ನ್ಯೂಯಾರ್ಕ್‌: ಹಾಲಿವುಡ್‌ ತಾರೆಯರ ಮೇಲೆ ಅತ್ಯಾಚಾರ ಹಾಗೂ ಲೈಂಗಿಕ ದೌರ್ಜನ್ಯ ಎಸಗಿದ ಅಮೆರಿಕದ ಸಿನಿಮಾ ನಿರ್ಮಾಪಕ, ಮಿರಾ ಮ್ಯಾಕ್ಸ್‌ ಸ್ಟುಡಿಯೊದ ಸಹ ಸಂಸ್ಥಾಪಕ ಹಾರ್ವೆ ವಿನ್‌ಸ್ಟೀನ್‌ ಪ್ರಕರಣವನ್ನು ಬಯಲಿಗೆಳೆದ ‘ನ್ಯೂಯಾರ್ಕ್‌ ಟೈಮ್ಸ್' ಪತ್ರಿಕೆ ಹಾಗೂ 'ದಿ ನ್ಯೂಯಾರ್ಕರ್‌’ ನಿಯತಕಾಲಿಕ ಈ ಸಾಲಿನ ಪ್ರತಿಷ್ಠಿತ ಪುಲಿಟ್ಜರ್‌ ಪ್ರಶಸ್ತಿಗೆ ಆಯ್ಕೆಯಾಗಿವೆ.
ಈ ಪತ್ರಿಕೆಗಳ ವರದಿಗಾರರಾದಜೋದಿ ಕೆಂಟೊರ್‌, ಮೆಗನ್‌ ಟೌಹೆ ಹಾಗೂ ರೊನಾನ್‌ ಫಾರ್ರೋ ಜಂಟಿಯಾಗಿ ಈ ತನಿಖಾ ವರದಿ ಮಾಡಿದ್ದರು.
ಕಳೆದ ವರ್ಷ ಅಕ್ಟೋಬರ್‌ ತಿಂಗಳಲ್ಲಿ ವಿನ್‌ಸ್ಟೀನ್‌ ಲೈಂಗಿಕ ಹಗರಣ ಕುರಿತಾಗಿ ಈ ಎರಡು ಪತ್ರಿಕೆಗಳಲ್ಲಿ ಲೇಖನ ಪ್ರಕಟಗೊಂಡಿದ್ದವು. ಇದಾದ ಬಳಿಕ 100ಕ್ಕೂ ಅಧಿಕ ಮಹಿಳೆಯರು ವಿನ್‌ಸ್ಟೀನ್‌ನಿಂದ ಎದುರಿಸಿದ ಲೈಂಗಿಕ ದೌರ್ಜನ್ಯ, ಅತ್ಯಾಚಾರದ ಬಗ್ಗೆ ಬಹಿರಂಗಪಡಿಸಿದ್ದರು.
ಇತರ ಪ್ರಶಸ್ತಿಗಳೆಂದರೆ, ತನಿಖಾ ವರದಿಗಾರಿಕೆ ( ವಾಷಿಂಗ್ಟನ್‌ ಪೋಸ್ಟ್‌), ರಾಷ್ಟ್ರೀಯ ವರದಿಗಾರಿಕೆ (ನ್ಯೂಯಾರ್ಕ್‌ ಟೈಮ್ಸ್, ದಿ ವಾಷಿಂಗ್ಟನ್‌ ಪೋಸ್ಟ್‌), ಅಂತರರಾಷ್ಟ್ರೀಯ ವರದಿಗಾರಿಕೆ (ರಾಯಿಟರ್ಸ್‌), ಛಾಯಾಗ್ರಹಣ (ರಾಯಿಟರ್ಸ್‌).
