7
ಗೃಹ ಕಾರ್ಮಿಕರ ದಿನಾಚರಣೆ; ಕಾರ್ಮಿಕರಿಗೆ ಗೀತಾ ಸಲಹೆ

ಸರ್ಕಾರಿ ಸೌಲಭ್ಯಕ್ಕೆ ಸ್ಮಾರ್ಟ್‌ ಕಾರ್ಡ್‌ ಅಗತ್ಯ

Published:
Updated:
ಮೈಸೂರು ಅರಮನೆಯ ಕೋಟೆ ಆಂಜನೇಯಸ್ವಾಮಿ ದೇವಸ್ಥಾನದ ಎದುರು ಗೃಹ ಕಾರ್ಮಿಕರಿಗೆ ಸರ್ಕಾರದಿಂದ ಸಿಗುವ ಸೌಲಭ್ಯಗಳ ಕುರಿತು ಜಾಗೃತಿ ಮೂಡಿಸಲು ಬೀದಿನಾಟಕ ಪ್ರದರ್ಶಿಸಲಾಯಿತು

ಮೈಸೂರು: ಸರ್ಕಾರಿ ಸೌಲಭ್ಯ ಪಡೆಯಲು ಗೃಹ ಕಾರ್ಮಿಕರಿಗೆ ಸ್ಮಾರ್ಟ್‌ ಕಾರ್ಡ್‌ ಅಗತ್ಯ ಎಂದು ಲೇಬರ್ ಇನ್‌ಸ್ಪೆಕ್ಟರ್ ಗೀತಾ ಹೇಳಿದರು.

ಮೈಸೂರು ಗೃಹ ಕಾರ್ಮಿಕರ ಟ್ರೇಡ್ ಯೂನಿಯನ್ ವತಿಯಿಂದ ವಿಶ್ವ ಗೃಹ ಕಾರ್ಮಿಕರ ದಿನಾಚರಣೆ ಅಂಗವಾಗಿ ಬುಧವಾರ ಹಮ್ಮಿಕೊಂಡಿದ್ದ ಜಾಥಾ, ಬೀದಿನಾಟಕ, ಸಭಾ ಕಾರ್ಯಕ್ರಮದಲ್ಲಿ ಅವರು ಮಾತನಾಡಿದರು. ಮೈಸೂರಿನಲ್ಲಿ ಸುಮಾರು 55,000 ಕಟ್ಟಡ ಕಾರ್ಮಿಕರು ಕಾರ್ಮಿಕ ಇಲಾಖೆಯಲ್ಲಿ ನೋಂದಣಿಯಾಗಿದ್ದಾರೆ. ಕಟ್ಟಡ ಕಾರ್ಮಿಕರ ಸೌಲಭ್ಯವನ್ನು ಗೃಹ ಕಾರ್ಮಿಕರಿಗೂ ನೀಡುವ ಬಗ್ಗೆ ಚಿಂತಿಸಲಾಗಿದೆ. ಗೃಹ ಕಾರ್ಮಿಕರನ್ನು ಗುರುತಿಸಿ ಸ್ಮಾರ್ಟ್‌ ಕಾರ್ಡ್‌ ನೀಡಲು ತೀರ್ಮಾನಿಸಲಾಗಿದೆ. ಕಾರ್ಡ್‌ ಪಡೆದರೆ ಹಲವು ಸೌಲಭ್ಯಗಳು ಸಿಗುತ್ತವೆ. ಅದಕ್ಕಾಗಿ ಕಾರ್ಮಿಕ ಇಲಾಖೆ ಸಂಪರ್ಕಿಸಿ ₹ 50 ನೀಡಿ ನೋಂದಣಿ ಮಾಡಿಸಿ, ಪ್ರತಿವರ್ಷ ಕಾರ್ಡ್‌ ನವೀಕರಿಸಬಹುದು ಎಂದು ಮಾಹಿತಿ ನೀಡಿದರು.

ಅಪಘಾತವಾಗಿ ತೀರಿಕೊಂಡರೆ ₹ 3 ಲಕ್ಷ, ಕಾಯಿಲೆ ಇದ್ದು ಚಿಕಿತ್ಸೆ ಪಡೆಯುವವರಿಗೆ ಆಸ್ಪತ್ರೆ ವೆಚ್ಚ, ಹೆರಿಗೆಯಾದ ಮಹಿಳೆಗೆ ₹ 20 ಸಾವಿರ, ಕೆಲಸಕ್ಕೆ ಪೂರಕ ಸಾಮಗ್ರಿಕೊಳ್ಳಲು ₹ 15 ಸಾವಿರ, ಮನೆ ಕಟ್ಟಿಸಲು ₹ 2 ಲಕ್ಷ, ಕಾರ್ಮಿಕರ ಶಾಲಾ ಮಕ್ಕಳಿಗೆ ಪ್ರತಿವರ್ಷ ₹ 2 ಸಾವಿರ, ಅಂತ್ಯಕ್ರಿಯೆಗೂ ಸಹಾಯಧನ ಸೇರಿದಂತೆ ಹಲವು ಸೌಲಭ್ಯಗಳನ್ನು ನೀಡಲಾಗುವುದು. ಇವುಗಳ ಸದುಪಯೋಗಪಡಿಸಿಕೊಳ್ಳಿ ಎಂದು ಸಲಹೆ ನೀಡಿದರು.

60 ವರ್ಷ ತುಂಬಿದವರಿಗೆ ಪಿಂಚಣಿ ಸೌಲಭ್ಯವೂ ಸಿಗುತ್ತದೆ. ಕಾರ್ಮಿಕ ಇಲಾಖೆಗೆ ಅರ್ಜಿ ಸಲ್ಲಿಸಿ, 5 ವರ್ಷ ಫಲಾನುಭವಿಗಳಾಗಿದ್ದರೆ ಪ್ರತಿ ತಿಂಗಳು ₹ 1,000 ಪಿಂಚಣಿ ನೀಡಲಾಗುವುದು. ಮೈಸೂರಿನಲ್ಲಿ ಈಗಾಗಲೇ 35 ಜನ ಪಿಂಚಣಿ ಪಡೆಯುತ್ತಿದ್ದಾರೆ ಎಂದು ತಿಳಿಸಿದರು.

ಜಾಥಾ: ಅರಮನೆಯ ಕೋಟೆ ಆಂಜನೇಯಸ್ವಾಮಿ ದೇವಸ್ಥಾನದಿಂದ ಜೆಎಲ್‌ಬಿ ರಸ್ತೆವರೆಗೆ ಜಾಥಾ ನಡೆಯಿತು. ‘ಮನೆ ಕೆಲಸದವರನ್ನು ಗೌರವಿಸಿ’, ‘ಕನಿಷ್ಠ ವೇತನ ಜಾರಿ ಮಾಡಿ’, ‘ಸಾಮಾಜಿಕ ಭದ್ರತೆ ಒದಗಿಸಿ’ ಎಂಬ ಘೋಷವಾಕ್ಯಗಳನ್ನು ಕೂಗುತ್ತಾ, ಬೀದಿನಾಟಕ ಮಾಡುತ್ತ ಜಾಗೃತಿ ಮೂಡಿಸಲಾಯಿತು.

ಆರ್‌ಎಲ್‌ಎಚ್‌ಪಿ ನಿರ್ದೇಶಕಿ ಸರಸ್ವತಿ, ಯೂನಿಯನ್ ಅಧ್ಯಕ್ಷೆ ಗಿರಿಜಮ್ಮ, ಧ್ವನಿ ಮಹಿಳಾ ಒಕ್ಕೂಟದ ಅಧ್ಯಕ್ಷೆ ನಳಿನಾ, ಲೇಬರ್ ಇನ್‌ಸ್ಪೆಕ್ಟರ್‌ ವೀಣಾ ಇದ್ದರು.

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !