ಸಾಲು ಸಾಲು ಸಾಧನೆಯ ಸರ್ಕಾರಿ ಶಾಲೆ!

ಹೌದು, ನಿಜಕ್ಕೂ ಈ ಶಾಲೆಯ ಸಾಧನೆಗಳನ್ನು ಬರೆಯುತ್ತಾ ಹೋದರೆ ಸಾಲುಗಳು ಮುಗಿಯುವುದಿಲ್ಲ, ಲೇಖನಿ ನಿಲ್ಲುವುದಿಲ್ಲ. ನಿರಂತರವಾಗಿ ಇಲ್ಲಿನ ವಿದ್ಯಾರ್ಥಿಗಳು ಸಾಧನೆಗೈಯುತ್ತಲೇ ಇದ್ದಾರೆ. ಜಿಲ್ಲಾ, ವಿಭಾಗ, ರಾಜ್ಯ, ರಾಷ್ಟ್ರಮಟ್ಟದ ಸಾಧನೆಗಳನ್ನು ಇಲ್ಲಿನ ವಿದ್ಯಾರ್ಥಿಗಳು ಸಾಧನೆ ಮಾಡಿದ್ದಾರೆ. ಅಂದ ಹಾಗೆ, ಈ ಶಾಲೆಯಲ್ಲಿ ಇರುವುದು 200 ಮಕ್ಕಳು ಮಾತ್ರ. ಅವರಲ್ಲಿ 50 ವಿದ್ಯಾರ್ಥಿಗಳು ಬಾಲಮಂದಿರದವರು ಎಂಬುದು ವಿಶೇಷ.

ಬಾಲಮಂದಿರದಲ್ಲಿರುವ ಮಕ್ಕಳಿಗೆ ಯೋಗ್ಯ ಶಿಕ್ಷಣ ನೀಡಿ ಅವರನ್ನು ಸಮಾಜದ ಮುಖ್ಯವಾಹಿನಿಗೆ ಬರುವಂತೆ ಮಾಡುವಲ್ಲಿ ಶ್ರಮಿಸುತ್ತಿದ್ದಾರೆ ಇಲ್ಲಿನ 7 ಜನ ಶಿಕ್ಷಕರು.

ಎಲ್‌ಕೆಜಿಯಿಂದ 8ನೇ ತರಗತಿಯವರೆಗೆ ಇರುವ ಈ ಶಾಲೆ ಇರುವುದು ನಗರದ ಜ್ಯೂನಿಯರ್ ಕಾಲೇಜಿನ ಆವರಣದಲ್ಲಿ. ‘ಜಿಎಂಪಿ ಶಾಲೆ’ ಎಂದೇ ಜನಮಾನಸದಲ್ಲಿರುವ ಈ ಶಾಲೆಯ 6 ವಿದ್ಯಾರ್ಥಿಗಳು ರಾಷ್ಟ್ರಮಟ್ಟದಲ್ಲಿ ಹಾಗೂ 45 ವಿದ್ಯಾರ್ಥಿಗಳು ರಾಜ್ಯಮಟ್ಟದಲ್ಲಿ ವಿವಿಧ ಕ್ರೀಡೆಗಳಲ್ಲಿ ಭಾಗವಹಿಸಿದ್ದಾರೆ.

ಕಳೆದ ವರ್ಷ ಡಿಸೆಂಬರ್‌ನಲ್ಲಿ ನಡೆದ ರಾಷ್ಟ್ರಮಟ್ಟದ 14ರ ವಯೋಮಿತಿಯ ಹಾಕಿ ಪಂದ್ಯಾವಳಿಯಲ್ಲಿ ಶಾಲೆಯ 7ನೇ ತರಗತಿ ಪ್ರೀತಂ ಆಯ್ಕೆಯಾಗಿ ಗ್ವಾಲಿಯರ್‌ನಲ್ಲಿ ಆಡಿರುವುದು, ಈ ವರ್ಷ ಜನವರಿಯಲ್ಲಿ ರಾಷ್ಟ್ರಮಟ್ಟದಲ್ಲಿ 14ರ ವಯೋಮಿತಿಯ ಬಾಲಕಿಯ ಕ್ರೀಡಾಕೂಟದಲ್ಲಿ ಕಾವ್ಯಾ ರಾಂಚಿಯಲ್ಲಿ ಪಾಲ್ಗೊಂಡಿದ್ದರು.

ಫೆಬ್ರುವರಿಯಲ್ಲಿ ನಡೆದ ಅಥ್ಲೆಟಿಕ್ಸ್‌ನಲ್ಲಿ 7ನೇ ತರಗತಿಯ 4 ವಿದ್ಯಾರ್ಥಿಗಳಾದ ಮೇಘನ್, ಗವಿನ್, ಬಾಲಾಜಿ, ಪೂರ್ವಿಕಾ 14ರ ವಯೋಮಿತಿಯಲ್ಲಿ ಗುಜರಾತ್‌ನಲ್ಲಿ ನಡೆದ ರಾಷ್ಟ್ರಮಟ್ಟದ ಸ್ಪರ್ಧೆಯಲ್ಲಿ ಭಾಗವಹಿಸಿದ್ದರು. ಕಳೆದ ವರ್ಷ 11 ವಿದ್ಯಾರ್ಥಿಗಳು ಹಾಕಿಯಲ್ಲಿ ರಾಷ್ಟ್ರಮಟ್ಟದಲ್ಲಿ ಆಡಿದ್ದು ವಿಶೇಷ ಎನಿಸಿತ್ತು.

ಈ ವರ್ಷ ಹಾಕಿ 14ರ ವಯೋಮಿತಿಯಲ್ಲಿ ರಾಜ್ಯಮಟ್ಟಕ್ಕೆ ಬಾಲಕ ಮತ್ತು ಬಾಲಕಿಯರ ತಂಡ ಆಯ್ಕೆಯಾಗಿತ್ತು. ಫುಟ್‌ಬಾಲ್‌ನಲ್ಲಿ ಡಿವಿಜನ್‌ವರೆಗೂ ವಿದ್ಯಾರ್ಥಿಗಳು ಹಾಗೂ ಟೇಬಲ್‌ ಟೆನ್ನಿಸ್‌ನಲ್ಲಿ ಇಬ್ಬರು ಮಕ್ಕಳು 7ನೇ ತರಗತಿ ಶಿಶಿರಾ ಮತ್ತು ಗಗನ್ ರಾಜ್ಯಮಟ್ಟದಲ್ಲಿ ಭಾಗವಹಿಸಿದ್ದರು.

ಡೆಲ್ ಕಂಪನಿಯವರು ₹ 2 ಕೋಟಿ ಮೊತ್ತದಲ್ಲಿ ಕಟ್ಟಡ ನಿರ್ಮಾಣ ಮಾಡಿಕೊಟ್ಟಿದ್ದಾರೆ. ಪಿಎಂಶ್ರೀ ಶಾಲೆ (ಪ್ರಧಾನಮಂತ್ರಿ ಸ್ಕೂಲ್ಸ್ ಫಾರ್ ರೈಸಿಂಗ್ ಇಂಡಿಯಾ) ಯೋಜನೆಯಡಿ ಜಿಲ್ಲೆಯಲ್ಲಿ ಆಯ್ಕೆಯಾದ  ಶಾಲೆಯಗಳ ಪೈಕಿ ಈ ಶಾಲೆಯೂ ಒಂದಾಗಿದೆ.

ಸಾಂಸ್ಕೃತಿಕ ಕಾರ್ಯಕ್ರಮಗಳಲ್ಲೂ ಶಾಲೆಗೆ ಉತ್ತಮ ಹೆಸರಿದೆ. ಸೇವಾದಳದ ತಂಡವೂ ಇಲ್ಲಿದೆ. ಈ ಬಾರಿ ಗಣರಾಜ್ಯೋತ್ಸವದ ಪಥಸಂಚಲನದಲ್ಲಿ ಭಾಗವಹಿಸಿದ್ದ 27 ತಂಡಗಳ ಪೈಕಿ ಈ ಶಾಲೆಯ ತಂಡ ತೃತೀಯ ಸ್ಥಾನ ಪಡೆಯಿತು. ಕಳೆದ ಸಾಲಿನ ಗಣರಾಜ್ಯೋತ್ಸವದಲ್ಲಿ ಪ್ರಥಮ ಸ್ಥಾನ ಪಡೆದಿತ್ತು.