‘ಈದ್‌ ಉಲ್‌ ಫಿತ್ರ್’ ಆಚರಣೆ ಇಂದು

ಗುರುವಾರ , ಜೂನ್ 20, 2019
24 °C
ಒಂದು ತಿಂಗಳ ರಂಜಾನ್‌ ಉಪವಾಸಕ್ಕೆ ತೆರೆ; ನಗರದ ವಿವಿಧೆಡೆ ಭದ್ರತೆ

‘ಈದ್‌ ಉಲ್‌ ಫಿತ್ರ್’ ಆಚರಣೆ ಇಂದು

Published:
Updated:
Prajavani

ಮೈಸೂರು: ಮುಸ್ಲಿಮರ ಪವಿತ್ರ ಮಾಸ ರಂಜಾನ್‌ ತಿಂಗಳು ಮಂಗಳವಾರ ಕೊನೆಗೊಂಡಿದ್ದು, ಜೂನ್‌ 5 ರಂದು (ಬುಧವಾರ) ‘ಈದ್ ಉಲ್‌ ಫಿತ್ರ್’ ಹಬ್ಬ ಆಚರಿಸಲಾಗುತ್ತದೆ.

ಸರ್ಖಾಜಿ ಮೊಹಮ್ಮದ್‌ ಉಸ್ಮಾನ್‌ ಷರೀಫ್‌ ಅಧ್ಯಕ್ಷತೆಯಲ್ಲಿ ಮಂಗಳವಾರ ರಾತ್ರಿ ನಡೆದ ಚಂದ್ರ ದರ್ಶನ ಸಮಿತಿ ಸಭೆಯ ಬಳಿಕ ‘ಈದುಲ್‌ ಫಿತ್ರ್’ ಬುಧವಾರ ಆಚರಿಸಲು ನಿರ್ಧರಿಸಲಾಯಿತು.

ತಿಲಕ್‌ ನಗರ, ರಾಜೀವ್‌ ನಗರ ಮತ್ತು ಗೌಸಿಯಾ ನಗರದ ಈದ್ಗಾಗಳಲ್ಲಿ ಅಲ್ಲದೆ, ನಗರದ ವಿವಿಧೆಡೆಯಿರುವ ಮಸೀದಿಗಳಲ್ಲಿ ಬುಧವಾರ ಬೆಳಿಗ್ಗೆ ಈದ್‌ ನಮಾಜ್‌ ಹಾಗೂ ಖುತ್ಬಾ (ಪ್ರವಚನ) ನಡೆಯಲಿದೆ.

ತಿಲಕ್‌ ನಗರದ ಈದ್ಗಾದಲ್ಲಿ ಬೆಳಿಗ್ಗೆ 10.30ಕ್ಕೆ ನಡೆಯಲಿರುವ ನಮಾಜ್‌ಗೆ ಸರ್ಖಾಜಿ ಉಸ್ಮಾನ್ ಷರೀಫ್ ಅವರು ನೇತೃತ್ವ ವಹಿಸಲಿದ್ದಾರೆ. ನಮಾಜ್‌ ಬಳಿಕ ಪರಸ್ಪರರು ಶುಭ ಹಾರೈಸಲಿದ್ದಾರೆ. ಗೆಳೆಯರು ಮತ್ತು ಸಂಬಂಧಿಕರ ಮನೆಗೆ ಭೇಟಿಕೊಡಲಿದ್ದಾರೆ.

ರಂಜಾನ್‌ ತಿಂಗಳಲ್ಲಿ ಮುಸ್ಲಿಮರು ಶ್ರದ್ಧೆ ಹಾಗೂ ಭಕ್ತಿಯಿಂದ ಉಪವಾಸ ಆಚರಿಸುವರು. ಶವ್ವಾಲ್‌ ತಿಂಗಳ ಚಂದ್ರದರ್ಶನವಾದರೆ ಈದುಲ್‌ ಫಿತ್ರ್‌ ಆಚರಣೆ ನಡೆಯುತ್ತದೆ. ಈ ಹಬ್ಬ ಶಾಂತಿ, ಸಮಾನತೆಯನ್ನು ಸಾರುತ್ತದೆ ಎಂದು ಸರ್ಖಾಜಿ
ತಿಳಿಸಿದರು.

ಭರ್ಜರಿ ವ್ಯಾಪಾರ: ಹಬ್ಬ ಆಚರಿಸಲು ಮುಸ್ಲಿಮರು ಮಂಗಳವಾರ ಖರೀದಿಯ ಭರಾಟೆಯಲ್ಲಿ ತೊಡಗಿದ ಕಾರಣ ನಗರದಲ್ಲಿ ವ್ಯಾಪಾರ
ಗರಿಗೆದರಿತ್ತು.

ಮುಸ್ಲಿಂ ಸಮುದಾಯದವರು ಹೆಚ್ಚಿನ ಸಂಖ್ಯೆಯಲ್ಲಿ ಉದಯಗಿರಿ, ತಿಲಕ್‌ನಗರ, ರಾಜೀವ್‌ ನಗರ, ಬನ್ನಿಮಂಟಪ, ಮಂಡಿ ಮೊಹಲ್ಲಾ, ಎನ್‌.ಆರ್‌.ಮೊಹಲ್ಲಾ ಪ್ರದೇಶಗಳ ಅಂಗಡಿಗಳಲ್ಲಿ ವ್ಯಾಪಾರ ಕಳೆಗಟ್ಟಿತ್ತು.

ಸಾಡೇ ರಸ್ತೆ, ಅರಸು ರಸ್ತೆಯಲ್ಲಿರುವ ಬಟ್ಟೆ ಅಂಗಡಿಗಳು ಅಲ್ಲದೆ ನಗರದ ಮಾಲ್‌ಗಳು, ಸೂಪರ್ ಮಾರ್ಕೆಟ್‌ ಮತ್ತು ಹೈಪರ್‌ ಮಾರ್ಕೆಟ್‌ಗಳಲ್ಲೂ ಹಬ್ಬದ ಖರೀದಿ ಜೋರಾಗಿತ್ತು. ಮಾಂಸದ ಅಂಗಡಿಗಳ ಮುಂದೆ ಉದ್ದನೆಯ ಸಾಲು
ಕಂಡುಬಂದಿತು.

ಎಲ್ಲೆಡೆ ಬಿಗಿಭದ್ರತೆ

‘ಈದುಲ್ ಫಿತ್ರ್’ ಹಬ್ಬದ ನಿಮಿತ್ತ ನಗರದಲ್ಲಿ ಪೊಲೀಸರು ಬಿಗಿ ಭದ್ರತೆ ಏರ್ಪಡಿಸಿದ್ದಾರೆ.

12 ನಗರ ಸಶಸ್ತ್ರ ತುಕಡಿ, 4 ಕರ್ನಾಟಕ ರಾಜ್ಯ ಮೀಸಲು ಪಡೆ, 30 ಅಶ್ವಾರೋಹಿ ದಳ, 2 ಕಮಾಂಡೊ ಪಡೆಗಳನ್ನು ನಿಯೋಜಿಸಲಾಗಿದೆ. 27 ಇನ್‌ಸ್ಪೆಕ್ಟರ್, 39 ಸಬ್‌ಇನ್‌ಸ್ಪೆಕ್ಟರ್, 108 ಸಹಾಯಕ ಸಬ್‌ಇನ್‌ಸ್ಪೆಕ್ಟರ್‌, 774 ಸಿಬ್ಬಂದಿಯನ್ನು ನಿಯೋಜಿಸಲಾಗಿದೆ. 10 ಕಡೆ ಚೆಕ್‌ಪೋಸ್ಟ್‌ಗಳನ್ನು ರಚಿಸಲಾಗಿದೆ. ಮಂಗಳವಾರ ರಾತ್ರಿಯಿಂದಲೇ ಪ್ರಾರ್ಥನಾ ಮಂದಿರಗಳ ಮೇಲೆ ಕಣ್ಗಾವಲು ಇರಿಸಲಾಗಿದೆ ಎಂದು ಡಿಸಿಪಿ ಮುತ್ತುರಾಜ್ ‘ಪ್ರಜಾವಾಣಿ’ಗೆ ತಿಳಿಸಿದರು.‌

ವಿರಾಟ್ ಕೊಹ್ಲಿ ನಾಯಕತ್ವದ ಭಾರತ ಕ್ರಿಕೆಟ್‌ ತಂಡ ಕಪ್ ಗೆಲ್ಲುತ್ತಾ? ಐಸಿಸಿ ವಿಶ್ವಕಪ್ 2019 ಯಾರು ಗೆಲ್ಲುತ್ತಾರೆ? ಕೋಟ್ಯಂತರ ಕ್ರಿಕೆಟ್ ಪ್ರೇಮಿಗಳ ನಿರೀಕ್ಷೆಗೆ ಉತ್ತರ ಸಿಗುವ ಕಾಲ ಬಂದಿದೆ. ವಿಶ್ವಕಪ್ ಕ್ರಿಕೆಟ್‌ನ ಸ್ಕೋರ್ ಅಪ್‌ಡೇಟ್ಸ್‌, ಮ್ಯಾಚ್‌ಗಳ ವರದಿ, ವಿಶ್ವಕಪ್ ಕ್ರಿಕೆಟ್ ಹೆಜ್ಜೆ ಗುರುತು, ಆಟಗಾರರ ಸಂದರ್ಶನ, ವೇಳಾಪಟ್ಟಿ ತಿಳಿದುಕೊಳ್ಳಲು www.prajavani.net ಜಾಲತಾಣಕ್ಕೆ ಭೇಟಿ ನೀಡಿ. ಕ್ರೀಡಾಪ್ರೇಮಿಗಳ ನೆಚ್ಚಿನ ಆಯ್ಕೆ ‘ಪ್ರಜಾವಾಣಿ’. ಇದು ಅತ್ಯಂತ ವಿಶ್ವಾಸಾರ್ಹ ಸುದ್ದಿ ಮಾಧ್ಯಮ.

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !