‘ಲೀಕ್‌ಔಟ್‌’ ರಂಗಪ್ರಯೋಗ

ಅಕ್ಷತಾ ಅವರ ನಟನೆಯೇ ವಿಶಿಷ್ಟ. ಪ್ರೇಕ್ಷಕರನ್ನೇ ಪಾತ್ರಧಾರಿಗಳನ್ನಾಗಿಸಿ ರಂಗಸಜ್ಜಿಕೆಗೆ ತರುವ ಕೌಶಲ ಅವರಲ್ಲಿದೆ. ಲೀಕ್‍ಔಟ್ ರಂಗಪ್ರಯೋಗ ಆಧುನಿಕ ಜಗತ್ತಿನ ಸಮಸ್ಯೆಗಳ ಜತೆಗೆ ಅನುಸಂಧಾನ ಮಾಡುವ ಮೂಲಕ ಹೆಣ್ಣಿನ ಆಂತರ್ಯದ ತಲ್ಲಣಗಳನ್ನು ಹಿಡಿಯುವ ಪ್ರಯತ್ನ ಮಾಡಿದೆ.

ರಾಷ್ಟ್ರೀಯ ನಾಟಕ ಶಾಲೆಯ ಪದವೀಧರರಾಗಿರುವ ಅಕ್ಷತಾ ರಂಗಭೂಮಿಯ ಜತೆಗೆ ಸಿನಿಮಾ ಕ್ಷೇತ್ರದಲ್ಲೂ ಗುರುತಿಸಿಕೊಂಡಿದ್ದಾರೆ. ‘ಪಲ್ಲಟ’ ಚಿತ್ರದಲ್ಲಿನ ಅಭಿನಯಕ್ಕೆ ರಾಜ್ಯ ಪ್ರಶಸ್ತಿ ಪಡೆದುಕೊಂಡಿದ್ದಾರೆ. ಇವರಿಗೆ ‘ಪಿಂಕಿ ಎಲ್ಲಿ’ ಚಿತ್ರದಲ್ಲಿನ ಅಭಿನಯಕ್ಕೆ ಅಂತರರಾಷ್ಟ್ರೀಯ ಪ್ರಶಸ್ತಿಯೂ ಲಭಿಸಿದೆ.

ಇವರು ಸರಳವಾದ ರಂಗ ಸಜ್ಜಿಕೆಯೊಂದಿಗೆ ಪ್ರೇಕ್ಷಕರನ್ನು ತಮ್ಮೆಡೆಗೆ ಸೆಳೆಯುತ್ತ ಕಥೆಯೊಳಗೆ ಸೇರಿಸಿಕೊಂಡು ಪ್ರತಿಯೊಬ್ಬರ ಆಂತರ್ಯದ ಕಥೆಗಳಿಗೆ ಜಾಗ ನೀಡುತ್ತಾರೆ. ಎಲ್ಲರ ಸುಪ್ತ ಭಾವಗಳನ್ನು ಹೊರತರುವುದರ ಜತೆಗೆ ಅಳು, ಸಂಕಟ, ನೋವು ಹಾಗೂ ಹತಾಶೆ ವ್ಯಕ್ತಪಡಿಸಲು ಅವಕಾಶ ನೀಡುವರು. ‘ಎಲ್ಲರೊಳಗೂ ಕಥೆಗಳಿವೆ. ನಟರಿದ್ದಾರೆ’ ಎನ್ನುತ್ತಾರೆ ಅಕ್ಷತಾ.