ಎಚ್.ಡಿ.ಕೋಟೆ: ಗ್ರಾಮ ಪಂಚಾಯಿತಿ ಅಭಿವೃದ್ಧಿ ಅಧಿಕಾರಿಯೊಬ್ಬರು ಕೋವಿಡ್ಗೆ ಸಂಬಂಧಿಸಿದ ನಿಯಮಗಳನ್ನು ಉಲ್ಲಂಘಿಸಿ ಪಂಚಾಯಿತಿ ಕಚೇರಿಯಲ್ಲಿ ಶನಿವಾರ ಜನ್ಮದಿನ ಆಚರಿಸಿಕೊಂಡಿದ್ದಾರೆ.
ತಾಲ್ಲೂಕಿನ ಎನ್.ಬೇಗೂರು ಪಿಡಿಒ ಎಂ.ಕೆ.ದೇವರಾಜು ಜನ್ಮದಿನವನ್ನು ಆಚರಿಸಿಕೊಂಡವರು. ಈ ವೇಳೆ ಪರಸ್ಪರ ಅಂತರವನ್ನೂ ಕಾಪಾಡಿಕೊಳ್ಳದೆ, ಮಾಸ್ಕ್ ಧರಿಸದೆ ಪಾಲ್ಗೊಂಡಿದ್ದರು. ಅವರಿಗೆ ಪಂಚಾಯಿತಿ ಸದಸ್ಯರು ಚಿನ್ನದ ಉಡುಗೊರೆ ನೀಡಿದ್ದಾರೆ.
ಕೆಲವು ಸದಸ್ಯರು, ಸಾರ್ವಜನಿಕರು ಸ್ವಯಂ ಪ್ರೇರಿತರಾಗಿ ತೆರಳಿ ಕೇಕ್ ಮತ್ತು ಉಡುಗೊರೆ ನೀಡಿ ಜನ್ಮದಿನದ ಶುಭಾಶಯ ಕೋರಿದ್ದಾರೆ ಎಂದು ಗ್ರಾಮ ಪಂಚಾ ಯಿತಿ ಸದಸ್ಯ ಶೈಲೇಂದ್ರ ತಿಳಿಸಿದರು.
ಕೊರೊನಾ ಸೋಂಕು ಕಡಿಮೆ ಆಗದೆ ಇರುವುದರಿಂದ ಸರ್ಕಾರ ಎಲ್ಲ ವ್ಯವಹಾರಗಳನ್ನು ಸ್ಥಗಿತಗೊಳಿಸಿದೆ. ಸರ್ಕಾರಿ ಅಧಿಕಾರಿಗಳೇ ಅವಿವೇಕದಿಂದ ವರ್ತಿಸಿದರೆ, ಸಾರ್ವಜನಿಕರಿಗೆ ಮತ್ತಷ್ಟು ಸಂಕಷ್ಟ ಉಂಟಾಗಲಿದೆ ಎಂದು ದಲಿತ ಮುಖಂಡ ಡಾ.ಪುಟ್ಟನಂಜಯ್ಯ ಬೇಸರ ವ್ಯಕ್ತಪಡಿಸಿದರು.