ಕೋಲಾರ: ಊರು ಕೇರಿಯಲ್ಲಿ ಬಾಡೂಟದ ಘಮ

ಯುಗಾದಿ ಹಬ್ಬದ ಮಾರನೆ ದಿನ ವರ್ಷ ತೊಡಕು ಆಚರಿಸುವುದು ಹಿಂದಿನಿಂದ ನಡೆದುಕೊಂಡು ಬಂದ ಪದ್ಧತಿ. ಆದರೆ, ಈ ಬಾರಿ ಕೋವಿಡ್–19 ಭೀತಿ ಕಾರಣಕ್ಕೆ ಕೇಂದ್ರ ಸರ್ಕಾರ ಜನರ ಗುಂಪುಗೂಡುವಿಕೆ ತಪ್ಪಿಸಲು ದೇಶವ್ಯಾಪಿ ಬಂದ್‌ಗೆ ಆದೇಶಿಸಿದೆ. ಆದರೂ ಜಿಲ್ಲಾಡಳಿತವು ವರ್ಷ ತೊಡಕಿನ ಹಿನ್ನೆಲೆಯಲ್ಲಿ ಮಾಂಸ ಖರೀದಿಗೆ ಅವಕಾಶ ಕಲ್ಪಿಸಿತು.

ಕಳೆದ ಏಳೆಂಟು ದಿನಗಳಿಂದ ಬಾಗಿಲು ಮುಚ್ಚಿದ್ದ ಕೋಳಿ, ಕುರಿ ಮಾಂಸ ಹಾಗೂ ಮೀನಿನ ಅಂಗಡಿ ಮಾಲೀಕರು ನಸುಕಿನಲ್ಲೇ ಮಳಿಗೆಗಳ ಬಾಗಿಲು ತೆರೆದು ವಹಿವಾಟು ಆರಂಭಿಸಿದರು. ಅಂಗಡಿಗಳ ಬಾಗಿಲು ತೆರೆಯುತ್ತಿದ್ದಂತೆ ಗ್ರಾಹಕರು ಮಾಂಸ ಖರೀದಿಗೆ ಮುಗಿಬಿದ್ದರು.

ನಗರದ ಅಮ್ಮವಾರಿಪೇಟೆ, ಕ್ಲಾಕ್‌ಟವರ್‌, ಎಂ.ಬಿ ರಸ್ತೆ ಸುತ್ತಮುತ್ತಲಿನ ಕೋಳಿ, ಮೀನು ಹಾಗೂ ಕುರಿ ಮಾಂಸದ ಅಂಗಡಿಗಳು ಗ್ರಾಹಕರಿಂದ ಗಿಜಿಗುಡುತ್ತಿದ್ದವು. ಅಂಗಡಿಗಳ ಮುಂದೆ ಗ್ರಾಹಕರು ಮಾಂಸ ಖರೀದಿಗೆ ಸಾಲುಗಟ್ಟಿ ನಿಂತಿದ್ದರು. ಎಂ.ಬಿ ರಸ್ತೆಯ ಅಕ್ಕಪಕ್ಕ ನಾಟಿ ಕೋಳಿ ವಹಿವಾಟು ಭರ್ಜರಿಯಾಗಿತ್ತು. ಮೀನಿನ ವ್ಯಾಪಾರವೂ ಜೋರಾಗಿತ್ತು. ಅಮ್ಮವಾರಿಪೇಟೆ ಮಾರುಕಟ್ಟೆಯಲ್ಲಿ ಜನ ಜಾತ್ರೆಯೇ ಕಂಡುಬಂತು.

ಆಂಧ್ರಪ್ರದೇಶ, ತಮಿಳುನಾಡು ಹಾಗೂ ಮಂಗಳೂರಿನಿಂದ ತರಿಸಲಾಗಿದ್ದ ಮೀನುಗಳನ್ನು ಖರೀದಿಸಲು ಗ್ರಾಹಕರು ಮುಗಿಬಿದ್ದರು. ಗ್ರಾಮೀಣ ಪ್ರದೇಶದಿಂದ ರೈತರು ತಂದಿದ್ದ ನಾಟಿ ಕೋಳಿಗಳು ಕ್ಷಣ ಮಾತ್ರದಲ್ಲಿ ಮಾರಾಟವಾದವು. ಕುರಿ ಹಾಗೂ ಕೋಳಿ ಮಾಂಸದ ಅಂಗಡಿ ಮಾಲೀಕರು ಗ್ರಾಹಕರಿಂದ ಮುಂಗಡ ಹಣ ಪಡೆದು ಟೋಕನ್‌ ನೀಡಿ ನಂತರ ಮಾಂಸ ವಿತರಿಸಿದರು.

ಬೆಲೆ ಏರಿಕೆ

ಕೋವಿಡ್‌–19 ಹಾಗೂ ಹಕ್ಕಿ ಜ್ವರದ ಕಾರಣಕ್ಕೆ ಜಿಲ್ಲೆಯ ಸಾಕಷ್ಟು ಕಡೆ ಬಾಯ್ಲರ್‌ ಮತ್ತು ಫಾರಂ ಕೋಳಿಗಳನ್ನು ಜೀವಂತ ಸಮಾಧಿ ಮಾಡಲಾಗಿತ್ತು. ಬಹುಪಾಲು ಪೌಲ್ಟ್ರಿಗಳನ್ನು ಮುಚ್ಚಲಾಗಿತ್ತು. ಕೆಲ ದಿನಗಳ ಹಿಂದೆ ಉಚಿತವಾಗಿ ಕೋಳಿ ನೀಡಿದರೂ ಕೇಳುವವರಿರಲಿಲ್ಲ. ಹೀಗಾಗಿ ಕೋಳಿ ಮಾಂಸದ ಬೆಲೆ ಕೆ.ಜಿಗೆ ₹ 30ಕ್ಕೆ ಕುಸಿದಿತ್ತು.

ಆದರೆ, ವರ್ಷ ತೊಡಕಿನ ಹಿನ್ನೆಲೆಯಲ್ಲಿ ಗುರುವಾರ ಕೋಳಿ ಬೆಲೆ ಏಕಾಏಕಿ ಏರಿಕೆಯಾಯಿತು. ಚಿಕ್ಕ ಬಾಯ್ಲರ್‌ ಕೋಳಿ ಕೆ.ಜಿಗೆ ₹ 100 ಹಾಗೂ ದೊಡ್ಡ ಬಾಯ್ಲರ್‌ ₹ 120 ಇತ್ತು. ಮೀನು ಕೆ.ಜಿಗೆ ₹ 200 ಇತ್ತು. ನಾಟಿ ಕೋಳಿ ಕೆ.ಜಿಗೆ ₹ 500ರಂತೆ ಮಾರಾಟವಾಯಿತು.

ಕುರಿ ಮಾಂಸದ ಬೆಲೆ ಗಗನಕ್ಕೇರಿತು. ಮಾರುಕಟ್ಟೆಗೆ ಬಂದಿದ್ದ ಗ್ರಾಹಕರಿಗೆ ಬೆಲೆ ಏರಿಕೆ ಬಿಸಿ ತಟ್ಟಿತು. ಕುರಿ ಮತ್ತು ಮೇಕೆ ಮಾಂಸದ ಬೆಲೆ ಕೆ.ಜಿಗೆ ₹ 800 ಇತ್ತು. ಬಾಡೂಟ ತಯಾರಿಕೆಗೆ ಅತ್ಯಗತ್ಯವಾದ ಕೊತ್ತಂಬರಿ ಸೊಪ್ಪು ಕಟ್ಟಿಗೆ ₹ 30 ಮತ್ತು ಪುದಿನ ಕಟ್ಟಿಗೆ ₹ 20 ಇತ್ತು. ಸೌತೆ ಕಾಯಿ, ಈರುಳ್ಳಿ, ನಿಂಬೆ ಹಣ್ಣು ವ್ಯಾಪಾರ ಭರ್ಜರಿಯಾಗಿ ನಡೆಯಿತು. ಗ್ರಾಮೀಣ ಭಾಗದಲ್ಲಿ ಮುಂಜಾನೆಯೇ ಕುರಿ ಹಾಗೂ ಮೇಕೆಗಳನ್ನು ಕೊಯ್ದು ಮಾಂಸ ಮಾರಾಟ ಮಾಡಲಾಯಿತು.

ಬಾಡೂಟದ ಘಮಲು

ಊರು ಕೇರಿಗಳಲ್ಲಿ ಬಾಡೂಟದ ಘಮಲು ಜೋರಾಗಿತ್ತು. ಯುಗಾದಿ ದಿನ ಹೋಳಿಗೆ ಸವಿದಿದ್ದ ಮಂದಿ ಮಾಂಸದೂಟದ ರುಚಿ ಸವಿದರು. ಹಬ್ಬಕ್ಕಾಗಿ ಸಿದ್ಧಪಡಿಸಲಾಗಿದ್ದ ಮಾಂಸದ ಸಾರು, ಮುದ್ದೆ, ಬಿರಿಯಾನಿ, ಕಬಾಬ್‌, ಬೋಟಿ ಫ್ರೈ ಸೇರಿದಂತೆ ವಿವಿಧ ಭಕ್ಷ್ಯಗಳು ಮಾಂಸ ಪ್ರಿಯರ ಬಾಯಲ್ಲಿ ನೀರೂರಿಸಿದವು. ಮನೆ ಮಂದಿಯೆಲ್ಲಾ ಒಟ್ಟಿಗೆ ಕುಳಿತು ಬಾಡೂಟ ಸವಿದು ಸಂಭ್ರಮಿಸಿದರು.