ಬ್ಯೂಟಿಪಾರ್ಲರ್‌ಗಳಿಗೆ ತಟ್ಟಿದ ಕಳಂಕ

7

ಬ್ಯೂಟಿಪಾರ್ಲರ್‌ಗಳಿಗೆ ತಟ್ಟಿದ ಕಳಂಕ

Published:
Updated:
Deccan Herald

ವೇಶ್ಯಾವಾಟಿಕೆಯ ಕಬಂಧಬಾಹುಗಳು ನಗರದ ಎಲ್ಲೆಡೆ ಚಾಚಿವೆ. ಹೃದಯಭಾಗದಿಂದ ಹಿಡಿದು ಹೊರವಲಯದವರೆಗೂ, ಸುಸಂಸ್ಕೃತರಿರುವ ಬೀದಿಗಳಿಂದಿಡಿದು ಪಡ್ಡೆ ಹುಡುಗರು ಇರುವ ಬೀದಿಗಳವರೆಗೆ, ಚಲಿಸುವ ವಾಹನಗಳಿಂದ ನಿಂತಿರುವ ವಾಹನಗಳವರೆಗೆ... ಹೀಗೆ ಹೇಳುತ್ತಾ ಹೋದರೆ ವೇಶ್ಯಾವಾಟಿಕೆಯ ಆಳ ಅಗಲಗಳು ಗೋಚರಿಸಲಾರಂಭಿಸುತ್ತವೆ.

ಇದೀಗ ಬ್ಯೂಟಿಪಾರ್ಲರ್‌ಗಳಲ್ಲಿ ವೇಶ್ಯಾವಾಟಿಕೆ ನಡೆಯುತ್ತಿದೆ ಎಂಬ ಆರೋಪ ಕೇಳಿ ಬಂದಿದ್ದು, ಸುಸಂಸ್ಕೃತ ಬ್ಯೂಟಿಪಾರ್ಲರ್‌ಗಳ ಸೌಂದರ್ಯತಜ್ಞರು ಬೆಚ್ಚಿ ಬಿದ್ದಿದ್ದಾರೆ. ಒಂದೆರಡು ಕಡೆ ನಡೆಯುತ್ತಿರುವ ಮಾಹಿತಿ ಆಧರಿಸಿ ಪೊಲೀಸರು ದಾಳಿ ನಡೆಸಿ ಕೆಲವರನ್ನು ಬಂಧಿಸಿದ ಬಳಿಕ ಪಾಲಿಕೆ ಅಧಿಕಾರಿಗಳು ಎಚ್ಚೆತ್ತು ಎಲ್ಲ ಪಾರ್ಲರ್‌ಗಳ ಮೇಲೆ ದಾಳಿ ನಡೆಸಿ ಪರಿಶೀಲನೆ ನಡೆಸಿದ್ದಾರೆ. ಈ ಕಳಂಕದಿಂದ ನಾಗರಿಕ ಸಮಾಜ ತಲ್ಲಣಿಸಿದೆ.

ಬ್ಯೂಟಿಪಾರ್ಲರ್‌ಗಳಿಗೆ ಹೋಗದ ಮಹಿಳೆಯರೇ ಇಲ್ಲ ಎನಿಸುವಷ್ಟರಮಟ್ಟಿಗೆ ಅದರ ಅಗತ್ಯ ಇದೆ. ನೂರಾರು ಸಂಖ್ಯೆಯಲ್ಲಿ, ಗಲ್ಲಿಗಲ್ಲಿಗಳಲ್ಲಿ ಇಂತಹ ಪಾರ್ಲರ್‌ಗಳು ತಲೆ ಎತ್ತಿವೆ. ಹಲವು ಮಂದಿ ಬ್ಯೂಟಿಷಿಯನ್ ಕೋರ್ಸ್‌ಗಳನ್ನು ಕಲಿತು ಜೀವನ ನಿರ್ವಹಿಸುತ್ತಿದ್ದಾರೆ. ಇವರೆಲ್ಲ ಈಗ ತಟ್ಟಿರುವ ಕಳಂಕದಿಂದ ರೋಸಿ ಹೋಗಿದ್ದಾರೆ.

ನಿಜಕ್ಕೂ ಬ್ಯೂಟಿಪಾರ್ಲರ್‌ಗಳು ವೇಶ್ಯಾವಾಟಿಕೆಯ ಅಡ್ಡೆಗಳಾಗಿವೆಯೇ ಎಂದು ನೋಡಿದರೆ ಸಿಗುವ ವಾಸ್ತವ ಅಂಶವೇ ಬೇರೆ. ವೇಶ್ಯಾವಾಟಿಕೆಯ ಅಡ್ಡೆಗಳಾಗಿ ಕೇವಲ ಬ್ಯೂಟಿಪಾರ್ಲರ್‌ಗಳು ಮಾತ್ರವೇ ಆಗಿಲ್ಲ ಬದಲಿಗೆ ಬಾಡಿಗೆ ಮನೆಗಳು, ಹೋಟೆಲ್‌ಗಳು, ವಾಹನಗಳು, ಲಾಡ್ಜ್‌ಗಳು... ಹೀಗೆ ಎಲ್ಲವೂ ವೇಶ್ಯಾವಾಟಿಕೆಯ ತಾಣಗಳೇ ಆಗಿವೆ. ಆದರೆ, ತಟ್ಟಿರುವ ಕಳಂಕ ಮಾತ್ರ ಬ್ಯೂಟಿಪಾರ್ಲರ್‌ಗಳ ಮೇಲೆ.

ಈಚೆಗೆ ಒಂದೆರಡು ಪಾರ್ಲರ್‌ಗಳಲ್ಲಿ ಇಂತಹ ವ್ಯವಹಾರಗಳು ಪತ್ತೆಯಾಗಿವೆ ನಿಜ. ಆದರೆ, ಎಲ್ಲ ಪಾರ್ಲರ್‌ಗಳಲ್ಲೂ ಇಂತಹ ಚಟುವಟಿಕೆಗಳು ನಡೆಯುತ್ತಿಲ್ಲ ಎಂಬುದನ್ನು ಸಾರ್ವಜನಿಕರು ಅರಿಯಬೇಕಾಗಿದೆ. ಪೊಲೀಸರೂ ಅನಾವಶ್ಯಕವಾಗಿ ಇಂತಹ ಪಾರ್ಲರ್‌ಗಳ ಮೇಲೆ ದಾಳಿ ನಡೆಸಬಾರದು. ಲೈಸೆನ್ಸ್ ಇಲ್ಲ ಎಂಬ ಮಾತ್ರಕ್ಕೆ ಅವೆಲ್ಲವೂ ಅವ್ಯವಹಾರಗಳ ತಾಣವಾಗಿದೆ ಎಂದರ್ಥವಲ್ಲ.

ನಗರದಲ್ಲಿ ಸುಮಾರು 250ಕ್ಕೂ ಅಧಿಕ ಬ್ಯೂಟಿಪಾರ್ಲರ್‌ಗಳು ಅಕ್ರಮವಾಗಿ ನಡೆಯುತ್ತಿವೆ ಎಂಬ ಒಂದು ಅಂದಾಜು ಇದೆ. ಇಲ್ಲಿ ಏನು ನಡೆಯುತ್ತಿದೆ ಎಂದು ಮೊದಲು ಪೊಲೀಸರು, ಪಾಲಿಕೆ ಅಧಿಕಾರಿಗಳು ಪರಿಶೀಲಿಸಬೇಕು. ಲೈಸೆನ್ಸ್ ತೆಗೆದುಕೊಳ್ಳದೇ ಇರುವುದಕ್ಕೆ ಕಾರಣ ಪತ್ತೆ ಹಚ್ಚಬೇಕು. ಅಕ್ಕಪಕ್ಕ ಮನೆಯವರನ್ನು, ಅಂಗಡಿಯವರನ್ನು ವಿಚಾರಿಸಬೇಕು. ಆಗ ಮಾತ್ರ ಇಂತಹ ಪ್ರವೃತ್ತಿಗೆ ಕಡಿವಾಣ ಬೀಳುತ್ತದೆ.

ಮೈಸೂರು ಜಿಲ್ಲಾ ಬ್ಯೂಟಿ ಪಾರ್ಲರ್ ಮಾಲೀಕರ ಸಂಘದವರೂ ಇದೇ ಬೇಡಿಕೆ ಮುಂದಿಡುತ್ತಾರೆ. ವೇಶ್ಯಾವಾಟಿಕೆಯ ಜತೆ ಬ್ಯೂಟಿಪಾರ್ಲರ್‌ಗಳನ್ನು ತಳಕು ಹಾಕಬೇಡಿ ಎಂದು ಕೈ ಜೋಡಿಸುತ್ತಾರೆ.

ನಾಲ್ಕು ದಿನಗಳ ಹಿಂದೆಯಷ್ಟೇ ಅಗ್ರಹಾರದಲ್ಲಿ ವಾಸವಿದ್ದ ಪ್ರಖ್ಯಾತ ವೀಣೆ ವಿದ್ವಾಂಸ ಶಾಮಣ್ಣ ಅವರ ಬೀದಿಯಲ್ಲಿ ಎಲ್ಲವೂ ಸಕುಟುಂಬ ಪರಿವಾರ ಸಮೇತ ವಾಸವಿದ್ದವರೇ ಇದ್ದಾರೆ. ಆದರೆ, ಅಲ್ಲೊಂದು ಮನೆಯಲ್ಲಿ ವೇಶ್ಯಾವಾಟಿಕೆಯನ್ನು ಗುರುತಿಸಿ ಪೊಲೀಸರು ಮೂವರನ್ನು ಬಂಧಿಸಿದರು. ರಮಾವಿಲಾಸ ರಸ್ತೆಯಲ್ಲಿ ಯೋಗ ಸೆಂಟರ್ ಹೆಸರಿನಲ್ಲಿ ವೇಶ್ಯಾವಾಟಿಕೆ ನಡೆಯುತ್ತಿತ್ತು. ಅಂದ ಮೇಲೆ ವೇಶ್ಯವಾಟಿಕೆಗೆ ಇಂತಹದೇ ನೆಲೆ ಎಂಬುದಿಲ್ಲ.

ವೇಶ್ಯಾವಾಟಿಕೆಗೆ ಮೊದಲು ನೀರೆರೆಯುವುದು ಪೊಲೀಸರೇ ಎಂಬುದು ತನಿಖೆ ವೇಳೆ ಪತ್ತೆಯಾದ ಡೈರಿಯೊಂದರಿಂದ ಬಹಿರಂಗೊಂಡಿದೆ. ಸ್ಥಳೀಯ ಪೊಲೀಸರು ಹಣ ಪಡೆದು ಇಂತಹ ಚಟುವಟಿಕೆ ನಿರಾಂತಕವಾಗಿ ನಡೆಯಲಿ ಎಂದು ಸುಮ್ಮನಿರುತ್ತಾರೆ ಎಂಬ ಆರೋಪ ಕೇಳಿ ಬಂದಿದೆ.

ನಗರದಲ್ಲಿ ಒಡನಾಡಿ ಸಂಸ್ಥೆಯ ಸಹಾಯ ಪಡೆದು ಪೊಲೀಸರು ಬೇಧಿಸಿರುವ ವೇಶ್ಯಾವಾಟಿಕೆಯ ಕೈಗಳು ದೂರದ ಬಾಂಗ್ಲಾದೇಶದಲ್ಲೂ ಗೋಚರಿಸುತ್ತಿವೆ. ಈಚೆಗೆ ಪತ್ತೆಯಾದ ವೇಶ್ಯಾವಾಟಿಕೆ ಅಡ್ಡೆಯೊಂದರಲ್ಲಿ 7 ಮಂದಿ ಬಾಂಗ್ಲಾ ಯುವತಿಯರನ್ನು ರಕ್ಷಿಸಲಾಗಿದೆ.

ಆನ್‌ಲೈನ್‌ ವೇಶ್ಯಾವಾಟಿಕೆ‌: ಆನ್‌ಲೈನ್‌ನಲ್ಲಿ ಬರುವ ಕೆಲವೊಂದು ಜಾಹೀರಾತುಗಳು ವೇಶ್ಯಾವಾಟಿಕೆಗೆ ಆಹ್ವಾನ ನೀಡುತ್ತವೆ. ‘ನೀವಿರುವ ಪ್ರದೇಶದಲ್ಲಿರುವ ಮಹಿಳೆಯೊಂದಿಗೆ ಸುಂದರ ಕ್ಷಣ ಕಳೆಯಿರಿ’ ಎಂಬರ್ಥದ ಇಂಗ್ಲಿಷ್ ಭಾಷೆಯ ಜಾಹೀರಾತು ಕಂಡು ಮೋಸ ಹೋದವರೂ ಇದ್ದಾರೆ. ಬಹಳಷ್ಟು ಬಾರಿ ಮೋಸ ಹೋದವರು ಮರ್ಯಾದೆಗೆ ಅಂಜಿ ದೂರು ಕೊಡುವುದೇ ಇಲ್ಲ.

ಬ್ಯೂಟಿಷಿಯನ್ ಮತ್ತು ಬ್ಯೂಟಿಪಾರ್ಲರ್‌ ಮಾಲೀಕರ ಸಂಘ ಅಧ್ಯಕ್ಷೆ ಎ.ಸಿ.ಸುಜಾತಾ ಅವರು, ‘ಅನಧಿಕೃತ ಬ್ಯೂಟಿಪಾರ್ಲರ್‌ಗಳ ಪಟ್ಟಿಯನ್ನು ಪಾಲಿಕೆ ಮತ್ತು ಪೋಲಿಸರಿಗೆ ಸಲ್ಲಿಸಿದರೂ ಯಾವುದೇ ಕ್ರಮ ತೆಗೆದುಕೊಂಡಿಲ್ಲ’ ಎಂದು ಹೇಳುತ್ತಾರೆ.

ಜನತೆ ಎಲ್ಲ ಬ್ಯೂಟಿಪಾರ್ಲರ್‌ಗಳತ್ತ ಸಂಶಯದಿಂದ ನೋಡಬಾರದು ಎಂದು ಅವರು ಮನವಿ ಮಾಡುತ್ತಾರೆ. ಇವರ ಮಾತು ಅಕ್ಷರಶಃ ನಿಜ. ವೇಶ್ಯಾವಾಟಿಕೆಗೆ ಅಮಾಯಕರನ್ನು ದೂಡಲು ಮಾಧ್ಯಮವನ್ನಾಗಿ ಕೆಲವರು ಬ್ಯೂಟಿಪಾರ್ಲರ್‌ಗಳನ್ನು ಬಳಸಿಕೊಳ್ಳುತ್ತಿದ್ದಾರೆ. ಹೊರಗಡೆ ಯೋಗ ತರಬೇತಿ ಎಂದೋ, ಬ್ಯೂಟಿಪಾರ್ಲರ್‌ ಎಂದೋ ಬೋರ್ಡ್‌ ಹಾಕಿ ಒಳಗಡೆ ಇಂತಹ ವ್ಯವಹಾರ ನಡೆಸುತ್ತಾರೆ. ಪೊಲೀಸರು ಸರಿಯಾದ ತಪಾಸಣೆ ವಹಿಸಿದರೆ, ನಿಗಾ ಇಟ್ಟರೆ ಖಂಡಿತಾ ಇಂತಹ ಅನಧಿಕೃತ ಅವ್ಯವಹಾರಗಳನ್ನು ತಡೆಯಬಹುದು.

 

 

Tags: 

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !