ಶುಕ್ರವಾರ, ಮೇ 27, 2022
21 °C
ವಿಶೇಷ ಕಾರ್ಯಕಾರಿಣಿ ಸಭೆಯಲ್ಲಿ ಶಾಸಕ ಕುಮಾರ್‌ ಬಂಗಾರಪ್ಪ

ಸೊರಬ ತಾಲ್ಲೂಕಿನ ಅಭಿವೃದ್ಧಿಗೆ ಆದ್ಯತೆ: ಶಾಸಕ ಕುಮಾರ್‌ ಬಂಗಾರಪ್ಪ

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

Deccan Herald

ಸೊರಬ: ತಾಲ್ಲೂಕಿನ ಆಡಳಿತವು ಜನಸಾಮಾನ್ಯರ ಕೈಗೆ ಎಟುಕುವಂತೆ ಮಾಡುವ ಉದ್ದೇಶದಿಂದ ಇಲಾಖೆಗಳಲ್ಲಿ ನಡೆಯುತ್ತಿರುವ ಭ್ರಷ್ಟಾಚಾರವನ್ನು ತೊಲಗಿಸಿ, ಸಮಗ್ರ ಅಭಿವೃದ್ಧಿಗೆ ಒತ್ತು ನೀಡುವ ಪ್ರಯತ್ನ ಮಾಡುತ್ತಿದ್ದೇನೆ ಎಂದು ಶಾಸಕ ಕುಮಾರ್ ಬಂಗಾರಪ್ಪ ಹೇಳಿದರು.

ಪಟ್ಟಣದಲ್ಲಿ ತಾಲ್ಲೂಕು ಬಿಜೆಪಿ ಘಟಕ ಭಾನುವಾರ ಹಮ್ಮಿಕೊಂಡ ವಿಶೇಷ ಕಾರ್ಯಕಾರಿಣಿ ಸಭೆಯಲ್ಲಿ ಅವರು ಮಾತನಾಡಿದರು.

ಶಾಸಕನಾಗಿ ಮೂರು ತಿಂಗಳು ಪೂರೈಸಿದ್ದು, ತಾಲ್ಲೂಕಿನ ಅಭಿವೃದ್ಧಿಯ ದೃಷ್ಟಿಯಿಂದ ವಿಶೇಷ ಯೋಜನೆಗಳನ್ನು ಹಾಕಿಕೊಂಡಿದ್ದೇನೆ. ಅವೆಲ್ಲವನ್ನು ಪಕ್ಷದ ನೆರವಿನಿಂದ ಪೂರ್ಣಗೊಳಿಸುವ ವಿಶ್ವಾಸವಿದೆ ಎಂದರು.

‘ರಸ್ತೆ ಮತ್ತು ನೀರಾವರಿ ಕಾಮಗಾರಿಗಳು ಚುನಾವಣೆಗೋಸ್ಕರ ಮಾಡದೇ ಶಾಶ್ವತ ಕಾಮಗಾರಿಗಳಾಗಿ ರೂಪಿಸಬೇಕು ಎಂಬ ಚಿಂತನೆ ನನ್ನದು. ನೀರಾವರಿ ಈಗಾಗಲೇ ಸಂಬಂಧಿಸಿದಂತೆ ಆನವಟ್ಟಿ, ಜಡೆ, ತಲ್ಲೂರು ಭಾಗಕ್ಕೆ ನೀರು ಹರಿಸಲು ದಂಡಾವತಿ ಹಾಗೂ ವರದಾ ನದಿಗಳಿಂದ ಏತ ನೀರಾವರಿಗೆ ಸರ್ವೆಕಾರ್ಯ ಪೂರ್ಣಗೊಂಡಿದೆ’ ಎಂದರು.

‘ಅಭಿವೃದ್ಧಿಗೆ ಅಧಿಕಾರಿಗಳಿಂದ ಉತ್ತಮ ಸ್ಪಂದನೆ ದೊರೆತ್ತಿದ್ದು ಸಚಿವರೂ ಕೂಡ ನೀರಾವರಿ ಯೋಜನೆಗೆ ಸಹಕಾರ ನೀಡುವುದಾಗಿ ಭರವಸೆ ನೀಡಿದ್ದಾರೆ. ಅನವಟ್ಟಿಯ ಮುಖ್ಯ ರಸ್ತೆ ವಿಸ್ತರಣೆಯಲ್ಲಿ ಲೋಪ ಕಂಡುಬಂದಿದ್ದು ಅದನ್ನು ಸರಿಪಡಿಸುವಂತೆ ಎಂಜಿನಿಯರುಗಳಿಗೆ ತಾಕೀತು ಮಾಡಲಾಗಿದೆ. ಇದಕ್ಕೆ ಸಾರ್ವಜನಿಕರು ಹಾಗೂ ಪಕ್ಷದ ಕಾರ್ಯಕರ್ತರಿಂದ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗಿದೆ’ ಎಂದರು.

ಶಿಕ್ಷಣಕ್ಕೆ ಹೆಚ್ಚಿನ ಒತ್ತು ನೀಡಿದ್ದು, ಸೊರಬ ಹಾಗೂ ಆನವಟ್ಟಿ ಪ್ರಥಮದರ್ಜೆ ಕಾಲೇಜುಗಳೀಗೆ ಅನುದಾನ ಬಂದಿದ್ದು, ಇದರಿಂದ ಹೆಚ್ಚುವರಿ ಕೊಠಡಿ ಹಾಗೂ ಇನ್ನಿತರೆ ಸೌಲಭ್ಯ ಒದಗಿಸಲಾಗುವುದು. ಉನ್ನತ ಶಿಕ್ಷಣ ಇಲಾಖೆ ಜತೆಗೆ ಮಾತುಕತೆ ನಡೆಸಿದ್ದು, ಎರಡೂ ಕಾಲೇಜುಗಳಿಗೆ ಕಾಯಂ ಪ್ರಾಂಶುಪಾಲರುಗಳ ಹುದ್ದೆ ವಾರದೊಳಗೆ ನಿಯೋಜನೆ ಮಾಡಲಾಗುವುದು ಎಂದರು. ‌

‘ಆಶ್ರಯ ಬಡಾವಣೆಯ ಅಭಿವೃದ್ಧಿಗೆ ₹1 ಕೋಟಿ ಅನುದಾನ ಬಂದಿದೆ. ಪಟ್ಟಣ ಪಂಚಾಯಿತಿಯನ್ನು ಮುಂದಿನ ಚುನಾವಣೆ ಬರುವುದರೊಳಗಾಗಿ ಪುರಸಭೆಯನ್ನಾಗಿ ಪರಿವರ್ತಿಸಲಾಗುವುದು. ಹಾಗೆಯೇ ಆನವಟ್ಟಿಯ ಗ್ರಾಮ ಪಂಚಾಯಿತಿಯನ್ನು ಪಟ್ಟಣ ಪಂಚಾಯಿತಿಯನ್ನಾಗಿ ಮೇಲ್ದರ್ಜೆಗೇರಿಸಲು ಎಲ್ಲ ಪ್ರಕ್ರಿಯೆಗಳು ನಡೆದಿದೆ’ ಎಂದರು.

ಸರ್ಕಾರ ಸಾಲಮನ್ನಾ ನೆಪದಲ್ಲಿ ಶಾಸಕರ, ಅರೆಕಾಲಿಕ ನೌಕರರ ಸಂಬಳವನ್ನು ಸಕಾಲದಲ್ಲಿ ಕೊಡದಿರುವಷ್ಟು ಅಭದ್ರತೆ ಹೊಂದಿರುವುದು ಅರ್ಥಿಕ ದಿವಾಳಿತನ ತೋರಿಸುತ್ತದೆ. ಜನರು ಮನೆಗಳನ್ನು ನಿರ್ಮಿಸಲು ಹಾಗೂ ಕಾಮಗಾರಿಗಳಿಗೆ ಅನುಕೂಲವಾಗುವಂತೆ ಜಿಲ್ಲಾಧಿಕಾರಿಗಳ ನೇತೃತ್ವದಲ್ಲಿ ಲೋಕೋಪಯೋಗಿ ಇಲಾಖೆ ಜತೆಗೆ ಒಪ್ಪಂದ ಮಾಡಿಕೊಂಡು ಕಡಿಮೆ ವೆಚ್ಚದಲ್ಲಿ ಗುಣಮಟ್ಟದ ಮರಳನ್ನು ಒದಗಿಸಲು ತಾಲ್ಲೂಕಿನಲ್ಲಿ ಮರಳು ಯಾರ್ಡ್‍ಗಳನ್ನು ಸದ್ಯದಲ್ಲಿ ತೆರೆಯಲಾಗುವುದು ಎಂದರು.

ತಾಲ್ಲೂಕಿನಲ್ಲಿ ಬಗರ್‌ಹುಕುಂ ಸಾಗುವಳಿ ಮಾಡಿ ಅರ್ಹತೆ ಇರುವವರು ಭಯ ಪಡುವ ಪ್ರಮೇಯವಿಲ್ಲ. 94 ಸಿಸಿಯಲ್ಲಿ ಈಗಾಗಲೇ ಕೆಲವರಿಗೆ ಮಂಜೂರಾತಿ ದೊರೆತಿದೆ, ಇನ್ನೂ ಮಂಜೂರಾತಿಗೆ ಅರ್ಹರಿರುವವರ ಜತೆ ನಾವಿದ್ದು, ಒಕ್ಕಲೆಬ್ಬಿಸುತ್ತೇವೆ ಎಂದು ಅಪಪ್ರಚಾರ ಮಾಡುವವರ ಬಗ್ಗೆ ಕಿವಿ ಕೊಡಬೇಡಿ ಎಂದರು.

ಬಿಜೆಪಿ ತಾಲ್ಲೂಕು ಅಧ್ಯಕ್ಷ ಎ.ಎಲ್.ಅರವಿಂದ್ ಅಧ್ಯಕ್ಷತೆ ವಹಿಸಿ ಪ್ರಾಸ್ತಾವಿಕ ಮಾತನಾಡಿದರು. ಬಿಜೆಪಿ ಜಿಲ್ಲಾ ಉಪಾಧ್ಯಕ್ಷ ಶ್ರೀಪಾದ ಹೆಗಡೆ ನಿಸರಾಣಿ, ಪಾಣಿ ರಾಜಪ್ಪ, ನಾಗರಾಜಗೌಡ ಚಿಕ್ಕಾವಲಿ, ಈಶ್ವರ ಚೆನ್ನಾಪಟ್ಟಣ, ಗಜಾನನರಾವ್ ಉಳವಿ, ಎಂ.ಡಿ.ಉಮೇಶ್, ತಬಲಿ ಬಂಗಾರಪ್ಪ, ನಾಗರಾಜ್ ಚಿಕ್ಕಸವಿ, ಗೀತಾಮಲ್ಲಿಕಾರ್ಜುನ, ಎಂ.ಆರ್.ಪಾಟೀಲ್, ಪ್ರಭಾಕರ ರಾಯ್ಕರ್, ವಕೀಲ ನಾಗಪ್ಪ, ವಸುಂದರಾ, ಕೆ.ಪಿ.ಷಣ್ಮುಖಪ್ಪ ಅಂಡಿಗೆ, ದೇವೇಂದ್ರಪ್ಪ ಚೆನ್ನಾಪುರ, ದಯಾನಂದಗೌಡ,ಶಿವಯೋಗಿ, ಗುರುಪ್ರಸನ್ನಗೌಡ, ವಸಂತ ಬಂಗೇರ, ಶಬ್ಬಿರ್ ಕಿಲ್ಲೆದಾರ್ ಇದ್ದರು.

ಅಂಕಿ ಅಂಶ

* 3500 ಸಾಗುವಳಿ ಪತ್ರ ವಿತರಣೆ

* ₹3.5 ಕೋಟಿ ಸೊರಬ ಪ್ರಥಮದರ್ಜೆ ಕಾಲೇಜಿಗೆ ಅನುದಾನ

* ₹1.5 ಕೋಟಿ ಆನವಟ್ಟಿ ಪ್ರಥಮದರ್ಜೆ ಕಾಲೇಜಿಗೆ ಅನುದಾನ

* 3 ಮರಳು ಯಾರ್ಡ್‌ಗಳ ಸ್ಥಾಪನೆ

 

ತಾಜಾ ಮಾಹಿತಿ ಪಡೆಯಲು ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು