ಭಾಗ್ಯನಗರ: ಬನಶಂಕರಿ ರಥೋತ್ಸವ

ಬೆಳಿಗ್ಗೆಯಿಂದಲೇ ಬನಶಂಕರಿ ದೇವಿಗೆ ತರಹೇವಾರಿ ಹೂಗಳಿಂದ ಅಲಂಕಾರ ಮಾಡಿ ವಿಶೇಷ ಪೂಜೆ ಸಲ್ಲಿಸಲಾಗಿತ್ತು. ಸಂಜೆಯವರೆಗೂ ವಿವಿಧ ಧಾರ್ಮಿಕ ಕಾರ್ಯಕ್ರಮಗಳು ನಡೆದವು. ಗೋದೂಳಿಯ ಸಮಯದಲ್ಲಿ ಎಳೆದ ತೇರಿಗೆ ಭಕ್ತರು ಉತ್ತುತ್ತಿ ಎಸೆದು ಭಕ್ತಿ ಸಮರ್ಪಿಸಿದರು. ಬಳಿಕ ತೇರು ಮುಟ್ಟಿ ನಮಸ್ಕರಿಸಿದರು.

ಕೇಸರಿ, ಬಿಳಿ ಹಾಗೂ ಹಸಿರಿನ ರಾಷ್ಟ್ರಧ್ವಜದ ಬಣ್ಣಗಳಿಂದ ತೇರಿನ ಮೇಲ್ಬಾಗವನ್ನು ಅಲಂಕರಿಸಿ ಕೆಳಗಡೆ ಹೂವಿನಿಂದ ಅಲಂಕಾರ ಮಾಡಲಾಗಿತ್ತು.

ಸಂಜೆ ಆರು ಗಂಟೆಯಾಗುತ್ತಿದ್ದಂತೆಯೇ ಭಕ್ತರು ಭಕ್ತಿಯಿಂದ ತೇರು ಎಳೆದರು. ಪಾದಗಟ್ಟೆ ಮುಟ್ಟುವ ತನಕ ಪ‍ರಸ್ಪರ ಕೈ ಜೋಡಿಸಿ ಸಂಭ್ರಮಿಸಿದರು. ಮಕ್ಕಳ ಆಟಿಕೆ ಸಾಮಗ್ರಿಗಳು, ಬಲೂನ್‌ಗಳು ಆಕರ್ಷಣೆಯಾಗಿದ್ದವು. ಜಾತ್ರೆಯ ಅಂಗವಾಗಿ ದೇವಸ್ಥಾನವನ್ನು ವಿವಿಧ ವಿದ್ಯುತ್‌ ದೀಪಗಳಿಂದ ಅಲಂಕಾರ ಮಾಡಲಾಗಿತ್ತು. ರಾತ್ರಿ ತನಕವೂ ಭಕ್ತರು ಕಾಯಿ ಒಡೆಯಿಸಿಕೊಂಡು, ದೇವಿ ಮೂರ್ತಿಗೆ ಹೂ, ಹಣ್ಣು ಸಮರ್ಪಣೆ ಮಾಡಿ ಆಶೀರ್ವಾದ ಪಡೆಯುತ್ತಿದ್ದ ಚಿತ್ರಣ ಕಂಡು ಬಂತು.