ನಗರಸಭೆ ಮೇಲೆ ಎಸಿಬಿ ದಾಳಿ: ಪರಿಶೀಲನೆ

ಮಂಗಳವಾರ ಮಧ್ಯಾಹ್ನ1ಕ್ಕೆ ದಿಢೀರ್‌ನೆ ನಗರಸಭೆಗೆ ದಾಳಿ ನಡೆಸಿ ವಿವಿಧ ವಿಭಾಗಗಳ ಕಡತ ಪರಿಶೀಲನೆ ಮಾಡಿದ ಎಸಿಬಿ ಅಧಿಕಾರಿಗಳು, ನಗರಸಭೆ ವಿರುದ್ಧ ಹಲವು ಅಕ್ರಮ ಆರೋಪ ಮತ್ತು ದೂರು ಕೇಳಿಬಂದಿದ ಹಿನ್ನೆಲೆಯಲ್ಲಿ ದಾಳಿ ನಡೆಸಿ ದಾಖಲೆಗಳ ಅಂಕಿ-ಅಂಶ ತಾಳೆ ಹಾಕಿದರು.

ನಿವೇಶನದ ಕುರಿತು ಫಾರಂ-3 ಅಕ್ರಮ ನೀಡುವುದು, ನಿಯಮ ಉಲ್ಲಂಘಿಸಿ ಕೆಲ ಪರವಾನಗಿ ನೀಡಿರು ವುದು, ಟ್ರೇಡ್ ಲೈಸೆನ್ಸ್ ನೀಡದಿರುವಿಕೆ ಸೇರಿದಂತೆ ಹಲವು ಅಕ್ರಮ ನಗರಸಭೆಯಲ್ಲಿ ನಡೆಯುತ್ತಿವೆ. ಸಿಬ್ಬಂದಿ ಹಣ ಪಡೆದು ಕೆಲಸ ನಿರ್ವಹಿಸುತ್ತಿದ್ದಾರೆ. ಅಲ್ಲದೇ ವಿನಾ ಕಾರಣ ಸಾರ್ವಜನಿಕರನ್ನುಗೋಳಾಡಿಸುತ್ತಾರೆ. ಅರ್ಜಿ ವಿಲೇವಾರಿ ಮಾಡದೆ ಕಾಲಹರಣ ಮಾಡಲಾಗುತ್ತಿದೆ ಎಂದು ಹಲವರು ಎಸಿಬಿಗೆ ದೂರು ಸಲ್ಲಿಸಿದ್ದರು.

ಎಸಿಬಿ ಡಿಎಸ್‌ಪಿ ಶಿವರಾಜ ನೇತೃತ್ವದಲ್ಲಿ ಅಧಿಕಾರಿಗಳು ದಿಢೀರ್ ದಾಳಿ ನಡೆಸಿ ಸಿಬ್ಬಂದಿಯನ್ನು ಕಚೇರಿಯಲ್ಲಿ ಕೂಡಿಸಿಕೊಂಡು ದಾಖಲೆ ಪರಿಶೀಲನೆ ನಡೆಸಿದರು. ಒಂದೊಂದು ವಿಭಾಗದ ದಾಖಲೆಗಳನ್ನು, ದೂರಿನಲ್ಲಿರುವ ಅಂಶಗಳನ್ನು ತಾಳೆ ಹಾಕಿ ನೋಡಿದರು. ರಾತ್ರಿವರೆಗೂ ಪರಿಶೀಲನೆ ಮುಂದುವರೆದಿದ್ದು, ಸಾರ್ವಜನಿಕರಿಗೆ ನಗರಸಭೆ ಕಚೇರಿ ಒಳಗೆ ಪ್ರವೇಶ ನೀಡಿರಲಿಲ್ಲ. ಪರಿಶೀಲನೆಯು ಪೂರ್ಣಗೊಂಡ ಬಳಿಕ ವಿವರ ನೀಡುವುದಾಗಿ ಎಸಿಬಿ ಅಧಿಕಾರಿಗಳು ತಿಳಿಸಿದರು.