ಕಲಬುರಗಿ: ಸುದ್ದಿ ಸ್ವಾರಸ್ಯ ಹೊತ್ತು ತರುವ ಸೇನಾನಿಗಳು

ಸೂರ್ಯನ ಕಿರಣಗಳು ಭೂಮಿಗೆ ಮುತ್ತಿಕ್ಕುವ ಮೊದಲೇ ಪತ್ರಿಕಾ ವಿತರಕರು ಕಾಯಕಕ್ಕೆ ಹಾಜರಾಗುತ್ತಾರೆ. ಮುದ್ರಣಾಲಯದಲ್ಲಿ ಸಿದ್ಧಗೊಂಡು ಪತ್ರಿಕೆಗಳ ಬಂಡಲ್‌ಗಳನ್ನು ಮುಂಜಾನೆ 3, 4 ಗಂಟೆಗೆ ಬಸ್ ನಿಲ್ದಾಣ, ರೈಲು ನಿಲ್ದಾಣ, ಅಂಗಡಿ–ಮುಂಗಟ್ಟುಗಳು, ಪ್ರಮುಖ ವೃತ್ತಗಳ ಬೀದಿ ದೀಪಗಳ ಕೆಳಗೆ ಇಳಿಸಿಕೊಳ್ಳುತ್ತಾರೆ.

ಹಂಚಿಕೆ ಮಾಡುವ ಮನೆ, ಕಚೇರಿ, ಸಂಸ್ಥೆಗಳ ವಿಳಾಸದ ಅನುಸಾರ ಪತ್ರಿಕೆಗಳನ್ನು ಒಪ್ಪವಾಗಿ ಜೋಡಿಸಿಕೊಂಡು ಸೈಕಲ್, ಬೈಕ್‌ಗಳ ಮೇಲೆ ಇರಿಸಿಕೊಳ್ಳುತ್ತಾರೆ. ಓದುಗರು ನಿದ್ರೆಯಿಂದ ಮೇಲೇಳುವ ಮೊದಲೇ ಅವರ ಮನೆ ಬಾಗಿಲಿಗೆ ‘ರಪ್’ ಎಂಬ ಶಬ್ದದೊಂದಿಗೆ ಪತ್ರಿಕೆ ಹಾಕಿ ಸೇನಾನಿಗಳಂತೆ ಅಚ್ಚುಕಟ್ಟಾಗಿ ತಮ್ಮ ವಿತರಣಾ ಕೆಲಸವನ್ನು ಪೂರ್ಣಗೊಳಿಸುತ್ತಾರೆ.

ಮುಂಜಾನೆಯ ಧಾವಂತದಲ್ಲಿ ಪತ್ರಿಕಾ ವಿತರಕರು ನಡೆಸುವ ಒಂದೆರಡು ಗಂಟೆಗಳ ಕೆಲಸ ಓದುಗರ ಜ್ಞಾನವೃದ್ಧಿಗೆ ಭೂಮಿಕೆಯಾಗುತ್ತಿದೆ. ನಿತ್ಯದ ನೈಜ ಸಂಗತಿಗಳನ್ನು ಹೊತ್ತು ಮನೆ– ಮನೆಗೆ ತಲುಪಿಸಿ ಓದುಗರು ಹಾಗೂ ದಿನ ಪತ್ರಿಕೆಗಳ ಮೆಚ್ಚುಗೆಗೆ ಪಾತ್ರರಾಗಿದ್ದಾರೆ. 

ಪತ್ರಿಕಾ ವಿತರಣೆ ಅನೇಕ ಯುವಕರಿಗೆ ಬದುಕಿನ ಪಾಠವನ್ನು ಕಲಿಸಿದೆ. ಹಿರಿಯರಿಗೆ ಕುಟುಂಬ ನಿರ್ವಹಣೆಗೆ ನೆರವಾಗಿದೆ. ಪತ್ರಿಕೆಯನ್ನು ಹಂಚುತ್ತಲೇ ಶಿಕ್ಷಣ ಪಡೆದು, ನಗರದಲ್ಲಿನ ಸಣ್ಣ–ಪುಟ್ಟ ಖರ್ಚುಗಳನ್ನು ನಿಭಾಯಿಸಿಕೊಂಡು ಉನ್ನತ ಹುದ್ದೆಗಳಿಗೆ ಏರಿದವರು ಸಾಕಷ್ಟು ಜನರಿದ್ದಾರೆ.

ಸುದ್ದಿಯ ಸ್ವಾರಸ್ಯವನ್ನು ಹೊತ್ತು ಸೈಕಲ್‌ಗಳ ಮೇಲೆ ಹೊರಟ ವಿತರಕರಿಗೆ ಹತ್ತಾರು ಸಮಸ್ಯೆಗಳು ಎದುರಾಗುತ್ತವೆ. ಬಹುತೇಕ ಕಡೆ ಬೀದಿ ನಾಯಿಗಳು ಎದುರಾಗುತ್ತವೆ. ಅಟ್ಟಿಸಿಕೊಂಡು ಬಂದಾಗ ಧಾವಂತದಲ್ಲಿ ಬಿದ್ದು ಗಾಯಗೊಂಡ, ಕಚ್ಚಿಸಿಕೊಂಡ ನಿದರ್ಶನಗಳೂ ಇವೆ. ಮಳೆಯಲ್ಲಿ ತೊಯ್ದು, ಸಮಯಕ್ಕೆ ಸರಿಯಾಗಿ ಪತ್ರಿಕೆ ಕೈಗೆ ಸಿಗದೆ ಇದ್ದಾಗ ಓದುಗರ ಕೋಪಕ್ಕೆ ತುತ್ತಾಗುವುದು ಅವರಿಗೆ ಸಹಜವಾಗಿದೆ.

ಯುಗಾದಿ, ಗಣೇಶ ಚತುರ್ಥಿ, ಆಯುಧ ಪೂಜೆ ಮತ್ತು ದೀಪಾವಳಿ ಹಬ್ಬಗಳನ್ನು ಹೊರತುಪಡಿಸಿ ಉಳಿದ ಎಲ್ಲ ದಿನಗಳಲ್ಲಿ ವೃತ್ತಿಪರತೆಯ ಜತೆಗೆ ಕಾರ್ಯತತ್ಪರತೆ ತೋರುವ ಪತ್ರಿಕಾ ವಿತರಕರಿಗೆ ಸೆಪ್ಟೆಂಬರ್ 4ರ ‘ವಿಶ್ವ ದಿನಪತ್ರಿಕಾ ವಿತರಕರ ದಿನಾಚರಣೆ’ಯಂದು ಧನ್ಯವಾದ ಸಲ್ಲಿಸೋಣ.