ಶುಕ್ರವಾರ, ಡಿಸೆಂಬರ್ 13, 2019
26 °C

ಕುಡುಕರ ತಾಣವಾದ ಮಂಥನ ಸಭಾಂಗಣ

ಶಿವಕುಮಾರ್.ಕೆ Updated:

ಅಕ್ಷರ ಗಾತ್ರ : | |

Prajavani

ಗಂಗಾವತಿ: ಸ್ವಚ್ಛತೆ ಹಾಗೂ ಇತರ ವಿಷಯಗಳ ಬಗ್ಗೆ ಸಾರ್ವಜನಿಕರಿಗೆ ಜಾಗೃತಿ ಮೂಡಿಸಬೇಕಾದ ತಾಲ್ಲೂಕು ಕೇಂದ್ರ ಕಚೇರಿಯು ಅಸ್ವಚ್ಛತೆಯಿಂದ ಕೂಡಿದ್ದು, ಇದರ ಸಭಾಂಗಣವು ಕುಡುಕರ ತಾಣವಾಗುತ್ತಿದೆ.

ಸ್ವಚ್ಛ ಭಾರತ ಮಿಷನ್, ಬಯಲು ಶೌಚಮುಕ್ತ, ಪ್ಲಾಸ್ಟಿಕ್ ಮುಕ್ತ ನಗರ ಸೇರಿದಂತೆ ಇತರ ಅನೇಕ ಯೋಜನೆಗಳ ಬಗ್ಗೆ ಜನರಲ್ಲಿ ಜಾಗೃತಿ ಮೂಡಿಸಬೇಕಾದ ಕಚೇರಿಯೇ ಈ ಸ್ಥಿತಿಗೆ ತಲುಪಿರುವುದು ದುರಂತ. 

ನೂರಾರು ಜನರು ನಾನಾ ಕೆಲಸ ಕಾರ್ಯಗಳಿಗೆ ತಾಲ್ಲೂಕು ಪಂಚಾಯಿತಿ ಕಚೇರಿಗೆ ನಿತ್ಯ ಬರುತ್ತಾರೆ. ಆದರೆ, ಜನರ ಸಮಸ್ಯೆಗೆ ಸ್ಪಂದಿಸಬೇಕಾದ ಕಚೇರಿಯ ಮಂಥನ ಸಭಾಂಗಣವು ಕುಡುಕರ ಸಭಾಂಗಣವಾಗಿ ಮಾರ್ಪಟ್ಟಿದೆ.

ಸಭಾಂಗಣದ ಆವರಣದ ಸುತ್ತಲೂ ಎಲ್ಲಿ ನೋಡಿದರೂ, ಮದ್ಯದ ಬಾಟಲಿಗಳು ಕಾಣಸಿಗುತ್ತವೆ. ಸಂಜೆಯಾದರೆ ಸಾಕು ಕುಡುಕರ ಸಭಾಂಗಣವಾಗಿ ಮಾರ್ಪಾಡಾಗಿರುತ್ತದೆ. ಸಭಾಂಗಣ ಕಟ್ಟಡದ ಗೋಡೆಗಳಲ್ಲಿ ತಂಬಾಕು ಉಗಿದಿರುವ ದೃಶ್ಯಗಳು, ಸಭಾಂಗಣದ ದ್ವಾರ ಭಾಗದಲ್ಲೇ ಎಲ್ಲೆಂದರಲ್ಲಿ ಬಿಸಾಡಿರುವ ಮದ್ಯದ ಬಾಟಲಿಗಳು, ಪಾಕೇಟ್‌ಗಳು ಕಣ್ಣಿಗೆ ರಾಚುತ್ತವೆ. ಇಷ್ಟೆಲ್ಲ ನಡೆಯುತ್ತಿದ್ದರೂ ಯಾವ ಅಧಿಕಾರಿಗಳು ಸಂಬಂಧಿಸಿದವರ ವಿರುದ್ಧ ಕ್ರಮ ಕೈಗೊಳ್ಳುತ್ತಿಲ್ಲ.

ಸಭಾಂಗಣದ ಪಕ್ಕದಲ್ಲೇ ಗ್ರಂಥಾಲಯವಿದ್ದು, ನಿತ್ಯ ನೂರಾರು ಓದುಗರು ಗ್ರಂಥಾಲಯಕ್ಕೆ ಬರುತ್ತಾರೆ. ಆದರೆ, ಗ್ರಂಥಾಲಯದ ಸುತ್ತಲೂ ಮದ್ಯದ ಬಾಟಲಿಗಳು ಕಾಣಸಿಗುತ್ತವೆ. ಇದರಿಂದ ಓದುಗರು ಸಾಕಷ್ಟು ತೊಂದರೆ ಅನುಭವಿಸುತ್ತಿದ್ದು, ಈ ಬಗ್ಗೆ ಅಧಿಕಾರಿಗಳ ಗಮನಕ್ಕೆ ತಂದರೂ ಯಾವುದೇ ಪ್ರಯೋಜನವಾಗಿಲ್ಲ ಎಂದು ಓದುಗರು ಅಳಲು ತೋಡಿಕೊಳ್ಳುತ್ತಾರೆ.

ಸಭಾಂಗಣದ ಮುಂಭಾಗದಲ್ಲಿ ಸಾಮಾರ್ಥ್ಯ ಸೌಧ, ಕನ್ನಡ ಸಾಹಿತ್ಯ ಭವನ ಹಾಗೂ ಕೃಷ್ಣದೇವರಾಯ ಭವನವೂ ಇದೆ. ಇಲ್ಲಿ ನಿತ್ಯ ಸಾಹಿತಿಗಳು, ವಿವಿಧ ಇಲಾಖೆ ಅಧಿಕಾರಿಗಳು, ಆಶಾ ಕಾರ್ಯಕರ್ತೆಯರು, ಅಂಗನವಾಡಿ ಕಾರ್ಯಕರ್ತೆಯರು ಬಂದು ಸಭೆ ನಡೆಸುತ್ತಾರೆ. ಆದರೆ, ಸಂಜೆಯಾದರೆ ಸಾಕು ಸಭಾಂಗಣದ ಆವರಣ ಕುಡುಕರ ಅಡ್ಡೆಯಾಗುತ್ತಿರುವುದು ಬೇಸರದ ಸಂಗತಿ ಎಂದು ಸಾರ್ವಜನಿಕರು ದೂರುತ್ತಾರೆ. 

ಪ್ರತಿಕ್ರಿಯಿಸಿ (+)

ಈ ವಿಭಾಗದಿಂದ ಇನ್ನಷ್ಟು