ಮೈಸೂರು: ತಿ.ನರಸೀಪುರ ತಾಲ್ಲೂಕಿನ ಆಲಗೂಡಿನಲ್ಲಿರುವ ಸಿದ್ಧೇಶ್ವರಸ್ವಾಮಿ ದೇಗುಲದ ಪುನರುಜ್ಜೀವನದ ನಂತರ ವಿಗ್ರಹ ಪ್ರತಿಷ್ಠಾಪನಾ ಕಾರ್ಯವು ನ. 26ರಿಂದ 2 ದಿನಗಳ ಕಾಲ ನಡೆಯಲಿದೆ.
ಕ್ರಿ.ಶ 1,275ಕ್ಕೂ ಹೆಚ್ಚು ಪ್ರಾಚೀನತೆ ಹೊಂದಿದ ಹೆಗ್ಗಳಿಕೆ ಈ ದೇಗುಲದ್ದು. ಗಂಗರ ಅರಸ ಶ್ರೀಪುರುಷನ ಕುರಿತ ವಿವರಗಳಿರುವ ಶಾಸನಗಳೂ ಸೇರಿದಂತೆ ಒಟ್ಟು 15 ಪ್ರಾಚೀನ ಶಾಸನಗಳು ಈ ಗ್ರಾಮದಲ್ಲಿ ಲಭ್ಯವಾಗಿವೆ ಎಂದು ಆಲಗೂಡು ಶ್ರೀ ಸಿದ್ಧೇಶ್ವರ ದೇವಸ್ಥಾನ ಪುನರ್‌ನಿರ್ಮಾಣ ಸಮಿತಿಯ ಸದಸ್ಯ ಡಾ.ವೈ.ಡಿ.ರಾಜಣ್ಣ ಇಲ್ಲಿ ಸೋಮವಾರ ಸುದ್ದಿಗೋಷ್ಠಿಯಲ್ಲಿ ತಿಳಿಸಿದರು.
ಈ ದೇಗುಲದಲ್ಲಿರುವ ಸಿದ್ಧೇಶ್ವರಸ್ವಾಮಿ, ಗಣೇಶ, ಮಹಿಷಮರ್ದಿನಿ ಹಾಗೂ ಸೂರ್ಯನ ವಿಗ್ರಹವು ಅತ್ಯಂತ ಮಹತ್ವ ಹೊಂದಿವೆ. ಶಿಥಿಲಗೊಂಡಿದ್ದ ಈ ದೇಗುಲದ ಪುನರ್‌ಜ್ಜೀವನಕ್ಕಾಗಿ 7 ವರ್ಷಗಳ ಹಿಂದೆಯೇ ಮುಜರಾಯಿ ಇಲಾಖೆಯ ಅನುಮತಿ ಪಡೆದು ಸಮಿತಿ ಸ್ಥಾಪಿಸಲಾಗಿತ್ತು. ಸಂಗ್ರಹಗೊಂಡಿದ್ದ ₹ 80 ಲಕ್ಷ ದೇಣಿಗೆಯನ್ನು ವಿನಿಯೋಗಿಸಲಾಗಿದೆ ಎಂದು ಅವರು ಮಾಹಿತಿ ನೀಡಿದರು.
ಸಮಿತಿಯ ಗೌರವಾಧ್ಯಕ್ಷ ವೈ.ಎಸ್.ಯೋಗಾನಂದ, ಖಜಾಂಚಿ ವೈ.ಜಿ.ಸಿದ್ದೇಗೌಡ ಇದ್ದರು.
