ಆಭರಣದ ಅಂಗಡಿಗಳಲ್ಲಿ ಬಹುತೇಕ ಮಹಿಳೆಯರು ಹೆಚ್ಚಿನ ಸಂಖ್ಯೆಯಲ್ಲಿದ್ದರು. ದಂಪತಿ ಸಮೇತ ಬಂದವರೂ ಇದ್ದರು. ಆದರೆ, ಚಿನ್ನ ಖರೀದಿಯಲ್ಲಿ ಚೌಕಾಸಿ ಮಹಿಳೆಯರದ್ದೆ ನಡೆದಿತ್ತು. ಬಿಲ್ ಕೌಂಟರ್ ಎದುರು ಪುರುಷರು ನಿಂತುಕೊಂಡಿದ್ದರು. ಅಕ್ಷಯ ತೃತೀಯ ದಿನದಂದು ಗ್ರಾಹಕರು ಹೆಚ್ಚಿನ ಸಂಖ್ಯೆಯಲ್ಲಿ ಬರುವುದನ್ನು ನಿರೀಕ್ಷಿಸಿದ್ದ ವ್ಯಾಪಾರಿಗಳು ಮಳಿಗೆಗಳನ್ನು ವಿಶೇಷವಾಗಿ ಅಲಂಕರಿಸಿದ್ದರು. ಅಲ್ಲದೆ, ಬೇಸಿಗೆ ಬಿಸಿಲಿನಲ್ಲಿ ಗ್ರಾಹಕರು ಬಾಯಾರಿಕೆಯಿಂದ ಬಳಲಬಾರದು ಎನ್ನುವ ಸದುದ್ದೇಶಕ್ಕಾಗಿ ಕೆಲವು ಅಂಗಡಿದಾರರು ಉಚಿತವಾಗಿ ತಂಪಾದ ಕುಡಿಯುವ ನೀರಿನ ವ್ಯವಸ್ಥೆ ಕಲ್ಪಿಸಿದ್ದರು.