ನವದೆಹಲಿ: ಆದಾಯ ತೆರಿಗೆ ಲೆಕ್ಕಪತ್ರ ವಿವರ ಸಲ್ಲಿಸಲು (ಐಟಿ ರಿಟರ್ನ್‌) ವೇತನ ವರ್ಗದವರು ಹೆಚ್ಚಾಗಿ ಬಳಸುವ ‘ಐಟಿಆರ್‌–1’ ಅರ್ಜಿ ನಮೂನೆಗೆ ಆದಾಯ ತೆರಿಗೆ ಇಲಾಖೆಯ ಅಂತರ್ಜಾಲ ತಾಣದಲ್ಲಿ ಚಾಲನೆ ನೀಡಲಾಗಿದೆ.
ನೇರ ತೆರಿಗೆ ಕೇಂದ್ರೀಯ ಮಂಡಳಿಯು (ಸಿಬಿಡಿಟಿ) ಇದೇ 5ರಂದು ಈ ಸಂಬಂಧ ಅಧಿಸೂಚನೆ ಹೊರಡಿಸಿತ್ತು. ಇಲಾಖೆಯ ಅಂತರ್ಜಾಲ ತಾಣದಲ್ಲಿ https://www.incometaxindiaefiling.gov.in ಈ ಅರ್ಜಿ ನಮೂನೆಯು ಈಗ ಲಭ್ಯ ಇರಲಿದೆ. ಇತರ ಐಟಿಆರ್‌ ನಮೂನೆಗಳೂ ಸದ್ಯದಲ್ಲೇ ಈ ತಾಣದಲ್ಲಿ ಬಳಕೆಗೆ ಲಭ್ಯ ಇರಲಿವೆ ಎಂದು ಇಲಾಖೆಯ ಹಿರಿಯ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.
2018–19ರ ಅಂದಾಜು ವರ್ಷದ ಆದಾಯ ತೆರಿಗೆ ಲೆಕ್ಕಪತ್ರ ವಿವರ ಸಲ್ಲಿಸುವ ಹೊಸ ‘ಐಟಿಆರ್‌’ ನಲ್ಲಿ ವೇತನ ವರ್ಗದವರು ತಮ್ಮ ವೇತನದ ಸಮಗ್ರ ವಿವರಗಳನ್ನು ಮತ್ತು ವಹಿವಾಟುದಾರರು, ಉದ್ಯಮಿಗಳು ತಮ್ಮ ಜಿಎಸ್‌ಟಿ ಸಂಖ್ಯೆ ಮತ್ತು ವಹಿವಾಟಿನ ಮೊತ್ತವನ್ನು ಕಡ್ಡಾಯವಾಗಿ ದಾಖಲಿಸಬೇಕಾಗಿದೆ.
ಉದ್ಯೋಗದಾತ ಸಂಸ್ಥೆಯು ವಿತರಿಸುವ ಫಾರ್ಮ್‌ 16ರಲ್ಲಿನ ತೆರಿಗೆ ಕಡಿತದ ವಿವರಗಳನ್ನು ಐಟಿಆರ್‌ನಲ್ಲಿ ನಮೂದಿಸಬೇಕಾಗುತ್ತದೆ. ತೆರಿಗೆ ಕಡಿತಗಳ ಬಗೆಗಿನ ಸ್ಪಷ್ಟತೆಗಾಗಿ ಈ ವಿವರಗಳು ಅಗತ್ಯವಾಗಿವೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
