ಗುರುವಾರ , ಜನವರಿ 21, 2021
16 °C

ಬಂಡೀಪುರ: 2 ಹುಲಿ, 1 ಆನೆ ಸಾವು

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

Deccan Herald

ಮೈಸೂರು/ಹುಣಸೂರು/ಗುಂಡ್ಲುಪೇಟೆ: ಒಂದೇ ದಿನ ಬಂಡೀಪುರ ಹಾಗೂ ನಾಗರಹೊಳೆ ಹುಲಿ ಸಂರಕ್ಷಿತ ಪ್ರದೇಶದಲ್ಲಿ ಎರಡು ಹುಲಿ ಹಾಗೂ ಆನೆ ಮೃತದೇಹ ಸಿಕ್ಕಿದೆ.

ಬಂಡೀಪುರದ ಗೋಪಾಲಸ್ವಾಮಿ ಬೆಟ್ಟ ವಲಯದಲ್ಲಿ ಕಳೆದೆರಡು ದಿನಗಳಿಂದ ರೈತರಲ್ಲಿ ಆತಂಕ ಸೃಷ್ಟಿಸಿದ್ದ ಗಂಡು ಹುಲಿಯ ಮೃತದೇಹ ಶುಕ್ರವಾರ ಪತ್ತೆಯಾಗಿದೆ. ನಾಗರಹೊಳೆ ಕಲ್ಲಹಳ್ಳ ವಲಯದ ಮೂರ್ಕಲ್‌ ಬೀಟ್‌ನಲ್ಲಿ 10 ವರ್ಷ ವಯಸ್ಸಿನ ಗಂಡು ಹುಲಿಯ ಮೃತದೇಹ ಸಿಕ್ಕಿದೆ. ದಟ್ಟ ಕಾಡಿನ ನಡುವೆ ಗಂಡಾನೆ ಶವ ದೊರೆತಿದೆ.

ಗೋಪಾಲಸ್ವಾಮಿ ಬೆಟ್ಟ ವಲಯದ ಸೋಮೇಶ್ವರ ದೇವಸ್ಥಾನದ ಬಳಿ ಪತ್ತೆಯಾಗಿರುವ ಶವವು ಆತಂಕ ಸೃಷ್ಟಿಸಿದ್ದ ಹುಲಿಯದ್ದೇ ಇರಬಹುದು ಎಂದು ಶಂಕಿಸಲಾಗಿದೆ. 10ರಿಂದ 12 ವರ್ಷ ವಯಸ್ಸಾಗಿದ್ದು, ಸ್ವಾಭಾವಿಕವಾಗಿ ಮೃತಪಟ್ಟಿರಬಹುದು ಎಂದು ಅರಣ್ಯ ಇಲಾಖೆ ಅಧಿಕಾರಿಗಳು ತಿಳಿಸಿದ್ದಾರೆ.

ನಾಗರಹೊಳೆ ಮೂರ್ಕಲ್‌ ಬೀಟ್‌ನಲ್ಲಿ ಪತ್ತೆಯಾಗಿರುವ ಹುಲಿಯ ಮೃತದೇಹದಲ್ಲಿ ಯಾವುದೇ ಆಹಾರ ಇರಲಿಲ್ಲ. ಸುಮಾರು 10 ವರ್ಷ ವಯಸ್ಸಿನದು ಎಂದು ಅಂದಾಜು ಮಾಡಲಾಗಿದೆ. ಮುಖ, ದೇಹದ ಅಲ್ಲಲ್ಲಿ ಗಾಯಗಳಾಗಿವೆ. ಬೇರೊಂದು ಹುಲಿ ಜತೆಗೆ ಕಾದಾಟ ನಡೆಸಿ ಗಾಯಗೊಂಡ ನಂತರ ಆಹಾರ ಸೇವಿಸಲಾಗದೆ ಮೃತಪಟ್ಟಿರಬಹುದು ಎಂದು ಶಂಕಿಸಲಾಗಿದೆ.

ಆನೆಯ ಶವ ಪತ್ತೆ: ನಾಗರಹೊಳೆ ಕಲ್ಲಹಳ್ಳ ವಲಯದ ಕೊಳಂಗೆರೆ ಬೀಟ್ ಬಳಿ ದಟ್ಟ ಕಾಡಿನ ನಡುವೆ 30ರಿಂದ 35 ವರ್ಷ ವಯಸ್ಸಿನ ಗಂಡಾನೆ ಮೃತದೇಹ ಸಿಕ್ಕಿದೆ. ಮತ್ತೊಂದು ಆನೆಯೊಂದಿಗೆ ಕಾದಾಟ ನಡೆಸಿರುವ ಕುರುಹುಗಳು ಸ್ಥಳದಲ್ಲಿ ಕಂಡು ಬಂದಿವೆ. ಇದರ ಗುದದ್ವಾರ, ಹೊಟ್ಟೆ ಭಾಗಕ್ಕೆ ಮತ್ತೊಂದು ಆನೆ ತಿವಿದು ಗಾಯಗೊಳಿಸಿದೆ.

ಸಿಕ್ಕಿರುವ ಹುಲಿ, ಆನೆ ಮೃತದೇಹಗಳ ಎಲ್ಲ ಭಾಗಗಳೂ ಲಭ್ಯವಾಗಿವೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು