿದೆ.

ವಸತಿ ಶಾಲೆಯಲ್ಲಿ ಗ್ರಂಥಾಲಯ, ತರಗತಿ ಕೋಣೆಗಳು-5, ಕಂಪ್ಯೂಟರ್-1, ವಿಜ್ಞಾನ ಮತ್ತು ಗಣಿತ ಪ್ರಯೋಗಾಲಯ-2, ಸಂಗ್ರಹ ಕೋಣೆ-1, ಪ್ರಾಚಾರ್ಯರ ಕೋಣೆ-1, ಸಿಬ್ಬಂದಿ-1, ಕಚೇರಿ-1, ಯೋಗಾ ತರಗತಿ ಕೋಣೆ ಸೇರಿ ಒಟ್ಟು 14 ಕೋಣೆಗಳ ಕಲಿಕಾ ಕಟ್ಟಡವಿದ್ದು, ಆಟದ ಮೈದಾನ ಬಹಳ ವಿಸ್ತಾರವಾಗಿದೆ.

ಅಲ್ಲದೇ ವಿದ್ಯಾರ್ಥಿಗಳ ವಸತಿಗಾಗಿ ಪ್ರತಿ ಕೋಣೆಯಲ್ಲಿ 15 ವಿದ್ಯಾರ್ಥಿಗಳಂತೆ ವಿದ್ಯಾರ್ಥಿನಿಯರಿಗಾಗಿ 9, ವಿದ್ಯಾರ್ಥಿ ಗಳಿಗೆ 9 ಕೋಣೆಗಳಿವೆ. ಅಲ್ಲದೇ 250 ವಿದ್ಯಾರ್ಥಿಗಳು ಕುಳಿತು ಊಟ ಮಾಡುವ ಬೃಹತ್ ಊಟದ ಸಭಾಂಗಣವಿದೆ. ಜತೆಗೆ ಶಿಕ್ಷಕರ ವಸತಿಗೆ 8 ಕೋಣೆಗಳಿದ್ದು, ಬೋಧಕೇತರ ಸಿಬ್ಬಂದಿಗಳು ತಂಗಲು ಕೊಠಡಿ ವ್ಯವಸ್ಥೆಯಿದೆ. ಸುಂದರವಾದ ವಾತಾವರಣದಲ್ಲಿ ಶಾಲಾ ಕಟ್ಟಡ ನಿರ್ಮಾಣವಾಗಿದೆ. ಈಗ ತೊಂದರೆ ಇಲ್ಲ’ ಎನ್ನುತ್ತಾರೆ ಅಲ್ಲಿನ ಶಿಕ್ಷಕ ಬಸವರಾಜ ಮದರಕಿ ಮತ್ತು ನಿಲಯ ಪಾಲಕ ಕೇಶವ ನಾಯಕ.

‘ಸದ್ಯ ಬಾಡಿಗೆ ಕಟ್ಟಡದಿಂದ ಮುಕ್ತಿ ದೊರೆತಿದ್ದು, ಸಮಸ್ಯೆಗಳಿಂದ ದೂರವಿದ್ದೇವೆ. ಆದರೆ ವಿದ್ಯಾರ್ಥಿಗಳಿಗೆ ಕುಳಿತುಕೊಳ್ಳಲು ಬೆಂಚ್‌ ಹಾಕಿಕೊಟ್ಟರೆ ಅನುಕೂಲವಾಗುತ್ತದೆ’ ಎಂದು ಶಾಲೆಯ ಪ್ರಾಚಾರ್ಯ ಸುರೇಶ ಅಲ್ದರ್ತಿ ತಿಳಿಸಿದರು.

‘ಈ ಹಿಂದೆ ಈ ವಸತಿ ಶಾಲೆಯನ್ನು ಖಾಸಗಿ ಕಟ್ಟಡವೊಂದರಲ್ಲಿ ನಡೆಸಲಾಗು ತ್ತಿತ್ತು. ಅಲ್ಲಿ ಸ್ಥಳದ ಸಮಸ್ಯೆ, ಕೋಣೆಗಳ ಸಮಸ್ಯೆ ಸೇರಿದಂತೆ ವಿದ್ಯಾರ್ಥಿಗಳ ಓದಿಗೆ ಅನೇಕ ತೊಂದರೆಗಳಿದ್ದವು. ಆದರೆ ಈಗ ಆಡಕಿ ಗ್ರಾಮದ ಹೊರವಲಯದಲ್ಲಿ ಸುಸಜ್ಜಿತ ಕಟ್ಟಡ ನಿರ್ಮಾಣ ಆಗಿರುವುದರಿಂದ ವಿದ್ಯಾರ್ಥಿಗಳ ಕಲಿಕೆಗೆ ಅನುಕೂಲ ವಾಗಿದೆ’ ಎಂದು ಪಾಲಕ ಅಶೋಕ ಫಿರಂಗಿ ತಿಳಿಸಿದರು.

ಶಾಲೆಗೆ ಒಟ್ಟು 13 ಹುದ್ದೆಗಳು ಮಂಜೂರಾಗಿದ್ದು, ಅವುಗಳಲ್ಲಿ 12 ಭರ್ತಿಯಾಗಿವೆ. ಇಂಗ್ಲಿಷ್‌ ಶಿಕ್ಷಕರ ಕೊರತೆಯಿದ್ದು, ಅತಿಥಿ ಶಿಕ್ಷಕರ ನೇಮಕ ಮಾಡಿಕೊಳ್ಳಲಾಗಿದೆ. ‘ವಿದ್ಯುತ್, ನೀರಿನ, ಮೈದಾನ ಸೇರಿ ಯಾವುದೇ ತೊಂದರೆಯಿಲ್ಲ. ಆದರೆ ಶಾಲೆಗೆ ಬರಲು ಕಾಂಕ್ರಿಟ್‌ ರಸ್ತೆ ಮತ್ತು ಕುಳಿತುಕೊಳ್ಳಲು ಬೆಂಚ್ ಬೇಕು’ ಎನ್ನುವುದು ವಿದ್ಯಾರ್ಥಿಗಳ ಒತ್ತಾಯವಾಗಿದೆ.