ಮೈಸೂರು–ಮಂಗಳೂರು: ವಿಮಾನ ಸಂಚಾರ ವಿಳಂಬ

ಏರ್ ಇಂಡಿಯಾದ ಅಲಯನ್ಸ್‌ ಏರ್‌ ಸಂಸ್ಥೆ ಅ.25ರಿಂದ ಮೈಸೂರು–ಮಂಗಳೂರು ನಡುವೆ ಉಡಾನ್‌ ಯೋಜನೆಯಡಿ ವಿಮಾನ ಹಾರಾಟ ಆರಂಭಿಸುವುದಾಗಿ ಪ್ರಕಟಿಸಿತ್ತು.

ಎರಡೂ ನಗರಗಳ ನಡುವೆ ವಿಮಾನ ಹಾರಾಟ ಆರಂಭಿಸುವಂತೆ ಹಲವು ಸಂಘ–ಸಂಸ್ಥೆಗಳು, ವಾಣಿಜ್ಯೋದ್ಯಮಿಗಳು ಸೇರಿದಂತೆ ಪ್ರಮುಖರು ಆಗ್ರಹಿಸಿದ್ದರು.

‘ಮೈಸೂರು–ಮಂಗಳೂರು ನಡುವೆ ಅಲಯನ್ಸ್‌ ಏರ್‌ ಸಂಸ್ಥೆಯೇ ವಿಮಾನ ಸಂಚಾರ ಆರಂಭಿಸಲಿದೆ. ಇದಕ್ಕೆ ಅಗತ್ಯವಾದ ಎಲ್ಲ ಸಿದ್ಧತೆ ಪೂರ್ಣಗೊಂಡಿವೆ. ಸಂಸ್ಥೆಯು ಅನುಮತಿಯನ್ನು ಪಡೆದಿದೆ. ವಿಮಾನ ಹಾರಾಟ ಮಾರ್ಗಕ್ಕೂ ಪರವಾನಗಿ ದೊರೆತಿದೆ. ಮಂಡಕಳ್ಳಿ ವಿಮಾನ ನಿಲ್ದಾಣವೂ ಸಮಯ ಹೊಂದಿಸಲು ಸಹಮತ ವ್ಯಕ್ತಪಡಿಸಿದೆ’ ಎಂದು ಮಂಡಕಳ್ಳಿಯಲ್ಲಿರುವ ಮೈಸೂರು ವಿಮಾನ ನಿಲ್ದಾಣದ ನಿರ್ದೇಶಕ ಆರ್‌.ಮಂಜುನಾಥ್ ‘ಪ್ರಜಾವಾಣಿ’ಗೆ ತಿಳಿಸಿದರು.

‘ಅಲಯನ್ಸ್‌ ಏರ್‌ ಇದೇ 25ರಿಂದ ವಿಮಾನ ಹಾರಾಟ ಆರಂಭಿಸುತ್ತಿಲ್ಲ ಎಂಬುದನ್ನು ತಿಳಿಸಿದೆ. ಮಾಸಾಂತ್ಯ ಸೇರಿದಂತೆ ಯಾವಾಗ ಬೇಕಾದರೂ ಹಾರಾಟ ಆರಂಭಿಸಬಹುದು. ಈ ಬಗ್ಗೆ ಖಚಿತ ಮಾಹಿತಿಯಿಲ್ಲ’ ಎಂದು ಮಂಜುನಾಥ್ ಹೇಳಿದರು.