ಏರುತ್ತಲೇ ಇದೆ ಬಿಸಿಲಿನ ತಾಪ

ಸಾಮಾನ್ಯವಾಗಿ ಜಿಲ್ಲೆಯಲ್ಲಿ ಮುಂಗಾರಿಗಿಂತ ಮುಂಗಾರುಪೂರ್ವ ದಲ್ಲೇ ಹೆಚ್ಚು ಮಳೆಯಾಗುತ್ತಿತ್ತು. ಯುಗಾದಿಗೂ ಮುನ್ನವೇ ಫೆಬ್ರುವರಿಯಲ್ಲಿ ಒಂದು ಬಾರಿ, ಯುಗಾದಿ ಸನಿಹದಲ್ಲಿ ಮತ್ತೊಂದೆರಡು ಬಾರಿ ಮಳೆ ಬಿದ್ದು ಬೇಸಿಗೆಯ ತಾಪಮಾನ ನಿಯಂತ್ರಣಕ್ಕೆ ಬರುತ್ತಿತ್ತು. ಆದರೆ, ಈ ಬಾರಿ ಮುಂಗಾರುಪೂರ್ವದಲ್ಲಿ ಉತ್ತಮ ಎಂದು ಹೇಳಬಹುದಾದ ಮಳೆಯಾಗಿಲ್ಲ. ಇದು ತಾಪಮಾನ ಏರಿಕೆಗೆ ಕಾರಣವಾಗಿದೆ.

ಇದರ ಜತೆಗೆ, ಮೇಲ್ಮೈ ಸುಳಿ ಗಾಳಿಯೂ ಬೀಸುತ್ತಿಲ್ಲ. ಮೋಡಗಳೂ ಬರುತ್ತಿಲ್ಲ. ಇದರಿಂದಾಗಿಯೂ ತಾಪಮಾನ ಹೆಚ್ಚುತ್ತಿದೆ.

ಮಾರ್ಚ್ ಆರಂಭದಲ್ಲಿ 32 ಡಿಗ್ರಿ ಸೆಲ್ಸಿಯಷ್‌ನಷ್ಟು ಇದ್ದ ತಾಪಮಾನ ಇದೀಗ 35 ಡಿಗ್ರಿ ದಾಟಿದೆ. ಶನಿವಾರ ಅತ್ಯಧಿಕ ತಾಪಮಾನ 36 ಡಿಗ್ರಿ ತಲುಪಿತ್ತು ಎಂದು ಖಾಸಗಿ ಹವಾಮಾನ ಸೇವಾ ಸಂಸ್ಥೆ ‘ಆಕ್ಯೂವೆದರ್‌’ನ ಅಂಕಿಅಂಶಗಳು ಹೇಳುತ್ತವೆ.

ಭಾರತೀಯ ಹವಾಮಾನ ಇಲಾಖೆಯ ಅಂಕಿಅಂಶಗಳೂ ತಾಪಮಾನ ಏರಿಕೆಯಾಗಿದೆ ಎಂದು ಹೇಳುತ್ತವೆ. ಮಾರ್ಚ್ 27ರಂದು 34 ಡಿಗ್ರಿಯಷ್ಟು ಇದ್ದ ಉಷ್ಠಾಂಶ ಮಾರ್ಚ್ 31ರಂದು 35 ಡಿಗ್ರಿ ಇತ್ತು. ಇದು ಇನ್ನಷ್ಟು ಹೆಚ್ಚುವ ಸಾಧ್ಯತೆ ಇದೆ ಎಂದೂ ಮುನ್ಸೂಚನೆ ನೀಡಿದೆ.

ನೆತ್ತಿ ಸುಡುವ ಬಿಸಿಲಿನ ಜತೆಗೆ ಉಷ್ಣಾಂಶದ ಏರಿಕೆಯೂ ಸೆಖೆಯನ್ನು ತಂದೊಡ್ಡಿದೆ. ಯುಗಾದಿಯ ನಂತರ ಒಳ್ಳೆಯ ಮಳೆ ಬೀಳುತ್ತದೆ ಎಂಬ ರೈತರ ನಿರೀಕ್ಷೆ ಹುಸಿಯಾಗುತ್ತಿದೆ.