ಸನ್ನತಿ ಶಾಲಾ ಕಟ್ಟಡ ಶಿಥಿಲ: ಮರದ ನೆರಳಲ್ಲಿ ಮಕ್ಕಳಿಗೆ ಪಾಠ, ಮಳೆ ಬಂದರೆ ರಜೆ

ಶಾಲೆಯ ಏಳು ಕೊಠಡಿಗಳಲ್ಲಿ 1ರಿಂದ 8ರವರೆಗೆ ತರಗತಿಗಳು ನಡೆಯು ತ್ತಿದ್ದು, 280ಕ್ಕೂ ಅಧಿಕ ವಿದ್ಯಾರ್ಥಿಗಳು ದಾಖಲಾತಿ ಪಡೆದಿದ್ಧಾರೆ. ಆದರೆ ಶಾಲಾ ಕೋಣೆಗಳು ಸುಸ್ಥಿತಿಯಲ್ಲಿ ಇರದ ಕಾರಣ ಮಕ್ಕಳ ಕಲಿಕಾಭ್ಯಾಸಕ್ಕೆ ತೀವ್ರ ಹಿನ್ನಡೆಯಾಗಿದೆ. ಏಳು ಕೋಣೆಗಳ ಪೈಕಿ ನಾಲ್ಕು ಕೋಣೆಗಳು ಸಂಪೂರ್ಣ ಹಾಳಾಗಿದ್ದು, ಈ ಕೋಣೆಗಳಲ್ಲಿ ಕುಳಿತುಕೊಳ್ಳಲು ಯೋಗ್ಯವಾಗಿಲ್ಲ. ಉಳಿದ ಮೂರು ಕೋಣೆಗಳಲ್ಲಿ ಒಂದು ಬಿಸಿಯೂಟಕ್ಕೆ ಬಳಕೆಯಾದರೆ ಇನ್ನೊಂದು ಕಚೇರಿ ನಿರ್ವಹಣೆಗೆ ಬಳಕೆಯಾಗುತ್ತಿದೆ.

ಶಾಲೆಯ ಕೋಣೆಗಳ ಮೇಲ್ಚಾವಣಿ ಸಿಮೆಂಟ್ ಕಿತ್ತು ಬೀಳುತ್ತಿದೆ. ಗೋಡೆಗಳು ಬಿರುಕು ಬಿಟ್ಟಿವೆ. ಮಳೆ ಬಂದರೆ ಶಾಲಾ ಕೋಣೆಗಳು ಸೋರುವುದರಿಂದ ಪಾಠಕ್ಕೆ ಪೂರ್ಣವಿರಾಮ ಹೇಳುವ ದುಸ್ಥಿತಿ ತಲೆದೂರಿದೆ. ವಿದ್ಯಾರ್ಥಿಗಳು ಸಂಪೂರ್ಣ ಹಾಳಾದ ಕೋಣೆಗಳಲ್ಲೇ ಭಯದ ನಡುವೆ ಪಾಠ ಕೇಳುವಂತಾಗಿದೆ. ಶಾಲಾ ಕೋಣೆಗಳ ಸಮಸ್ಯೆ ಪರಿಹರಿಸಿ ಮಕ್ಕಳ ಅಭ್ಯಾಸಕ್ಕೆ ಅನುಕೂಲ ಮಾಡಿಕೊಡಬೇಕು ಎಂಬ ಗ್ರಾಮಸ್ಥರು ಒತ್ತಾಯಿಸಿದ್ದಾರೆ.

ಮೇಲ್ಚಾವಣಿಯ ಸಿಮೆಂಟ್ ಪದೇ ಪದೇ ಕಳಚಿ ಬೀಳುತ್ತಿದ್ದು, ಮಕ್ಕಳನ್ನು ಕೋಣೆಯೋಳಗೆ ಕೂಡಿಸಲು ಶಿಕ್ಷಕರು ಹೆದರುತ್ತಿದ್ದಾರೆ. ಮಳೆ ಬಂದರೆ ಮೇಲ್ಚಾವಣಿ ಮೂಲಕ ಕೋಣೆಯೊಳಗೆ ನೀರು ತೊಟ್ಟಿಕ್ಕುತ್ತದೆ. ಹೀಗಾಗಿ ಮಳೆ ಬಂದರೆ ಪಾಠಗಳಿಗೆ ಪೂರ್ಣ ವಿರಾಮ ಹೇಳುವುದು ಅನಿವಾರ್ಯವಾಗಿದೆ. ಈಚೆಗೆ ನಿರ್ಮಿಸಿದ ಎರಡು ಕೋಣೆಗಳು ಸಹ ಕಳಪೆ ಕಾಮಗಾರಿಯಿಂದ ಸುಸ್ಥಿತಿ ಯಲ್ಲಿ ಇಲ್ಲ.

ಶಾಲೆಯ ಒಟ್ಟಾರೆ ಹಳೆಯ ಎಲ್ಲಾ ಕೋಣೆಗಳನ್ನು ನೆಲಸಮಗೊಳಿಸಿ ಹೊಸ ಕೋಣೆಗಳ ನಿರ್ಮಾಣಕ್ಕೆ ಕ್ರಮ ಕೈಗೊಳ್ಳಬೇಕು ಎನ್ನುವುದು ಸ್ಥಳೀಯರ ಒತ್ತಾಯವಾಗಿದೆ.