ಗೋಣಿಕೊಪ್ಪಲು: ಇಲ್ಲಿನ ‘ಕಾಲ್ಸ್’ ಶಾಲೆಯಲ್ಲಿ ಭಾನುವಾರ ನಡೆದ ರಾಷ್ಟ್ರಮಟ್ಟದ ಬೃಹತ್ ಮ್ಯಾರಥಾನ್‌ನಲ್ಲಿ 1,200 ಮಂದಿ ಭಾಗವಹಿಸಿದ್ದರು. ಬಾಲಕರು, ಯುವಕರು ಮತ್ತು ವಯಸ್ಕರು ಎಂಬ ಮೂರು ವಿಭಾಗಗಳಲ್ಲಿ ನಡೆದ ಸ್ಪರ್ಧೆಯಲ್ಲಿ ಮುಂಬೈ, ಚೆನ್ನೈ, ಕಣ್ಣೂರು ಸೇರಿದಂತೆ ದೇಶದ ವಿವಿಧ ಭಾಗಗಳಿಂದ ಬಂದಿದ್ದ ಕ್ರೀಡಾಪಟುಗಳು ಪಾಲ್ಗೊಂಡಿದ್ದರು.
50 ಕಿಮೀ, 25 ಕಿಮೀ, 12.5 ಕಿಮೀ ವಿಭಾಗಗಳಲ್ಲಿ ನಡೆದ ಸ್ಪರ್ಧೆಯಲ್ಲಿ ಓಟಗಾರರು ದಣಿವರಿಯದೆ ಓಡಿದರು. ಕಾಲ್ಸ್ ಶಾಲೆಯಿಂದ ಕಾಫಿ ತೋಟದ ಮಾರ್ಗವಾದ ಕಳತ್ಮಾಡು, ಪಾಲಿಬೆಟ್ಟ, ಅಮ್ಮತ್ತಿ ರಸ್ತೆಯಲ್ಲಿ ಓಡಿ ಮತ್ತೆ ಮರಳಿ ಕಾಲ್ಸ್ ಶಾಲೆ ಸೇರಿದರು.
ಶಾಸಕ ಕೆ.ಜಿ.ಬೋಪಯ್ಯ ಅವರು ಮ್ಯಾರಥಾನ್ ಸ್ಪರ್ಧೆ ಉದ್ಘಾಟಿಸಿ, ‘ಉತ್ತಮ ಆರೋಗ್ಯದ ಜತೆಗೆ ಭಾವೈಕ್ಯತೆ ಬಿತ್ತುವಲ್ಲಿ ಕ್ರೀಡಾಕೂಟಗಳು ಸಹಕಾರಿಯಾಗಲಿವೆ. ರಾಷ್ಟ್ರಮಟ್ಟದ ಓಟದ ಸ್ಪರ್ಧಿಗಳನ್ನು ಕೊಡಗಿಗೆ ಬರುವಂತೆ ಮಾಡಿರುವ ಕಾಲ್ಸ್ ಶಾಲೆಯ ಹಿರಿಮೆ ದೊಡ್ಡದು’ ಎಂದು ಶ್ಲಾಘಿಸಿದರು.
ಕಾಲ್ಸ್ ಶಾಲೆ ಆಡಳಿತ ಮಂಡಳಿ ಅಧ್ಯಕ್ಷ ದತ್ತ ಕರುಂಬಯ್ಯ, ವ್ಯವಸ್ಥಾಪಕ ನಿರ್ದೇಶಕಿ ಹಾಗೂ ಒಲಂಪಿಯನ್ ಓಟಗಾರ್ತಿ ಅಶ್ವಿನಿ ನಾಚಪ್ಪ ಹಾಜರಿದ್ದರು.
