ಮಡಿಕೇರಿ: ಕವಿಗೋಷ್ಠಿ ರದ್ದು, ದಸರೆಯಲ್ಲಿ ‘ಬಂಡಾಯ’

7
ಕ್ರೀಡಾಕೂಟವೂ ರದ್ದು: ಬಂದವರಿಗೆ ‘ತಣ್ಣೀರು’ ವಿತರಣೆಗೆ ನಿರ್ಧಾರ

ಮಡಿಕೇರಿ: ಕವಿಗೋಷ್ಠಿ ರದ್ದು, ದಸರೆಯಲ್ಲಿ ‘ಬಂಡಾಯ’

Published:
Updated:
Deccan Herald

ಮಡಿಕೇರಿ: ಮಡಿಕೇರಿ ದಸರಾ ಅಂಗವಾಗಿ ಪ್ರತಿವರ್ಷ ನಡೆಯುತ್ತಿದ್ದ ಬಹುಭಾಷಾ ಕವಿಗೋಷ್ಠಿಗೆ ದಸರಾ ಪ್ರಧಾನ ಸಮಿತಿ ಅನುದಾನ ನೀಡದ ಕಾರಣ ಅ. 16ರಂದು ‘ಸಂತ್ರಸ್ತರಿಗೆ ಸಾಂತ್ವನ - ಬಂದವರಿಗೆ ತಣ್ಣೀರು’ ಎಂಬ ಘೋಷಣೆ ಅಡಿ ಪರ್ಯಾಯ ಕವಿಗೋಷ್ಠಿ ನಡೆಸಲು ತೀರ್ಮಾನಿಸಲಾಗಿದೆ ಎಂದು ದಸರಾ ಕವಿಗೋಷ್ಠಿ ಸಮಿತಿ ಅಧ್ಯಕ್ಷ ಐತಿಚಂಡ ರಮೇಶ್ ಉತ್ತಪ್ಪ ತಿಳಿಸಿದರು.

ನಗರದಲ್ಲಿ ಗುರುವಾರ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿ, ದಸರಾ ಆಚರಣೆಗೆ ಸರ್ಕಾರದಿಂದ ₹ 50 ಲಕ್ಷ ಬಿಡುಗಡೆ ಆಗಿದ್ದರೂ ದಸರಾ ಪ್ರಧಾನ ಸಮಿತಿಯು ದಸರೆ ಕ್ರೀಡಾಕೂಟ ಹಾಗೂ ಕವಿಗೋಷ್ಠಿಯನ್ನು ರದ್ದು ಮಾಡಿದೆ. ಇದು ಕ್ರೀಡಾ ಹಾಗೂ ಸಾಹಿತ್ಯ ಪ್ರೇಮಿಗಳಿಗೆ ನೋವು ತರಿಸಿದೆ ಎಂದು ಹೇಳಿದರು.

ಅನುದಾನ ಇಲ್ಲದೇ ಪ್ರಕೃತಿ ವಿಕೋಪದಿಂದ ನೊಂದ ಜನರಿಗೆ ಸಾಹಿತ್ಯದ ಮೂಲಕ ಸಂತ್ರಸ್ತರಿಗೆ ಸಾಂತ್ವನ ಹೇಳುವ ಕವಿಗೋಷ್ಠಿಯನ್ನು ಆಯೋಜಿಸಲು ತೀರ್ಮಾನಿಸಲಾಗಿದೆ. ಸುಮಾರು 25ರಿಂದ 30 ಕವಿಗಳನ್ನು ಕರೆಸಿ ನಗರದ ಬಾಲಭವನದಲ್ಲಿ ಸರಳವಾಗಿ ಕವಿಗೋಷ್ಠಿ ನಡೆಸಲಾಗುವುದು ಎಂದು ಮಾಹಿತಿ ನೀಡಿದರು.

ಬಂದವರಿಗೆ ತಣ್ಣೀರು: ಅನುದಾನ ನೀಡದೇ ಕವಿಗೋಷ್ಠಿ ನಡೆಸುವುದು ಕಷ್ಟವಾಗಿರುವುದರಿಂದ ಈ ಬಾರಿ ಕವಿಗೋಷ್ಠಿಯಲ್ಲಿ ದಸರಾ ಸಮಿತಿ ಅನುದಾನ ರಹಿತ ಕವಿಗೋಷ್ಠಿ ಎಂದು ಘೋಷವಾಕ್ಯ ನೀಡಲಾಗಿದೆ.

ಜತೆಗೆ, ಗೋಷ್ಠಿಗೆ ಸಂಬಂಧಿಸಿದಂತೆ ಆಮಂತ್ರಣ ಪತ್ರ, ಊಟೋಪಚಾರ, ಪ್ರಶಸ್ತಿ, ಸ್ಮರಣ ಸಂಚಿಕೆ, ಗೌರವ ಧನಗಳನ್ನು ನೀಡಲಾಗುತ್ತಿಲ್ಲ. ಯಾರಿಂದಲೂ ಹಣ ಸಂಗ್ರಹ ಮಾಡುವುದಿಲ್ಲ. ಅನುದಾನ ನೀಡದ ಕಾರಣಕ್ಕಾಗಿ ಬಂದವರಿಗೆ ಪ್ರತಿಭಟನೆಯ ಸಂಕೇತವಾಗಿ ‘ತಣ್ಣೀರು’ ವಿತರಿಸಲಾಗುವುದು. ಗುರುವಾರ ನಡೆದ ಸಮಿತಿ ತುರ್ತುಸಭೆಯಲ್ಲಿ ಈ ನಿರ್ಧಾರ ತೆಗೆದುಕೊಳ್ಳಲಾಗಿದೆ. ಸಾಹಿತ್ಯಾಸಕ್ತರು ಹೆಚ್ಚಿನ ಸಂಖ್ಯೆಯಲ್ಲಿ ಭಾಗವಹಿಸಬೇಕು ಎಂದು ಕೋರಿದರು

ಸಂತ್ರಸ್ತರಿಗೆ ಸಾಂತ್ವನ: ಕವಿಗೋಷ್ಠಿಯುದ್ದಕ್ಕೂ ಸಂತ್ರಸ್ತರಿಗೆ ಸಾಂತ್ವನ ಹೇಳುವ ಕವನಗಳನ್ನು ಬಹುಭಾಷಾ ಕವಿಗಳು ವಾಚಿಸಲಿದ್ದಾರೆ. ಗೋಷ್ಠಿಯ ಅಧ್ಯಕ್ಷತೆಯನ್ನು ನಿರಾಶ್ರಿತ ಸಾಹಿತಿ ನಾಗೇಶ್ ಕಾಲೂರು ವಹಿಸಲಿದ್ದಾರೆ. ನಿರಾಶ್ರಿತ ಕುಡೆಕಲ್ ಸಂತೋಷ್‌ ಅವರು ಗೋಷ್ಠಿಗೆ ಚಾಲನೆ ನೀಡಲಿದ್ದಾರೆ. ಅತಿಥಿಗಳಾಗಿ ಜಿಲ್ಲಾಧಿಕಾರಿ ಪಿ.ಐ. ಶ್ರೀವಿದ್ಯಾ, ಕಾರ್ಯನಿರತ ಪತ್ರಕರ್ತರ ಸಂಘದ ಅಧ್ಯಕ್ಷೆ ಸವಿತಾ ರೈ ಪಾಲ್ಗೊಳ್ಳಲಿದ್ದಾರೆ ಎಂದು ಹೇಳಿದರು.

ಕಳೆದ ಬಾರಿ ದಸರಾ ಕವಿಗೋಷ್ಠಿ ಯಶಸ್ವಿಯಾಗಿ ನಡೆದಿತ್ತು. ದಸರಾ ಸಮಿತಿಯ ₹ 60 ಸಾವಿರ ಅನುದಾನ ಸೇರಿದಂತೆ ಒಟ್ಟು ₹ 1.15 ಲಕ್ಷ ವೆಚ್ಚ ಮಾಡಲಾಗಿತ್ತು. ಆದರೆ, ಈ ಬಾರಿ ದಸರಾ ಪ್ರಧಾನ ಸಮಿತಿ ಅನುದಾನ ಇದ್ದರೂ ಕಾರ್ಯಕ್ರಮಗಳನ್ನು ರದ್ದು ಮಾಡಿರುವುದು ವಿಪರ್ಯಾಸ ಎಂದರು.

₹ 50 ಲಕ್ಷದಲ್ಲಿ ದಸರಾದ 10 ಮಂಟಪಗಳಿಗೆ ತಲಾ ₹ 2 ಲಕ್ಷಗಳಂತೆ ₹ 20 ಲಕ್ಷ, 4 ಕರಗಗಳಿಗೆ ತಲಾ ₹ 1.50 ಲಕ್ಷಗಳಂತೆ ಒಟ್ಟು ₹ 6 ಲಕ್ಷ , ಎರಡು ದಿನಗಳ ಕಾರ್ಯಕ್ರಮಕ್ಕೆ ವೇದಿಕೆ, ದೀಪಾಲಂಕಾರಕ್ಕೆ ₹ 8ರಿಂದ ₹ 10 ಲಕ್ಷ ಖರ್ಚು ಮಾಡಲಾಗುತ್ತಿದೆ. ಉಳಿದ ಶೇ 25ರಷ್ಟು ಅನುದಾನಗಳನ್ನು ಯಾವ ಉದ್ದೇಶಕ್ಕೆ ಖರ್ಚು ಮಾಡಲಾಗುತ್ತಿದೆ ಎಂಬುದನ್ನು ಸಮಿತಿ ತಿಳಿಸಬೇಕು ಎಂದು ಉತ್ತಪ್ಪ ಆಗ್ರಹಿಸಿದರು.

ಕನ್ನಡ ಮತ್ತು ಸಂಸ್ಕೃತಿ ಇಲಾಖೆಯ ಮೂಲಕ ದಸರಾಕ್ಕೆ ಹಣ ಬಿಡುಗಡೆಯಾಗುತ್ತಿದೆ. ಅದರ ಉದ್ದೇಶ ಕೂಡ ಕಲೆ, ಸಾಹಿತ್ಯ, ಸಂಸ್ಕೃತಿಯನ್ನು ಉಳಿಸುವಂತಹದ್ದು. ಆದರೆ, ಕವಿಗೋಷ್ಠಿಯನ್ನು ಇದರಿಂದ ಯಾವ ಕಾರಣಕ್ಕೆ ಹೊರಗಿಟ್ಟಿದ್ದಾರೆ ಎನ್ನುವುದು ತಿಳಿಯುತ್ತಿಲ್ಲ. ಕವಿಗೋಷ್ಠಿಯಿಂದಾಗಿ ಸಾಕಷ್ಟು ಯುವ ಕವಿಗಳಿಗೆ ಪ್ರೋತ್ಸಾಹ ಲಭ್ಯವಾಗಿದೆ. ಇದರ ಮಹತ್ವ ಕೆಲವರಿಗೆ ತಿಳಿದಿಲ್ಲ ಎಂದು ವಿಷಾದಿಸಿದರು.

ಸಮಿತಿಯ ನಿಕಟ ಪೂರ್ವ ಅಧ್ಯಕ್ಷ ಕುಡೆಕಲ್‌ ಸಂತೋಷ್‌ ಮಾತನಾಡಿ, ಈ ಬಾರಿಯು ಜಿಲ್ಲೆಯ ನೂರಾರು ಸಾಹಿತ್ಯ ಆಸಕ್ತರು ಕವಿಗೋಷ್ಠಿ ನಡೆಸಲು ತೀರ್ಮಾನಿಸಿದ್ದಾರೆ. ಆದರೆ, ಸರ್ಕಾರದ ಅನುದಾನ ಇಲ್ಲದೆ ಕವಿಗೋಷ್ಠಿ ನಡೆಸಲು ಕಷ್ಟವಾಗಿರುವುದರಿಂದ ಸಾಂಕೇತಿಕವಾಗಿ ನಡೆಸುತ್ತಿದ್ದೇವೆ ಎಂದು ವಿವರಿಸಿದರು.

ಪತ್ರಿಕಾಗೋಷ್ಠಿಯಲ್ಲಿ ಸಮಿತಿಯ ಪ್ರಧಾನ ಕಾರ್ಯದರ್ಶಿ ಎಂ.ಎನ್. ನಾಸಿರ್, ಸದಸ್ಯರಾದ ಕಿಶೋರ್‌ ರೈ, ವಿಘ್ನೇಶ್‌ ಭೂತನಕಾಡು, ಮನೋಜ್‌ ಹಾಜರಿದ್ದರು.

Tags: 

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !