ಕೊಡಗಿನಲ್ಲಿ ಕಕ್ಕಡ ಸಂಭ್ರಮ: ಎಲ್ಲೆಡೆ ಆಟಿಸೊಪ್ಪಿನ ಘಮಲು

ಕೊಡಗಿನಲ್ಲಿ ಕಕ್ಕಡ ತಿಂಗಳಿನಲ್ಲಿ ಕಕ್ಕಡ 18ರ ದಿನವನ್ನು ಆಯುರ್ವೇದ ಸಂಬಂಧದ ಜಾನಪದ ಹಬ್ಬವನ್ನಾಗಿ ಆಚರಿಸಲಾಗುತ್ತಿದೆ. ಕಕ್ಕಡ 18 ಹಬ್ಬದ ಆಚರಣೆಯೆಂದರೆ ಅದು ಆಟಿಸೊಪ್ಪಿನ ಬಳಕೆಯ ಹಬ್ಬ. ಕಕ್ಕಡ ತಿಂಗಳ 18ನೇ ದಿನಕ್ಕೆ ಆಟಿ ಸೊಪ್ಪಿನಲ್ಲಿ (ಮಧುಬನ) 18 ಔಷಧೀಯ ಗುಣಗಳು ಸೇರಲಿದ್ದು ಅದನ್ನು ಹಬ್ಬದಂದು ವಿಶೇಷವಾಗಿ ಬಳಸಲಾಗುವುದು. ಕಕ್ಕಡ ತಿಂಗಳಲ್ಲಿ ಶರೀರ ಶೀತದಿಂದ ಕೂಡಿರುತ್ತದೆ. ಅದನ್ನು ನಿವಾರಿಸಲು ಆಟಿ ಸೊಪ್ಪಿನ ಪಾಯಸದ ಸೇವನೆಯನ್ನು ಹಿರಿಯರು ಹಿಂದಿನಿಂದ ಮಾಡುತ್ತಾ ಬಂದಿದ್ದಾರೆ. ದಿನದ ಮಹತ್ವ ಸಾರುವ ಆಟಿ 18ನ್ನು ಈಚೆಗೆ ವಿವಿಧ ಜನಾಂಗದವರಿಂದ ವೈವಿಧ್ಯಮಯವಾಗಿ ಆಚರಿಸಲಾಗುತ್ತಿದೆ.

ಆಟಿ ಸೊಪ್ಪು ಔಷದೀಯ ಗುಣಗಳನ್ನು ಹೊಂದಿದ ಸೊಪ್ಪು. ಇದನ್ನು ಆರಿಸಿ ತಂದು ಬೇಯಿಸಿ ಅದರ ರಸವನ್ನು ತೆಗೆದು ಅದರಲ್ಲಿ ಪಾಯಸ ತಯಾರಿಸುತ್ತಾರೆ. ಇದು ಕಂದು ಬಣ್ಣದಿಂದ ಕೂಡಿರುತ್ತದೆ. ಹಿಂದಿನಿಂದಲೂ ಜಿಲ್ಲೆಯಲ್ಲಿ ಎಲ್ಲಾ ಜನಾಂಗದವರು ಪಾಯಸ ತಯಾರಿಸಿ ಸೇವಿಸುತ್ತಾರೆ.

ಈಚಿನ ದಿನಗಳಲ್ಲಿ ಆಟಿಸೊಪ್ಪಿನ ಬಳಕೆಯಲ್ಲಿ ವೈವಿಧ್ಯತೆ ಕಾಣಿಸಿಕೊಂಡಿದೆ. ಕೇವಲ ಪಾಯಸ ಮಾತ್ರವಲ್ಲ, ಮದ್ದುಸೊಪ್ಪಿನ ಕೇಸರಿಭಾತ್, ಹಲ್ವ, ಕಡುಂಬುಟ್, ಜೆಲ್ಲಿ. ಹೀಗೆ ಬಗೆಬಗೆಯ ತಿನಿಸು ವೈವಿಧ್ಯಗಳನ್ನು ತಯಾರಿಸಿ ಬಂಧುಬಳಗದವರ ಜೊತೆಯಲ್ಲಿ ಸೇವಿಸುವ ಪರಿಪಾಠ ಹೆಚ್ಚುತ್ತಿದೆ. ಅಲ್ಲಲ್ಲಿ ಜನಾಂಗದ ಮಂದಿ ಒಗ್ಗೂಡಿ ಆಟಿಸೊಪ್ಪಿನ ತಿನಿಸುಗಳ ಪ್ರದರ್ಶನ ಮಾಡುತ್ತಾರೆ. ಹಬ್ಬದಂತೆ ಆಚರಿಸಿ ಸಂಭ್ರಮಿಸುತ್ತಾರೆ. ಮನೋರಂಜನಾ ಕಾರ್ಯಕ್ರಮಗಳೂ ಜರುಗುತ್ತವೆ. ಹೀಗೆ ಜನಪದೀಯ ಆಚರಣೆಯಾಗಿ ರೂಢಿಗೆ ಬಂದ ಕಕ್ಕಡ-18 ರ ಆಚರಣೆ ವೈವಿಧ್ಯಮಯ ಸ್ವರೂಪ ಪಡೆದುಕೊಂಡಿದ್ದು ಜನಾಂಗದವರ ಒಗ್ಗೂಡುವಿಕೆಗೆ,ಭಾಂದವ್ಯದ ಬೆಸುಗೆಗೆ ಕಾರಣವಾಗಿದೆ.