ನಿರ್ಲಕ್ಷ್ಯಕ್ಕೆ ತುತ್ತಾಗಿವೆ ಕೊಡಗಿನ ಜೈನ ಸ್ಮಾರಕಗಳು

ಮುಳ್ಳೂರು ಬಸದಿಗೆ ಹೋಗುವ ರಸ್ತೆ ಸಂಪೂರ್ಣ ಹಾಳಾಗಿದೆ. ಈ ಕುರಿತು ನಾವು ಎಲ್ಲ ಜನಪ್ರತಿನಿಧಿಗಳಿಗೆ ಮನವಿ ಮಾಡಿದರೂ ಅಭಿವೃದ್ಧಿಯಾಗಿಲ್ಲ. ಈ ರಸ್ತೆಯನ್ನು ಅಭಿವೃದ್ಧಿಪಡಿಸಿದರೆ ಪ್ರವಾಸಿಗರಿಗೆ ಸಾಕಷ್ಟು ಅನುಕೂಲವಾಗಲಿದೆ. ಶೌಚಾಲಯ ಸಹ ಇಲ್ಲಿಲ್ಲ. ಮುಳ್ಳೂರು ಜೈನ ಬಸದಿಗೆ ಕನಿಷ್ಠ ಮೂಲಸೌಲಭ್ಯಗಳನ್ನು ಒದಗಿಸಬೇಕಾಗಿದೆ. ಈ ತಾಣ ಅಭಿವೃದ್ಧಿಯಾದರೆ ಇಲ್ಲಿನ ಗ್ರಾಮಸ್ಥರು ಹಾಗೂ ಸುತ್ತಮುತ್ತಲ ಗ್ರಾಮದವರಿಗೆ ಅನುಕೂಲವಾಗುತ್ತದೆ.

ಕೊಡಗಿನ ಗಡಿಭಾಗ ಹೊಸೂರು ಗ್ರಾಮದಲ್ಲಿ ಜೈನ ಬಸದಿ ಇದ್ದು, ಸಾವಿರ ವರ್ಷದ ಇತಿಹಾಸ ಹೊಂದಿದೆ ಎಂದು ಮೈಸೂರು ವಿಶ್ವವಿದ್ಯಾಲಯದ ಸಂಶೋಧಕರು ತಿಳಿಸಿದ್ದಾರೆ. ತೀರ್ಥಂಕರರ ಸೊಗಸಾದ ಎರಡು ವಿಗ್ರಹಗಳಿವೆ. ಬಸದಿ ಶಿಥಿಲವಾಗಿದ್ದರೂ, ಅದರ ಮುಂದೆ ಹೂವಿನ ಗಿಡಗಳನ್ನು ನೆಟ್ಟು, ಮರಗಳನ್ನು ಬೆಳೆಸಿ ಎಷ್ಟು ಸಾಧ್ಯವೋ ಅಷ್ಟು ಸಂರಕ್ಷಣೆ ಮಾಡುತ್ತಿದ್ದೇವೆ. ಸರ್ಕಾರ ಇನ್ನಷ್ಟು ಅಭಿವೃದ್ಧಿಗೊಳಿಸಿದರೆ ಇದೊಂದು ಪ್ರವಾಸಿತಾಣವಾಗುವುದರಲ್ಲಿ ಯಾವುದೇ ಸಂಶಯ ಇಲ್ಲ.

ಕೊಡಗಿನಲ್ಲಿ ಸಾಕಷ್ಟು ಕಡೆ ಜೈನ ಸ್ಮಾರಕಗಳಿವೆ, ನಿಷಿಧಿ ಕಲ್ಲುಗಳೂ ಸಾಕಷ್ಟು ಲಭ್ಯವಾಗಿವೆ. ಮಡಿಕೇರಿಯ ಸರ್ಕಾರಿ ವಸ್ತುಸಂಗ್ರಹಾಲಯದಲ್ಲಿ ಅವುಗಳನ್ನೆಲ್ಲ ಸಂರಕ್ಷಿಸಿಡಲಾಗಿದೆ.

ಕೊಡಗಿನಲ್ಲಿ ಜೈನ ಧರ್ಮಕ್ಕೆ ಸಂಬಂಧಿಸಿದ ಸಾಕಷ್ಟು ಸ್ಮಾರಕಗಳಿವೆ, ಬಸದಿಗಳಿವೆ. ಸರ್ಕಾರ ಕೂಡಲೇ ಎಲ್ಲ ಬಸದಿಗಳು, ಸ್ಮಾರಕಗಳನ್ನು ಜೀರ್ಣೋದ್ಧಾರ ಮಾಡಬೇಕು. ಈ ಮೂಲಕ ಇತಿಹಾಸ ಉಳಿಸಬೇಕು.

ಕೊಡಗು ಜಿಲ್ಲೆಯ ಸೋಮವಾರಪೇಟೆ ತಾಲ್ಲೂಕಿನ ಮುಳ್ಳೂರು, ಕಲ್ಕಂದೂರು, ಗಡಿಭಾಗ ಹೊಸೂರು ಗ್ರಾಮದಲ್ಲಿ ಜೈನಬಸದಿಗಳಿವೆ. ಮುಳ್ಳೂರಿನ ಜೈನಬಸದಿಗಳು, ಶಾಸನಗಳು ಸಂರಕ್ಷಿತವಾಗಿವೆ. ಹೊಸೂರಿನಲ್ಲಿ ಪಾಣಿಪೀಠ ಇದ್ದು, ಮೂರ್ತಿ ಇಲ್ಲ. ಶಾಸನಗಳಲ್ಲಿ ಅನೇಕ ಉಲ್ಲೇಖಗಳೂ ಇವೆ.